Mokgwa O Holago Wa Go Lokišeletša Tirelo Ya Tšhemo

1 Na ka dinako tše dingwe o dika-dika go kopanela dibopegong tše dingwe tša tirelo ya tšhemo ka baka la go se tsebe seo o tlago go se bolela? Ge e ba go le bjalo, gona re kgodišegile gore o tla leboga mokgwa wo o dirišitšwego ka go Tirelo ya Rena ya Mmušo.

2 Go thoma ka tokollo ye, Tirelo ya Rena ya Mmušo e tla nea ditšhišinyo tše dintši tše di fapa-fapanego tša go neela molaetša wa Mmušo, e ka ba ka ntlo le ntlo, maetong a go boela goba thutong ya Beibele. Tšona di tla tutuetša tsela ya gago ya go nagana mabapi le dipolelo tšeo o ka ratago go di diriša bodireding. Ge o lokišeletša bodiredi, kgetha thero yeo e swanelago gabotse tšhemong ya gabo lena. Se se latelago, dira phetho ya ge e ba o tla diriša mantšu ao a šišintšwego sehlogong goba o tla beakanya mantšu gore a swanele maemo a lefelong la geno goba semelo sa gago ka noši. Thero ya gago e ka kwala e le poledišano ge o e bolela ka mokgwa wa tlhago ka mantšu a gago ka noši. Na o ka rata go katološa bodiredi bja gago ka tsela e nngwe, mohlomongwe ka go kopanela sebopegong se itšego ka lekga la mathomo? Mohlomongwe ditšhišinyo tše di bolelago ditaba ka botlalo tšeo di neilwego e ka ba e le sona seo o se nyakago bakeng sa go go thuša gore o thome.

3 Ge e ba o swara se sengwe sa diboka tša tirelo ya tšhemo tša phuthego, o swanetše go tlwaela taba yeo e ngwadilwego ka go Tirelo ya Rena ya Mmušo. Ithute kopi ya gago gabotse, gomme o lebiše tlhokomelo go ditšhišinyo tšeo go bonalago di tla atlega kudu lefelong leo.

4 Ka moka ga rena re thabela dilo tšeo re di dirago gabotse. Re holofela gore mokgwa wo o šomago o tla thuša bagoeledi ba bafsa gotee le bao ba nago le phihlelo gore ba atlege le go thaba bodireding bja bona bja Mmušo.