Hwetša Ditšhegofatšo ka Kgoši ya Modimo Yeo e Hlahlwago ke Moya!
“Moya wa Jehofa o tla dula go yena.”—JES. 11:2.
1. Ba bangwe ba bontšhitše bjang gore ba tshwenyega ka mathata a lefase?
“NA BATHO ba ka phela nywaga e mengwe e 100 lefaseng le leo le hlakahlakanego go tša dipolitiki, tša leago le tša tikologo?” Se ke seo rathutamahlale wa dinaledi e lego Stephen Hawking a se botšišitšego ka 2006. Sehlogo se se lego ka go makasine wa New Statesman se itše: “Ga se ra kgona go fediša bodiidi goba go hloma khutšo ya lefase. Ka mo go fapanego, go bonagala re sa fihlelela selo. Ga se gore re be re phuthile matsogo. Re lekile dilo ka moka go tloga go bokomanisi go fihla boemong bja go rekišetšana dilo ka bolokologi re sa direlwe phetho ke mmušo; go tloga Kgweranong ya Ditšhaba go fihla boemong bja go kgoboketša dibetša tša nuclear ka morero wa go thibela ntwa. Re lwele ‘dintwa tše dintši ka ge re be re nyaka go fediša ntwa’ e bile re be re nagana gore re kgona go fediša ntwa.”
2. Kgauswinyane, Jehofa o tla bontšha bjang gore o na le matla a go buša lefase?
2 Bahlanka ba Jehofa ga ba makatšwe ke mantšu a bjalo. Beibele e re botša gore batho ga se ba bopelwa gore ba ipuše. (Jer. 10:23) Ke Jehofa feela yo a swanelwago ke go ba Mmuši wa rena. Ka baka leo, o na le matla a go re beela ditekanyetšo, go re botša gore morero wa bophelo bja rena e swanetše go ba ofe le go re hlahla gore re kgone go phetha morero woo. Go oketša moo, kgauswinyane o tla tšea kgato go fediša maiteko a batho a foloditšego a go leka go ipuša. Ka nako e swanago, o tla fediša bohle bao go gana ga bona melao ya gagwe go dirago gore batho ba dule ba le bokgobeng bja sebe, bja go se phethagale le bja “modimo wa lefase le,” Sathane Diabolo.—2 Bakor. 4:4.
3. Jesaya o boletše’ng e sa le pele ka Mesia?
3 Lefaseng le lefsa la Paradeise, batho ba tla ba ka tlase ga pušo ya Jehofa e lerato Mmušong wa Mesia. (Dan. 7:13, 14) Ge Jesaya a bolela ka Kgoši ya wona, o porofetile ka gore: “Go tlo tšwa thabe kutung ya Jese; medung ya gagwe go tla hloga lehlogedi le le enywago. Moya wa Jehofa o tla dula go yena, e lego moya wa bohlale le wa kwešišo, moya wa keletšo le wa matla, moya wa tsebo le wa go boifa Jehofa.” (Jes. 11:1, 2) Moya o mokgethwa wa Modimo o dirile bjang gore “thabe kutung ya Jese,” e lego Jesu Kriste—a swanelege go buša batho? Pušo ya gagwe e tla tliša ditšhegofatšo dife? Gona re swanetše go dira’ng gore re hwetše ditšhegofatšo tšeo?
Modimo o Dira Gore a Swanelege go Buša
4-6. Ke tsebo efe e bohlokwa yeo e tlago go thuša Jesu gore a bontšhe bohlale le lešoko ge a hlankela e le Kgoši, Moperisita yo a Phagamego le Moahlodi?
4 Jehofa o nyaka gore balata ba gagwe ba phethagale ka tlase ga tlhahlo ya yo ruri e lego Kgoši e bohlale le e nago le lešoko, Moperisita yo a Phagamego le Moahlodi. Ke ka baka leo Modimo a kgethilego Jesu Kriste, yo A mo thušitšego ka moya wa gagwe o mokgethwa gore a swanelege go rwala maikarabelo a a bohlokwa kudu. Ela hloko a mangwe a mabaka ao a tla dirago gore Jesu a kgone go phethagatša gabotse dikabelo tšeo Modimo a mo neilego tšona.
5 Jesu o tseba Modimo gabotse. Morwa yo a tswetšwego a nnoši o tsebile Tate ka nako e telele go feta motho le ge e le ofe, mohlomongwe ka nywaga e dibilione tše dintši. Ka nako yeo, Jesu o tsebile Jehofa ka botlalo moo ruri a bego a ka hlaloswa e le “seswantšho sa Modimo yo a sa bonagalego.” (Bakol. 1:15) Jesu ka boyena o itše: “Yo a bonego nna o bone le Tate.”—Joh. 14:9.
6 Ge Jesu a be a dutše le Jehofa, o bile le tsebo e tseneletšego kudu ka tlholo, go akaretša le batho. Bakolose 1:16, 17 e re: “Dilo tše dingwe ka moka tše di lego magodimong le lefaseng di hlodilwe ka yena [Morwa wa Modimo], dilo tše di bonagalago le dilo tše di sa bonagalego . . . Gape ke wa pele ga dilo tše dingwe ka moka gomme dilo tše dingwe ka moka di dirilwe gore di be gona ka yena.” Nagana feela! Jesu o tšere karolo dibopegong ka moka tša tlholo e le “mošomi [wa Modimo] yo a nago le bokgoni.” Ka baka leo, o kwešiša selo se sengwe le se sengwe legohleng, go tloga go se senyenyane kudu go fihla bjokong bjo bo makatšago bja motho. Ee, ruri Kriste ke yo bohlale kudu!—Die. 8:12, 22, 30, 31.
7, 8. Moya wa Modimo o thušitše Jesu bjang bodireding bja gagwe?
7 Jesu o be a tloditšwe ka moya o mokgethwa wa Modimo. Jesu o itše: “Moya wa Jehofa o go nna, gobane o ntloleditše go tsebiša badiidi ditaba tše dibotse; o nthomile gore ke bolele tokologo go mathopša le go bolela gore difofu di bone gape, go lokolla ba ba gateletšwego, go bolela ngwaga wo o amogelegago wa Jehofa.” (Luka 4:18, 19) Ge Jesu a be a kolobetšwa, go molaleng gore moya o mokgethwa o ile wa mo gopotša dilo tšeo a ithutilego tšona pele e eba motho wa nama, go akaretša le seo Modimo a bego a nyaka gore a se phethe nakong ya bodiredi bja gagwe bja lefaseng e le Mesia.—Bala Jesaya 42:1; Luka 3:21, 22; Johane 12:50.
8 Ka ge Jesu a be a matlafatšwa ke moya o mokgethwa e bile a phethagetše mmeleng le monaganong, e be e se feela motho yo a phagamego kudu yo a kilego a phela mo lefaseng eupša gape e be e le Morutiši yo mogolo. Ge e le gabotse, batheetši ba gagwe ba ile ba “tlabja kudu ke tsela ya gagwe ya go ruta.” (Mat. 7:28) Jesu o be a kgona go bolela gore mathata a batho a bakwa ke sebe, go se phethagale le go hlokomologa dilo tša moya. E bile o be a kgona go bona seo ruri se lego ka dipelong tša batho gomme a ba swara gabotse.—Mat. 9:4; Joh. 1:47.
9. Go naganišiša ka bodiredi bja Jesu bja lefaseng go godiša bjang kgodišego ya gago go yena e le Mmuši?
9 Jesu o phetše e le motho wa nama. Phihlelo ya gagwe e le motho wa nama le go phela le batho ba ba sa phethagalago di dirile gore Jesu a swanelege go ba Kgoši. Moapostola Paulo o ngwadile gore: “[Jesu] o ile a tlamega gore a swane le ‘bana babo’ ka ditsela tšohle gore e be moperisita yo a phagamego yo a gaugelago le yo a botegago dilong tšeo di lego mabapi le Modimo, e le gore a nee sehlabelo sa poelanyo bakeng sa dibe tša batho. Ka ge yena a ile a tlaišega ge a be a lekwa, o kgona go thuša bao ba lekwago.” (Baheb. 2:17, 18) Ka ge Jesu a ile a “lekwa,” o kgona go kwela bao ba lekwago bohloko. Kwelobohloko ya Jesu e ile ya bonagala gabotse nakong ya bodiredi bja gagwe bja lefaseng. Balwetši, digole, bao ba nyamilego—gaešita le bana—ba be ba mmatamela ka bolokologi. (Mar. 5:22-24, 38-42; 10:14-16) Ba boleta le bao ba swerwego ke tlala ya moya le bona ba be ba kgona go mmatamela. Ka lehlakoreng le lengwe, baikgogomoši, baikgantšhi le bao ba ‘se nago lerato la Modimo’ ba ile ba mo latola, ba mo hloya le go mo ganetša.—Joh. 5:40-42; 11:47-53.
10. Ke tsela efe e kgolo yeo Jesu a bontšhitšego ka yona gore o a re rata?
10 Jesu o re hwetše. Mohlomongwe selo se segolo seo se dirago gore Jesu a swanelege go ba Mmuši ke gore o re hwetše ka go rata. (Bala Psalme 40:6-10.) Kriste o itše: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Joh. 15:13) Ee, ka go se swane le babuši ba ba sa phethagalago ba batho, bao ba phelago maphelo a manobonobo ka ditshenyagalelo tša bahlanka ba bona, Jesu yena o hwetše batho.—Mat. 20:28.
O Matlafaleditšwe go Dira Topollo
11. Ke ka baka la’ng re ka holofela Jesu ka mo go feletšego bjalo ka Molopolodi wa rena?
11 Ruri ke mo go swanetšego gore Jesu bjalo ka Moperisita yo a Phagamego e be yena a etelelago pele go re bontšheng mehola ya sehlabelo sa gagwe sa topollo! Ge e le gabotse, nakong ya bodiredi bja gagwe bja lefaseng, Jesu o ile a bontšha se a tlago go re direla sona bjalo ka Molopolodi wa rena nakong ya Pušo ya gagwe ya Nywaga e Sekete, yeo re tla phelago go yona ge feela re botega. O fodišitše balwetši le digole, a tsoša bahu, a fepa mašaba a ba a laola le matla a legohle. (Mat. 8:26; 14:14-21; Luka 7:14, 15) Go oketša moo, lebaka la gagwe la go dira se e be e se gore batho ba mo rete ka gore o na le matla, eupša e be e le go bontšha gore o na le kwelobohloko le lerato. O ile a botša molephera yo a bego a mo kgopela gore a mo fodiše gore: “Ke a rata.” (Mar. 1:40, 41) Jesu o tla bontšha kwelobohloko e bjalo Pušong ya gagwe ya Nywaga e Sekete—ya lefase ka bophara.
12. Jesaya 11:9 e tla phethagatšwa bjang?
12 Kriste le babušigotee le yena ba tla tšwela pele ka lenaneo la thuto ya moya la lefase ka bophara leo le thomilego nywageng e ka bago e 2 000 e fetilego. Ka baka leo, mantšu ao a lego go Jesaya 11:9 a tla phethagala ge a re: “Lefase le tla tlala tsebo ya Jehofa go etša ge meetse a khurumeditše lewatle.” Go molaleng gore thuto yeo ya Modimo e tla akaretša le ditaelo tša kamoo lefase le diphedi tše dintši tše di lego go lona di swanetšego go hlokomelwa ka gona, bjalo ka ge mathomong Adama a be a laetšwe go dira bjalo. Ge nywaga e 1 000 e fela, morero wa Modimo wa mathomong wo o begilwego go Genesi 1:28 o tla ba o phethagaditšwe gomme sehlabelo sa topollo se tla ba se dirišitšwe ka botlalo.
O Matlafaleditšwe go Buša
13. Jesu o bontšhitše bjang gore o rata toko?
13 Kriste “ke Yena a laetšwego ke Modimo gore e be moahlodi wa ba ba phelago le ba ba hwilego.” (Dit. 10:42) Ka gona, ke mo go kgothatšago go tseba gore Jesu ga a hwe le go tseba gore toko le potego di bofeletšwe ka go tia mathekeng a gagwe bjalo ka lepanta! (Jes. 11:5) O ile a bontšha gore o hloile megabaru, boikaketši le bobe gomme o ile a sola bao ba bego ba se na taba ge ba bona ba bangwe ba tlaišega. (Mat. 23:1-8, 25-28; Mar. 3:5) Go feta moo, Jesu o ile a bontšha gore o be a sa forwe ke ponagalo ya motho ya ka ntle “gobane yena ka noši o be a tseba seo se lego mothong.”—Joh. 2:25.
14. Mo nakong ye, Jesu o bontšha bjang gore o rata toko le toka, gona ke’ng seo re swanetšego go ipotšiša sona?
14 Jesu o sa dutše a bontšha gore o rata toko le toka ka go okamela lesolo le legolo la boboledi le la go ruta leo le sa kago la ba gona lefaseng. Ga go na motho, pušo ya motho le moya o kgopo wo o ka thibelago gore modiro wo o phethagatšwe ka tsela yeo e tla kgotsofatšago Modimo ka botlalo. Ka gona, re ka kgodišega ka botlalo gore ka morago ga Haramagedone, go tla ba go aparetše toka ya Modimo. (Bala Jesaya 11:4; Mateo 16:27.) Ipotšiše gore: ‘Na batho ba kua tšhemong ke ba lebelela ka tsela yeo Jesu a bego a ba lebelela ka yona? Na ke direla Jehofa seo nka se kgonago le ge maemo a ka a tša maphelo goba a motho ka noši a mpalediša go dira mo gontši?’
15. Re tla thušwa ke go gopola’ng gore re nee Modimo seo re ka se kgonago?
15 Go dula re gopola gore Modimo ke yena a re neilego modiro wa boboledi go tla re thuša gore re mo hlankele ka moya ka moka. Ke yena a laetšego gore o dirwe; o laola modiro wo ka Morwa wa gagwe; gomme bao ba tšeago karolo go wona o ba matlafatša ka moya o mokgethwa. Na o tšeela godimo tokelo ye o nago le yona ya go ba modirišani wa Modimo gotee le Morwa wa gagwe yo a hlahlwago ke moya? Na go na le motho yo mongwe ntle le Jehofa yo a ka kgonago go tutuetša batho ba fetago dimilione tše šupago, bao bontši bja bona ba lebelelwago e le “batho ba sa rutegago le ba tlwaelegilego,” go boledišana le batho ka molaetša wa Mmušo dinageng tše 236?—Dit. 4:13.
Ikgantšhe ka Kriste
16. Ke’ng seo Genesi 22:18 e se bolelago ka ditšhegofatšo tša Modimo?
16 Jehofa o boditše Aborahama gore: “Ditšhaba ka moka tša lefase di tla šegofatšwa ka peu ya gago ka ge o kwele lentšu la ka.” (Gen. 22:18) Se se bolela gore bao ba bontšhago tebogo ba ka fagahlela ditšhegofatšong tšeo Peu ya Mesia e tlago go di tliša. E bile lehono ba mo hlankela ba naganne ka ditšhegofatšo tšeo.
17, 18. Ke kholofetšo efe ya Jehofa yeo e lego go Doiteronomio 28:2, gona seo se bolela’ng go rena?
17 Modimo o kile a botša peu ya kgonthe ya Aborahama e lego setšhaba sa Isiraele gore: “Ditšhegofatšo ka moka tše di latelago [tše di boletšwego kgweranong ya Molao] di tlo go tlela tša ba tša go fihlelela, ka gobane o theetša lentšu la Jehofa Modimo wa gago.” (Doit. 28:2) Go ka ba bjalo le ka bahlanka ba Modimo lehono. Ge e ba o nyaka gore Jehofa a go šegofatše, dula “o theetša” lentšu la gagwe. Ke moka ‘o tlo tlelwa ke ditšhegofatšo tša gagwe tša ba tša go fihlelela.’ Eupša go “theetša” go akaretša’ng?
18 Ge e le gabotse go akaretša go tšeela godimo seo se bolelwago ka Lentšung la Modimo le go tšeela godimo dijo tša moya tšeo a re neago tšona. (Mat. 24:45) Le gona, go akaretša go kwa Modimo le Morwa wa gagwe. Jesu o itše: “Ga se yo mongwe le yo mongwe yo a rego go nna: ‘Morena, Morena,’ a tlago go tsena Mmušong wa magodimo, eupša go tla tsena yo a dirago thato ya Tate yo a lego magodimong.” (Mat. 7:21) E bile go kwa Modimo go bolela go ikokobeletša ka go rata thulaganyong yeo a e beilego ya bagolo bao ba kgethilwego ka phuthegong ya Bokriste, bao e lego “dimpho tšeo e lego banna.”—Baef. 4:8.
19. Ke’ng seo se tlago go dira gore re šegofatšwe?
19 Tše dingwe tša “dimpho tšeo e lego banna” di akaretša ditho tša Sehlopha se Bušago, seo se emelago phuthego ya Bokriste ka moka. (Dit. 15:2, 6) Ge e le gabotse, tsela yeo re tlago go ahlolwa ka yona masetlapelong a magolo ao a tlago e ithekgile kudu ka gore re lebelela bana babo Kriste ba moya ka tsela efe. (Mat. 25:34-40) Ka gona, tsela e nngwe ya go hwetša ditšhegofatšo ke ka go thekga ka potego batlotšwa ba Modimo.
20. (a) Boikarabelo bjo bohlokwa bja “dimpho tšeo e lego banna” ke bofe? (b) Re ka bontšha bjang gore re tšeela godimo bana ba babo rena?
20 “Dimpho tšeo e lego banna” di akaretša Komiti ya Lekala, balebeledi ba basepedi le bagolo ba phuthego—bao ka moka ba kgethilwego ka moya o mokgethwa. (Dit. 20:28) Bana babo rena ba ba ikarabela kudu ka go aga batho ba Modimo “go fihla ge ka moka [ba] fihlelela botee bja tumelo le bja tsebo e nepagetšego ya Morwa wa Modimo, go ba monna yo a ipheditšego, go fihlelela tekanyo ya boemo yeo e lego ya botlalo bja Kriste.” (Baef. 4:13) Ke therešo gore le bona ga se ba phethagala go swana le rena. Lega go le bjalo, re tla holega kudu ge re ba dumelela gore ba re diše ka lerato.—Baheb. 13:7, 17.
21. Ke ka baka la’ng go akgofile gore re kwe Morwa wa Modimo?
21 Kgauswinyane, Kriste o tla tšea kgato kgahlanong le tshepedišo ye e kgopo ya Sathane. Ge seo se direga, maphelo a rena a tla ba a ithekgile ka Jesu, ka ge a laetšwe ke Modimo gore a hlahle “lešaba le legolo” leo go boletšwego ka lona e sa le pele gore le ye “didibeng tša meetse a bophelo.” (Kut. 7:9, 16, 17) Ka gona, ga bjale anke re direng sohle seo re ka se kgonago gore re ikokobetše ka go rata le go leboga Kgoši ya Jehofa yeo e hlahlwago ke moya.
O Ithutile’ng go . . .
• Ditiro 10:42?
• Genesi 22:18?
[Seswantšho go letlakala 17]
Kwelobohloko ya Jesu e bonagetše gabotse ge a be a tsoša morwedi wa Jairo
[Diswantšho go letlakala 18]
Jesu Kriste o okametše lesolo le legolo kudu la boboledi leo le sa kago la ba gona