Go Rola Puku ya phela ka mo go sa Felego ka Bokgoni
1 Jesu o be a e-na le bokgoni tirišong ya gagwe ya matseno. O be a tseba seo a tlago go se bolela gore a tsoše kgahlego. Lebakeng le lengwe o ile a thoma poledišano le mosadi wa Mosamaria ka go fo mo kgopela meetse a go nwa. Se kapejana se ile sa tanya tlhokomelo ya mosadi ka gobane ‘ba-Juda ba be ba sa kopane le ba-Samaria.’ Poledišano ye ba bilego le yona ka morago e ile ya thuša yena gotee le ba bangwe ba bantši gore e be badumedi. (Joh. 4:7-9, 41) Re ka ithuta go tšwa mohlaleng wa Jesu.
2 Ge o lokišetša go sepediša puku ya Phela ka mo go sa Felego, ipotšiše gore, ‘Ke dilo dife tšeo batho ba tšhemo ya rena ba tshwenyegilego ka tšona mo nakong ye? Ke eng seo se tlago go ipiletša go mofsa, motho yo mogolo, monna goba mosadi?’ O ka lokišeletša matseno a mmalwa gomme wa itokišeletša go diriša ao a bonalago a swanela boemo kudu.
3 Ka ge go senyega ga bophelo bja lapa go tshwenya ba bantši, mohlomongwe o ka re:
◼ “Dikgateletšo tša letšatši le letšatši tša bophelo di na le tutuetšo e kgolo kudu go malapa lehono. A ka hwetša kae thušo? [Dumelela karabo.] Beibele e ka ba thušo ya kgonthe go rena. [Bala 2 Timotheo 3:16, 17.] Mangwalo a nea ditlhahlo tše di holago tšeo di ka thušago go phološa malapa. Ela hloko seo se boletšwego go serapa 3 sa letlakala 238 la puku ye ya O ka Phela ka mo go sa Felego Paradeiseng mo Lefaseng.” Bala serapa 3 gomme o sepediše puku.
4 Ge e ba o diriša pego ya ditaba ya lefelong leo, mo gongwe o ka re:
◼ “Na o kwele pego ya ditaba mabapi le [bolela taba yeo batho ba lefelong ba tshwenyegilego ka yona]? O ile wa nagana’ng ka seo? [Dumelela karabo.] Se se dira gore o ipotšiše gore e be go direga’ng ka lefase le, na ga go bjalo? Beibele e porofetile dilo tše bjalo e le bohlatse bja gore re phela mehleng ya bofelo.” Ka morago, hlahloba tsebišo e lego ka pukung ya Phela ka mo go sa Felego, matlakala 150-3.
5 Ba bantši ba tshwenyegile ka bothata bja go gola ga bosenyi. O ka diriša matseno a pele ka tlase ga sehlogwana se se rego “Bokebekwa/Go lotega” go letlakala 10 la puku ya “Go Boledišana”:
◼ “Re boledišana le batho ka taba ya go lotega ga bona. Go na le bokebekwa bjo bontši bjo bo re dikologilego gomme bo kgoma maphelo a rena. O nagana gore go ka dirwa’ng gore batho bao ba swanago le nna le wena re ikwe re šireletšegile go sepela ditarateng bošego?” Mohlomongwe o ka bala Psalme 37:10, 11 gomme wa bontšha ka ditšhegofatšo tšeo Mmušo wa Modimo o tlago go di tliša, o diriša matlakala 156-8 a puku ya Phela ka mo go sa Felego.
6 Ge e ba o rata matseno a bonolo, mohlomongwe o ka diriša matseno a bobedi ka tlase ga sehlogwana se se rego, “Bokamoso/Tšhireletšego” go letlakala 10 la puku ya “Go Boledišana”:
◼ “Re kgothatša baagišani ba rena gore ba ele hloko bokamoso bjo bo kgahlišago bjoo Beibele e re huparetšego bjona. [Bala Kutollo 21:3, 4.] Na se se kwala e le se se kgahlišago go wena? [Dumelela karabo.] Kgaolo 19 ya puku ye e gatelela ditšhegofatšo tše dingwe tšeo batho ba ba kwago ba tlago go di hwetša ka tlase ga Mmušo wa Modimo.” Sepediša puku ya Phela ka mo go sa Felego ka moneelo wa R10,50.
7 Go lokišeletša matseno a atlegago go ka go thuša go fihlelela bao ba swerwego ke tlala ya go nyaka go loka.—Mat. 5:6.