Thuša Ngwana wa Gago go Lebeletšana ka Katlego le Bohloko bja go Hwelwa

KA LEBENKELENG la dipuku leo le dulago le tletše batho, mma yo a ferekanego o ile a llela morekiši ka gore: “Le na le lebenkele leo le tletšego dipuku, eupša ga le na puku yeo e ka thušago ngwana’ka!” Mma yo o be a nyaka keletšo yeo e ka thušago morwa wa gagwe yo monyenyane go lebeletšana ka katlego le lehu leo le bego le sa letelwa la setho sa lapa.

Mma yo o be a e-na le mabaka a go tshwenyega. Ruri go tloga go gateletša gore ngwana yo monyenyane a lebeletšane le go hwelwa! Bana ba phela gabotse ge ba le ka tlase ga tlhokomelo ya malapa a gabo bona, lega go le bjalo lehu le ka tšea setho seo se rategago sa lapa seo ngwana a nago le tswalano ya kgaufsi le sona. Bjalo ka motswadi, o ka thuša bjang ngwana wa gago ge e ba go bonagala gore motho yoo o kgaufsi le go hwa goba ge e ba a šetše a hwile?

Ke therešo gore ge o hwetšwe ke moratiwa wa gago, o ka ba o thatafalelwa ke go lebeletšana le maikwelo a gago; o ka ikwa o le tlalelong gomme o dula o nagana ka tahlegelo ya gago. Lega go le bjalo, o se ke wa lebala gore ngwana wa gago o nyaka thekgo ya gago. Kgatišo yeo e abilwego ke mokgatlo wa kua Minnesota, U.S.A. wa go hlokomela batho bao ba swerwego ke malwetši a sa alafegego e re: “Bana ba utswa ka tsebe ge batho ba bolela gomme ge e ba ba sa hlalosetšwe seo se diregago, gantši ba tla kwela taba yeo thoko.” E tšwela pele ka gore: “Bana ba swanetše go botšwa therešo.” Ka gona, e ka ba gabohlale go hlalosetša bana ba gago ditaba ka botlalo go ya ka tsela yeo ba kwešišago ka yona. Ga go bonolo go dira bjalo ka ge bana ba fapana kudu ka bokgoni bja bona bja go kwešiša seo se diregago.—1 Bakorinthe 13:11.

Kamoo o ka Hlalosago Lehu

Banyakišiši ba bangwe ba re ge batswadi ba bolela le ngwana ka lehu, ba swanetše go ba šedi gore ba se ke ba diriša dipolelwana tše bjalo ka “o robetše,” “o timetše” goba “o etile.” Go diriša dipolelwana tše bjalo ka ntle le go di hlalosa goba go di bolela ka tsela yeo ngwana a ka di kwešišago go ka mo gakantšha. Ke therešo gore Jesu o dirišitše polelwana go robala ka tsela ya seswantšhetšo go hlalosa lehu gomme o dirile bjalo ka mo go swanetšego. Lega go le bjalo, gopola gore Jesu o be a sa bolele le bana. Go oketša moo, o ile a hlalosa papišo yeo. Jesu o boditše balatedi ba gagwe gore: “Latsaro mogwera wa rena o ile go khutša.” Lega go le bjalo, barutiwa ba gagwe “ba be ba nagana gore [Jesu] o be a bolela ka go khutša borokong,” gaešita le ge e be e le batho ba bagolo. Ka gona Jesu o ile a hlalosa taba ka gore: “Latsaro o hwile.” (Johane 11:11-14) Ge e ba batho ba bagolo ba nyaka tlhaloso e bjalo e kwagalago, bana ba rena bona ba e nyaka gakaakang!

Bangwadi ba dipuku e lego Mary Ann Emswiler le James P. Emswiler ba re: “Motswadi a ka leka go nolofatša polelo ge a hlalosetša ngwana lehu, eupša go dira bjalo go ka nea ngwana dikgopolo tšeo a bego a se na tšona pele le tšeo di ka mo tšhošago goba tša mo gobatša.” Ka mohlala, go botša ngwana gore moratiwa yo a hwilego o fo ba a robetše go ka dira gore ngwana a boife gore ge a ka robala bošego a ka tla a se tsoge gape. Ge e ba a fo botšwa gore moratiwa yo a hwilego “o etile” ngwana a ka ikwa a lahlilwe.

Ge batswadi ba bantši ba leka go hlalosetša ngwana lehu, ba hweditše gore bana ba kwešiša mantšu a bonolo le a lebanyago ka pela go feta dikgopolo tšeo di raraganego goba phefolo. (1 Bakorinthe 14:9) Banyakišiši ba bolela gore o kgothaletše ngwana wa gago go botšiša dipotšišo le go bolela ka dilo tšeo di mo tshwenyago. Go boledišana le ngwana wa gago kgafetša-kgafetša go ka go thuša gore o mo hlalosetše dilo tšeo a sa di kwešišego gabotse e bile go ka utolla ditsela tše dingwe tšeo o ka mo thušago ka tšona.

Mothopo o ka Botwago wa Tlhahlo

Nakong ya ge le hwetšwe, ngwana wa gago o tla nyaka tlhahlo, thekgo le dikarabo go wena. Ka gona, o ka hwetša kae tsebišo e ka botwago ya mabapi le lehu? Batho ba bantši ba hweditše gore Beibele ke mothopo o ka botwago wa khomotšo le kholofelo. E bolela therešo ka mathomo a lehu, boemo bja bahu le kholofelo yeo re nago le yona ka bahu. Therešo e bonolo e rego “xo bahu xa xo se se tsebyaxo,” e swanetše go thuša ngwana wa gago go lemoga gore moratiwa wa gagwe yo a hwilego ga a tlaišege. (Mmoledi 9:5) Go oketša moo, ka Beibeleng Modimo o re nea kholofelo ya gore re tla bona baratiwa ba rena ba hwilego gape paradeiseng mo lefaseng.—Johane 5:28, 29.

Ka go retologela Mangwalong a Makgethwa, o ka thuša ngwana wa gago go ithuta gore Beibele e re nea tlhahlo le khomotšo e ka botwago ge re lebeletšane le maemo ka moka a gateletšago. Ka nako e swanago, ngwana wa gago o tla bona gore wena bjalo ka motswadi o ithekgile ka Lentšu la Modimo bakeng sa tlhahlo ditabeng tša bohlokwa bophelong.—Diema 22:6; 2 Timotheo 3:15.

Dipotšišo tša Gago di a Arabja

Ge o thuša ngwana wa gago go lebeletšana ka katlego le bohloko bja go hwelwa, go ka ba le maemo ao a go tlabago. Ke’ng seo o ka se dirago?a Anke re ahla-ahleng dipotšišo tše dingwe tšeo di tlwaelegilego tšeo di ka rotogago.

• Na ke swanetše go utela ngwana’ka gore ke a lla? Ke ga tlhago gore o nyake go šireletša ngwana wa gago. Eupša na ke phošo gore ngwana wa gago a bone gore o a lla? Batswadi ba bantši ba hweditše e le mo gobotse kudu go botša ngwana wa bona therešo ka manyami a bona, ka go realo ba mmontšha gore ke mo go swanetšego go lla. Ba bangwe ba ile ba boledišana le bana ba bona ka mehlala ya ka Beibeleng ya batho bao ba ilego ba lla phatlalatša. Ka mohlala, Jesu o ile a lla ge mogwera wa gagwe Latsaro yo a rategago a hwile. Jesu ga se a ka a uta maikwelo a gagwe.—Johane 11:35.

• Na ngwana’ka o swanetše go ba gona polokong ka gae goba mabitleng goba tirelong ya lehu? Ge e ba ngwana a tla ba gona, e ka ba gabohlale go mo hlalosetša e sa le pele gore ke eng seo a ka se letelago le lebaka leo ka lona go bago le tirelo ya poloko. Ke therešo gore maemong a mangwe batswadi ba ka phetha ka gore go na le mabaka a mabotse a gore bana ba bona ba se ke ba ba gona tirelong ka moka goba karolong ya yona. Bana bao ba bago gona ditirelong tša poloko tšeo di swarwago ke Dihlatse tša Jehofa ba ka holwa ke polelo e theilwego Beibeleng yeo e newago. Go tlaleletša moo, “maikwelo a borutho a bonolo” le lerato leo le bonalago gare ga bao ba lego gona di dira gore tiragalo ye e be le mafelelo a mabotse le go ba e homotšago, gaešita le ngwaneng.—Baroma 12:10, 15; Johane 13:34, 35.

• Na ke swanetše go bolela le ngwana’ka ka moratiwa yo a hwilego? Banyakišiši ba bangwe ba re ge e ba o efoga taba ye ka mo go feletšego, ngwana wa gago a ka phetha ka phošo gore o utile sephiri se itšego ka mohu goba gore o leka go mo tloša monaganong. Mongwadi wa dipuku e lego Julia Rathkey o re: “Ke gabohlokwa gore o thuše bana go dula ba gopola motho yoo gomme ba se ke ba tšhoga.” Go bolela ka bolokologi ka mohu, go akaretša le go bolela ka dika tše dibotse tša gagwe le bophelo bja gagwe, go ka le thuša go lebeletšana ka katlego le go hwelwa. Batswadi ba Dihlatse ba homotša bana ba bona ka kholofelo ya Beibele ya go tsogela lefaseng la paradeise moo bolwetši le lehu di ka se sa hlwago di e-ba gona.—Kutollo 21:4.

• Nka thuša ngwana’ka bjang ge a llela mohu? Nakong ya ge a llela mohu, ngwana wa gago a ka ba le maswao a bonagalago, mohlomongwe bolwetši. Ngwana a ka thoma go galefa goba go tshwenyega ka baka la go ikwa a se na thušo e bile a ferekane. O se ke wa makala ge ngwana wa gago a hlaselwa ke maikwelo a go ikwa a le molato, a go gokarela kudu, goba a tšhoga ge o fihla gae ka morago ga nako goba o babja. O ka swaragana bjang le mathata a ngwana wa gago? Ngwana wa gago ga se a swanela go ikwa gore ga o lemoge seo se diregago. Ka gona, e-ba le temogo gomme o bee boemo leihlo. Leka gore o se ke wa nagana gore ngwana wa gago o kgona go lebeletšana le boemo goba wa bebofatša tsela yeo lehu le mo kgomilego ka yona. Mo kgonthišetše ka mehla gomme o mo kgothaletše go botšiša dipotšišo le go boledišana le wena go tšwa pelong. O ka matlafatša kholofelo ya ngwana wa gago—gotee le ya gago—“ka khomotšo e tšwago Mangwalong.”—Baroma 15:4.

• Nka thomološa neng mediro ya letšatši le letšatši ya lapa gotee le mediro e mengwe? Ditsebi di re tšwela pele ka mediro e mentši ya letšatši le letšatši kamoo o ka kgonago ka gona. Go thwe go dula o swaregile ka mediro ya letšatši le letšatši ke mokgwa o mokaone wa go lebeletšana ka katlego le bohloko bja go hwelwa. Go Dihlatse tša Jehofa, batswadi ba bantši ba hweditše gore go dula ba swaregile ka mediro ya letšatši le letšatši yeo e sepedišanago le borapedi bja bona, yeo e akaretšago thuto ya ka mehla ya lapa ya Beibele le go ya dibokeng tša Bokriste, go ka thuša gore lapa le tsepame gaešita le go le matlafatša.—Doiteronomio 6:4-9; Baheberu 10:24, 25.

Go fihlela Jehofa Modimo a fediša bolwetši le lehu, bana ba tla swanela ke go lebeletšana le kotsi ya lehu nako le nako. (Jesaya 25:8) Lega go le bjalo, ge e ba bana ba newa kgonthišetšo le thekgo e swanetšego, ba ka thušwa gore ba lebeletšane ka katlego le bohloko bja go hwelwa ke moratiwa.

[Mongwalo wa tlase]

[Ntlhakgolo go letlakala 19]

Kgothaletša ngwana wa gago go botšiša dipotšišo le go bolela ka dilo tšeo di mo tshwenyago

[Seswantšho go letlakala 20]

Tšwelang pele ka mediro ya lena ya letšatši le letšatši yeo e akaretšago thuto ya lapa ya Beibele