E-Ba yo a Fišegago go Phatlalatšeng Molaetša wa Mmušo
1 Jehofa ke Modimo wa mediro e mebotse, gomme o fišegela go e phetha. Se sengwe le se sengwe seo a se dirago o se direla go hola bao ba mo direlago. Jesu o beile mohlala o mobotse ka go ekiša phišego ya Tatagwe. Ka nako e nngwe, go fišegela ngwako wa Jehofa go ile gwa mo tutuetša gore a tloše ka tempeleng bao ba bego ba e fetoša ngwako wa kgwebo. (Joh. 2:14-17) Le rena re swanetše go bontšha phišego tirelong ya rena go Jehofa Modimo ge e ba re rata go hlaolwa re le batho ba “dirôtô medirong e botse.”—Tito 2:14.
2 Mediro e mebotse ya Bakriste e hola ba bangwe. Selo se se holago kudu seo re ka se direlago motho o mongwe ke go mo thuša gore a tsebe le go direla Jehofa. (Joh. 17:3) Re neela thušo e bjalo ka go dira modiro wa boboledi bja Mmušo le wa go dira barutiwa ka phišego.
3 Phišego ke eng? Phišego ke mafolofolo. Phišego ya Bokriste e tšwa kganyogong ya kgonthe ya go dira se se lokilego le se se swanetšego. Lentšu la Segerika bakeng sa “phišego” le bolela “go bela.” Bjalo ka badiredi ba Modimo, re swanetše go bontšha seka se ge re dutše re phatlalatša molaetša wa Mmušo. Na re a fišega bodireding? Na re dira sohle seo re ka se kgonago go thuša ba bangwe go ithuta ka merero ya Jehofa?
BONTŠHA PHIŠEGO GE O SEPEDIŠA DIPUKWANA
4 Kgweding ya August, re tla buša re e-ba le tokelo ya go sepediša pukwana lege e le efe ya matlakala a 32 ka ntle le ya Sekolo le Dihlatse tša Jehofa. Re ka sepediša Thabela Bophelo Lefaseng ka mo go sa Felego!, ‘Bonang, Dilo ka Moka ke di Dira tše Mpsha,’ Na o Swanetše go Dumela Boraro Botee, Leina la Modimo Leo le Tlago go ba Gona ka mo go sa Felego, goba Mmušo Woo o Tlago go Tliša Paradeise. Lokišetša go sepediša pukwana lege e le efe yeo e bonagalago e le e swanetšego kudu bakeng sa tšhemo le motho yo o kopanago le yena mojakong.
5 Gore re fišege go phatlalatšeng molaetša wa Mmušo, re swanetše go lokišeletša gabotse. Na re tlwaelane le Sehlogo sa Poledišano sa gona bjale? Re ka gokaganya bjang Sehlogo sa Poledišano le pukwana yeo re e sepedišago? Ke dintlha dife tše di kgethegilego ka pukwaneng tšeo re ka di bolelago? Ge e ba re ipha nako ya go tlwaelana le dipukwana tše tše hlano gomme re aga phišego ya go di fišegela megopolong ya rena ka noši, gona re tla ba bao ba hlametšwego go di neela go bao ba lego tšhemong ya rena ka phišego.
DIKELETŠO MABAPI LE GO SEPEDIŠA DIPUKWANA
6 Ka morago ga go itsebiša, mo gongwe o ka re: “Na o kile wa ipotšiša ge e ba Modimo a kgomega ka bokgopo bjo bo lego lefaseng lehono? [Dumelela karabo] Beibele e hlalosa gore kapejana batho ba kgopo ba tla fedišwa. [Bala Psalme 92:7.] Ka ge ditaba di eme bjalo, re ka retologela go mang bakeng sa tlhahlo le tšhireletšo ya kgonthe? [Bala Psalme 145:20.] Ka gona tsela feela yeo re ka phološwago ka yona ke ka go ba le tswalano le Mmopi wa rena, e lego Jehofa Modimo. Re swanetše go naganišiša ka ditšhegofatšo tšeo a di holofetšago batho bohle ba ba kwago.” Bjale o ka phetla go seswantšho 49 pukwaneng ya Bophelo Lefaseng gomme o bale mantšu a hlalosago seswantšho, o gatelela ditšhegofatšo tše di bontšhitšwego. Goba phetla go letlakala 29 pukwaneng ya Mmušo, gomme o ahla-ahle ditšhegofatšo tše di hlalositšwego moo. Ba bangwe ba ka rata go diriša dirapa 49 le 50 ka pukwaneng ya ‘Bonang!’ go hlalosa seo Mmušo wa Modimo o tlago go se direla batho.
7 Ka ge ye e le mehla e thata, molaetša wo re o rwelego o akgofile. Go nyakega gore re fišege go phatlaletšeng molaetša wa Mmušo, re kgothaletša ba bangwe go tseba Modimo le Lentšu la gagwe. Ka go phatlalatša tsebo ye e neago bophelo ka mafolofolo, re nea bohlatse bja boineelo bja rena go Modimo le lerato la rena go Jehofa. Ipotšiše: ‘Na ke fišegela mediro e mebotse? Na go thekga ga-ka modiro wa boboledi go ka hlaloswa e le mo go dirwago ka mafolofolo le ka moya ka moka?’ Dikarabo tša rena di tla re botša mo gontši ka boemo bja phišego ya rena. Ge re dutše re e-ba le karolo ka mo go oketšegilego go phatlalatšeng molaetša wa Mmušo, gona ke moo phišego ya rena e tlago go gola. Batho ba bangwe ba tla bona gore ruri re batho bao ba fišegelago mediro e mebotse.