DIPOTŠIŠO TŠA BEIBELE DI A ARABJA

Na go a kgonega go kwešiša Beibele?

Beibele ke Lentšu la Modimo. E swana le lengwalo leo le tšwago go tate yo lerato. (2 Timotheo 3:16) Ka Beibeleng, Modimo o hlalosa kamoo re ka mo kgahlišago ka gona, lebaka leo a dumelelago bobe, le seo a tlago go se direla batho nakong e tlago. Eupša baruti ba bodumedi ba kgopamišitše thuto ya Beibele; ka baka leo, batho ba nagana gore ba ka se tsoge ba kwešišitše Beibele.—Ditiro 20:29, 30.

Jehofa Modimo o nyaka re tseba therešo ka yena. Ka baka leo, o re neile puku yeo re ka kgonago go e kwešiša.—Bala 1 Timotheo 2:3, 4.

O ka kwešiša Beibele bjang?

Go tlaleletša tabeng ya go re nea Beibele, Jehofa o re nea thušo ya go e kwešiša. O ile a roma Jesu gore a tlo re ruta. (Luka 4:16-21) Jesu o thušitše batheetši ba gagwe go kwešiša Mangwalo, a hlalosa ditemana ka go latelana.—Bala Luka 24:27, 32, 45.

Jesu o ile a hloma phuthego ya Bokriste e le gore modiro woo a o thomilego o tšwele pele. (Mateo 28:19, 20) Lehono, balatedi ba Jesu ba kgonthe ba thuša batho go kwešiša seo Beibele e se rutago ka Modimo. Ge e ba o ka rata go kwešiša Beibele, Dihlatse tša Jehofa di tla thabela go go thuša.—Bala Ditiro 8:30, 31.