Batamela Kgauswi le Modimo
O Ile “a Kgopela go Gaugelwa ke Jehofa”
MONNA yo a tlogetšego go phela ka ditekanyetšo tša Modimo tšeo a ithutilego tšona go tloga bjaneng o re: “Ke be ke ikwa ke sa swanelege.” Ge a be a thoma go gata megato ya go sokologa, o be a bona eka Modimo o be a ka se tsoge a mo lebaletše. Eupša modiradibe yo yoo a itsholago o ile a hwetša kholofelo pegong ya Beibele ya mabapi le Manase, yeo e begilwego go 2 Dikoronika 33:1-17. Ge e ba o kile wa ikwa o sa swanelege ka baka la dibe tša nakong e fetilego, le wena o ka homotšwa ke mohlala wa Manase.
Manase o be a godišeditšwe lapeng le le boifago Modimo. Tatagwe, Hesekia, e be e le yo mongwe wa dikgoši tše di hlomphegago tša Juda. Manase o ile a belegwa mo e ka bago nywaga e meraro ka morago ga gore nywaga ya bophelo bja tatagwe e oketšwe ka mohlolo ke Modimo. (2 Dikgoši 20:1-11) Ga go pelaelo gore Hesekia o be a bona morwa wa gagwe e le mpho e theilwego kgaugelong ya Modimo gomme a leka go mo ruta gore a rate borapedi bjo bo sekilego. Eupša bana ba batswadi ba boifago Modimo ga se ka mehla ba latelago mohlala wa batswadi ba bona. Go bile bjalo ka Manase.
Manase o be a se na nywaga e fetago e 12 ge tatagwe a ehwa. Ka manyami, Manase “o ile a dira tše mpe mahlong a Jehofa.” (Ditemana 1, 2) Na kgoši e nyenyane e be e hueditšwe ke baeletši bao ba bego ba se na taba le borapedi bja therešo? Beibele ga e bolele selo. Seo e re botšago sona ke gore Manase o ile a swara tsela e nyatšegago kudu ya go rapela diswantšho le go ba sehlogo. O ile a aga dialetare tša medimo ya maaka, a dira dihlabelo ka barwa ba gagwe, a dirišana le meoya gomme a bea seswantšho se se betlilwego ka tempeleng ya Jehofa kua Jerusalema. Manase yo hlogothata o ile a gana go kwa ditemošo tše dintši tše tšwago go Jehofa, Modimo yoo ka mohlolo a dirilego gore a belegwe.—Ditemana 3-10.
Mafelelong, Jehofa o ile a dumelela gore Manase a išwe Babilona a tlemilwe maoto. A le moo bothopša, Manase o ile a ba le sebaka sa go naganišiša ka tsela ya gagwe ya bophelo. Na bjale o ile a bona gore diswantšho tša gagwe tše se nago matla le tše sa phelego di paletšwe ke go mo šireletša? Na o ile a nagana ka dilo tšeo tatagwe yo a boifago Modimo a bego a mo rutile tšona ge e be e sa le ngwana? Go sa šetšwe seo se diregilego, boemo bja Manase bja kgopolo bo ile bja fetoga. Pego e re: “[O ile] a kgopela go gaugelwa ke Jehofa Modimo wa gagwe gomme a ikokobeletša Modimo . . . kudu. A rapela Modimo.”a (Ditemana 12, 13) Eupša na ruri Modimo o be a ka lebalela monna yo a dirilego dibe tše dikgolo gakaalo?
Jehofa o ile a kgongwa ke boitsholo bja kgonthe bja Manase. Modimo o ile a kwa ditopo tša gagwe tša go bontšhwa kgaugelo “ke moka a mmušetša bogošing bja gagwe Jerusalema.” (Temana 13) Ge a hlatsela boitsholo bja gagwe, Manase o ile a dira sohle seo a ka se kgonago go lokiša diphošo tša gagwe, a fediša borapedi bja diswantšho nageng ya gagwe le go kgothaletša batho ba gagwe gore ba “hlankele Jehofa.”—Ditemana 15-17.
Ge e ba o ikwa o sa swanelwe ke tebalelo ya Jehofa ka baka la dibe tša gago tša nakong e fetilego, kgothatšwa ke mohlala wa Manase. Pego ye ke karolo ya Lentšu la Modimo le le buduletšwego. (Baroma 15:4) Go molaleng gore Jehofa o nyaka re tseba gore “o ikemišeditše go lebalela.” (Psalme 86:5) Seo a nago le taba le sona ke boemo bja pelo e sego sebe. Modiradibe yo a rapelago ka pelo e itsholago, a tlogelago tsela ya gagwe e fošagetšego gomme a dira maiteko a tiilego a go dira se se nepagetšego a ka ‘nolofatša sefahlego sa Jehofa,’ go fo swana le Manase.—Jesaya 1:18; 55:6, 7.
Mmalo wa Beibele o šišintšwego bakeng sa January:
[Mongwalo wa tlase]
a Young’s Literal Translation mo e balega ka gore: “O ile a . . . nolofatša sefahlego sa Jehofa Modimo wa gagwe.”