Matseno A Go Dira Gore Beng Ba Dintlo Ba Theetše
1 Karolo ya bohlokwa kudu-kudu ya thero ya gago ya ntlo le ntlo ke eng? Ba bantši ba rena re tla dumela gore ke matseno. Ge e ba o sa atlege tabeng ya go tsoša kgahlego ya mong wa ntlo metsotswaneng e 30 ya mathomo goba ka godingwana ga moo, go bonala a tla kgaotša poledišano.
2 Ke mabaka afe ao o swanetšego go a naganela ge o lokišetša matseno a atlegago? Seka-seka meetlo le dinyakwa tša batho bao go bonalago o tla kopana le bona. Na ke tlwaelo gore le segišane, goba go tla letelwa gore o tsene tabeng ka go lebanya ka bjako? Na go na le banyalani ba bantši ba bafsa tikologong ya lena? Ke dilo dife tšeo ba kgomegago ka tšona? Na batho ba tikologong ya lena ba tshwenyegile ka mathata ao batho ka kakaretšo ba lebanego le ona?
O ka dira gore ba theetše ka go bolela taba ya go swana le ye:
◼“Thobela. Leina la-ka ke ______ . Ke a tshwenyega ge ke bala ka batho bao ba bolawago ke tlala le go bolawa dintweng. Na le wena o a tshwenyega?” Dipotšišo tše dingwe tšeo di ka thušago go thoma poledišano ke tše: “Tharollo ya mathata a lefase ke’ng?” “Na o nagana gore go na le motho yo a ka fedišago mathata a lehono lefaseng?” “Anke re re mmuši o na le dika tšeo di swanago le tše tšeo di boletšwego go Jesaya 9:5, 6? [Bala o be o hlalose lengwalo.]”
3 Mašemong a mangwe, batho ba ka bontšha go kgomega kudu ka magae le malapa a bona go e na le go kgomega ka ditaba tša lefase ka moka tše bjalo ka khutšo ya lefase.
O ka tsoša kgahlego ka go botšiša gore:
◼“O nagana gore bophelo bja gago le bja lapa la gago bo tla ba bjang nywageng e lesome e tlago? Pono ya Beibele ka bokamoso ke e kgothatšago kudu ka gobane e bolela e sa le pele ka mmuši yo a tlago go buša ka melao e phethagetšego. Ela hloko seo Jesaya 9:5, 6 e se bolelago ka yena.”
4 Na o phela lefelong leo go lona bokebekwa le go lotega e lego ditaba tšeo go bolelwago ka tšona? Ba bangwe ba ka hlwaya tsebe ge o diriša matseno a mathomo ka tlase ga “Bokebekwa/Go Lotega” go letlakala 10 la puku ya Go Boledišana.
O ka re:
◼“Tama. Re boledišana le batho ka taba ya go lotega ga motho ka noši. Re dikologilwe ke bokebekwa bjo bontši, gomme bo kgoma maphelo a rena.” Ke moka potšišo ya go swana le e rego “Tharollong ke’ng?” goba “Na o nagana gore go na le motho yo a ka fedišago mathata a lefaseng?” goba “Go thwe’ng ge e ba mmuši a e-na le dika tša go swana le tše?” e ka thuša go thoma poledišano. Ka morago o ka bala Jesaya 9:5, 6.
5 Ka moka ga rena, go akaretša bafsa ba nywaga ya sekolo, re ka diriša dithero tše tše bonolo tša lengwalo le tee. Ge e le gabotse, o ka rata go leka e nngwe ge o neela dimakasine. Na ga o dumele gore thero e bjalo ya Mangwalo e ka ba tsela e botse ya go lemoga ge e ba motheetši wa rena a bontšha kgahlego ya kgonthe? Re kgodišegile gore ba bantši ba tla thabela go diriša dithero tše ka January ge ba sepediša dimakasine le ge ba sepediša mpho ya ka mehla ya kgwedi.
6 Ge e-ba o diriša ka ka mo go holago metsotswana e 30 ya mathomo ya ketelo ya gago, ka boitshwaro bja gago gotee le ka matseno a gago, go bonala o tla fihlelela pakane e bohlokwa ya go dira gore beng ba dintlo ba theetše.