Babadi ba Rena ba a Botšiša
Na Meetse-fula a Mehleng ya Noa e be e le a Lefase ka Bophara e le ka Kgonthe?
Meetse-fula a mehleng ya Noa a diregile nywageng e fetago 4 000 e fetilego. Ka gona, mo lefaseng ga go na baphologi bao ba a bonego bao ba ka re botšago ka ona. Lega go le bjalo, go na le pego e ngwadilwego ya kotsi ye yeo e bolelago gore meetse a ile a khupetša dithaba tše ditelele kudu tša mehleng yeo.
Pego yeo ya histori e balega ka gore: “Ya ba xôna xo tla xa meetse-fula lefaseng matšatši a masome a manê . . . Meetse ya ba a maxolo ka kudu-kudu lefaseng, xwa ba xwa khurumetšwa le dithaba ka moka tše telele tša ka tlase xa lexodimo. Meetse ya ba a maxolo, a khurumetša dithaba, a di feta ka meêlô e lesome le meêlo e mehlano [mo e ka bago dimithara tše 6,5].”—Genesi 7:17-20.
Ba bangwe ba ka ipotšiša ge e ba taba ya go khupetšwa ga lefase ka moka ka meetse e le nonwane goba mohlomongwe e le pheteletšo. Le gatee! Ge e le gabotse, karolo e kgolo ya lefase e sa dutše e khupeditšwe ke meetse. Meetse a lewatle a khupeditše mo e ka bago 71 lekgolong ya lefase. Ka gona, meetse a mehleng ya meetse-fula a sa dutše a le gona e le ka kgonthe. Le gona ge e ba lehlwa leo le fetogilego dithaba gotee le lehlwa leo le lego karolong ya ka leboa le ya borwa ya lefase di be di ka tologa, meetse a lewatle a be a tla phagama kudu gomme a khupetša metse e megolo e swanago le New York le Tokyo.
Bo-rathutafase bao ba ithutago kagego ya karolo yeo e lego ka leboa-bodikela bja United States ba dumela gore dikotsi tša bogologolo tša meetse-fula tše ka bago 100 di ile tša senya karolo yeo. Go thwe meetse-fula a mangwe a bjalo a ile a hlasela karolo yeo ka meetse ao a bego a phagame ka dimithara tše 600 gomme a kitima ka lebelo la dikhilomithara tše 105 ka iri—meetse a bophara bja dikhubiki khilomithara tše 2 000 a boima bja ditone tše fetago dimilione tše dikete tše pedi. Go utollwa ga bohlatse bjo bongwe bjo bo swanago go dirile gore bo-rathutamahlale ba bangwe ba dumele gore meetse-fula a lefase ka bophara a ile a ba gona.
Lega go le bjalo, go bao ba dumelago gore Beibele ke Lentšu la Modimo, meetse-fula a lefase ka bophara ga e fo ba selo seo go nago le kgonagalo ya gore se ile sa direga. Ke selo sa kgonthe. Jesu o itše go Modimo: “Lentšu la gago ke therešo.” (Johane 17:17) Moapostola Paulo o ngwadile gore thato ya Modimo ke gore “mehuta yohle ya batho e phološwe gomme e fihle tsebong e nepagetšego ya therešo.” (1 Timotheo 2:3, 4) Paulo o be a ka ruta balatedi ba Jesu thuto ya therešo bjang ge e ba Lentšu la Modimo le be le hupere dinonwane?
Jesu o be a sa dumele feela gore Meetse-fula a kile a ba gona, eupša gape o be a dumela gore e be e le a lefase ka bophara. Boporofeteng bja gagwe bjo bogolo bja mabapi le go ba gona ga gagwe le bofelo bja tshepedišo ye ya dilo, o bapišitše ditiragalo tšeo le mehla ya Noa. (Mateo 24:37-39) Moapostola Petro le yena o ngwadile mabapi le meetse-fula a mehleng ya Noa gore: “Ka tšona lefase la nakong yeo le ile la senywa ge le be le apešwa ke meetse.”—2 Petro 3:6.
Ge e ba Noa e be e le motho wa nonwane gomme meetse-fula a lefase ka bophara e se a kgonthe, gona ditemošo tša Petro le Jesu go bao ba phelago mehleng ya bofelo di be di ka se be le seo di se bolelago. Go e na le go ba temošo, dikgopolo tše bjalo di be di ka thatafaletša batho go kwešiša temošo ya Beibele gomme tša ba bea kotsing ya go se phologe masetlapelo a magolo go feta Meetse-fula a mehleng ya Noa.—2 Petro 3:1-7.
Ge a bolela ka go bontšha batho ba gagwe kgaugelo ka go se kgaotše, Modimo o re: “Mola kè [enne] ka re: Meetse-fula a Noaxe a ka se boêle a tlêla lefase. Byale ke êna ke re: Nka se Xo xalefêle; nka se Xo kxalemêle.”Go etša ge Meetse-fula a mehleng ya Noa a ile a khupetša lefase ka moka, botho bja Modimo bo tla ba bjalo go bao ba mmotago.—Jesaya 54:9.