TABA YA LETLAKALA LA KA NTLE: SEO RE ITHUTAGO SONA GO MOSHE
Moshe e be e le Mang?
O nagana’ng ge o ekwa leina Moshe? Na o nagana ka . . .
ngwana yoo mmagwe a ilego a mo uta ka serotong Nokeng ya Nile?
ngwana yoo morwedi wa Farao a mo godišeditšego matsakeng a Egipita—eupša a sa ka a lebala gore e be e le Moisiraele?
monna yoo a phetšego nywaga e 40 e le modiši nageng ya Midiane?
monna yoo a ilego a boledišana le Jehofaa pele ga sehlare seo se tukago mollo?
monna yoo a ilego a ema pele ga kgoši ya Egipita, gomme ka sebete a e kgopela gore e lokolle Baisiraele bokgobeng?
monna yoo, ka taelo ya Modimo, a ilego a tsebatša Dikotlo tše Lesome tšeo di ilego tša wela Egipita ge kgoši ya yona e be e nyatša Modimo wa therešo?
monna yoo a ilego a etelela Baisiraele pele khudugong e kgolo ya go tšwa Egipita?
monna yoo a ilego a dirišwa ge go be go arolwa Lewatle le Lehwibidu ka bogare?
monna yoo a ilego a nea Baisiraele Melao e Lesome e tšwago go Modimo?
MOSHE o dirile dilo tšeo ka moka gotee le tše dingwe. Ga go makatše ge monna yo yoo a botegago a hlompšha kudu ke Bakriste, Bajuda gotee le Mamoseleme!
Ka ntle le pelaelo, Moshe e be e le moporofeta yo a dirilego dilo “tše di makatšago.” (Doiteronomio 34:10-12) O ile a dumelela Modimo a mo diriša ka tsela e matla. Lega go le bjalo, Moshe e be e le motho yo a tlwaelegilego. Go fo swana le moporofeta Eliya, yoo a ilego a tšwelela kgauswi le Moshe ponong nakong ya bodiredi bja Jesu bja lefaseng, Moshe e be e le motho “yo a nago le maikwelo a swanago le a rena.” (Jakobo 5:17; Mateo 17:1-9) Moshe o ile a lebeletšana le a mantši a mathata ao re lebeletšanago le ona, gomme o ile a lebeletšana le ona ka katlego.
Na o ka rata go tseba gore o dirile seo bjang? Ela hloko tše tharo tša dika tše dibotse tšeo Moshe a ilego a di bonagatša gotee le seo re ka ithutago sona mohlaleng wa gagwe.
a Jehofa ke leina la Modimo bjalo ka ge le utolotšwe ka Beibeleng.