Diboka Tša Tirelo Tša May
Beke e Thomago ka May 4
10 mets:Ditsebišo tša phuthego le Ditsebišo tšeo di tšwago go Tirelo ya Rena ya Mmušo. Kgothaletša bagoeledi go ya tirelong ya tšhemo mafelo-bekeng a. Mogoeledi o mongwe le o mongwe o swanetše go dira pakane ya gore a be le karolo ka mehla bodireding bekeng e nngwe le e nngwe le go tsenya pego bofelong bja kgwedi.
20 mets:“Go Neela Peeletšo ya Morokami ka May.” Kakaretšo ya sehlogo ka dipotšišo le dikarabo. Akaretša go ahla-ahlwa ga morero wa Morokami bjalo ka ge o boletšwe ka godimo go letlakala 2 la tokollo e nngwe le nngwe. Dithero tšeo di oketšegilego di ka šišinywa, di theilwe go makasine o swanetšego go dirišwa tirelong ya tšhemo bekeng ye. Go sepedišwa ga dimakasine go theogetše tlase, ka gona mogoeledi o mongwe le o mongwe o kgothaletšwa go ela hloko gore o sepediša dimakasine ka dinako tšohle, gaešita lege peeletšo e ganwa.
15 mets:“Dipolelo tša Matseno di ka Dira Phapano.” Boledišana le batheetši ka sehlogo. Na ba lekile a mangwe a matseno ao a šišintšwego ditokollong tša morago bjale tša Tirelo ya Rena ya Mmušo, tše bontši bja tšona di tšerwego ka pukung ya Go Boledišana? Ke matseno afe ao ba hweditšego e le ao a atlegago kudu tšhemong ya gabo lena? Bagoeledi ba itokišetša le go itlwaetša neng matseno a bona bakeng sa tirelo ya tšhemo? Dira dipontšho tše pedi goba tše tharo tše kopana tša matseno ao a ilego a šoma ka katlego tšhemong ya gabo lena.
Kopelo 32 le thapelo ya go phetha.
Beke e Thomago ka May 11
5 mets:Ditsebišo tša phuthego.
20 mets:“Dira Maeto Ao a Atlegago a go Boela.” Boledišana le batheetši ka dintlha tše kgolo tša sehlogo, mohlomongwe o akaretše le phihlelo e kopana e sa tšwago go hwetšwa moo leeto la go boela le bilego le mafelelo ao a hlohleletšago kgahlego e oketšegilego. Diriša metsotso e tshela go ya go e seswai o bontšha kamoo moswari wa Thuto ya Puku ya Phuthego a thušago bagoeledi ba babedi goba ba bararo go itokišetša leeto la go boela bathong bao ba thabelago bao ba sa tšwago go hwetšwa tšhemong ya gabo lena. Ge e ba go kgonega, diriša maeto a kgonthe ao bagoeledi ba tlago go a dira ka morago.
20 mets:Go ahla-ahlwa “Go Rapela Bagologolo” go tšwa go puku ya Go Boledišana, letlakala 183-5. Lege ba bantši ba gana ka gore bagologolo ga ba rapelwe ke batho bantši ka lefaseng la ka Bodikela, go na le dilo tše dintši tšeo batho mehleng yeno ba di dirago bakeng sa go godiša bahu. Batho ba bangwe ba sa dutše ba hlompšha ka tsela ya borapedi le go rapelwa bjalo ka ge eka ba sa phela. Dihlwa-di-eme, diswantšho, le ditaba tša bophelo bja batho di gopotša batho ba kilego ba tuma. Rola thulaganyo ya tate a boledišana le ngwana yo a sešogo a tsena mahlalagading. Motswadi o diriša tsebišo go tšwa go puku ya Go Boledišana, letlakala 184. Gatelela taba go tšwa dihlogwaneng tše pedi tša mathomo go bontšha ngwana lebaka leo ka lona go boga difilimi tše di tšhošago tše godišago bonoge goba kgopolo ya gore bahu ba a boa go tlo hlomara bao ba phelago. Hlalosa maemo a bahu le kholofelo ya tsogo, gomme o bontšhe kamoo seo se swanetšego go kgoma pono ya rena ka bahu. Ngwana o bolela kganyogo ya gagwe ya go phema boithabišo bjo bo godišago bonoge.
Kopelo 65 le thapelo ya go phetha.
Beke e Thomago ka May 18
10 mets:Ditsebišo tša phuthego, go akaretša le pego ya tša ditšhelete le ditebogo tša meneelo. Reta phuthego bakeng sa go thekga phuthego ya gabo lena le modiro wa lefase ka bophara wa Mokgatlo ka tša ditšhelete. Diphuthego di swanetše go dira dithulaganyo tše tiilego tša go tšea karolo modirong wa go aba dimakasine matšatšing a maikhutšo a setšhaba ka May. O mongwe le o mongwe o kgothaletšwa go thekga dithulaganyo tše, lege e ka ba feela seripa-gare sa letšatši.
20 mets:“Kgothaletša go Phegelela Dipakane tša Moya.” Poledišano e tla swarwa ke mogolo le batheetši. Ka morago ga go ahla-ahla serapa 6, boledišana le mogoeledi yoo, bjalo ka mofsa, a arabetšego gabotse kgothatšong ya go katanela dipakane tša moya. O kgothatšegile bjang? Ge o ahla-ahla serapa 7, bolela mehola e tlago hwetšwa ke batswadi le bafsa go hlahlobeng dikgaolo 22, 38 le 39 tša puku ya Dipotšišo tša Bafsa.
15 mets:Itokišetše Lesolo la 1992 la Tšhemo e sa Abjago. Molebeledi wa tirelo o ahla-ahla lengwalo la Mokgatlo la April 1, 1992 leo le bolelago ka lesolo la 1992 la tšhemo e sa abjago. Diphihlelo tše di tšwago go Morokami wa February 1, 1992, letlakala 24 le April 1, 1992, letlakala 15 di ka dirišwa.
Kopelo 213 le thapelo ya go phetha.
Beke e Thomago ka May 25
10 mets:Ditsebišo tša phuthego le Ditaba tša Pušo ya Legodimo. Diphihlelo tšeo di tšwago lesolong la dipeeletšo (tšona di swanetše go rulaganywa e sa le pele ka thušo ya ngwanabo rena yo a swarago dipeeletšo tša phuthego).
15 mets:Itšhireletše Bohlanoging. Poledišano magareng ga mogolo le mogoeledi ba dutše tafoleng. Mogoeledi o hlalosa gore o gahlane le motho-tsoko yo a bego a bala dipuku tša bohlanogi tirelong. Mogoeledi o nagana gore mong wa ntlo o be a botšiša dipotšišo tša gagwe ka tshwanelo. Mogoeledi o ganne go newa puku ya bohlanogi ya mong wa ntlo eupja o be a tla leka go araba dipotšišo tša mong wa ntlo. Mogolo o reta mogoeledi bakeng sa moya o mobotse le boitshwaro. Go e na le go ahla-ahla seo bahlanogi ba se ngwadilego goba ba se boletšego, ke bohlale go lebiša tlhokomelo ponong ya Mangwalo mabapi le ditaba bjalo ka ge di ngwadilwe ka pukung ya Go Boledišana. Mogolo o kgopela mogoeledi gore a phetle puku ya Go Boledišana, gomme ka bobedi ba hlahloba letlakala 80-3. Poledišano e swanetše go ba e borutho le yeo e kgothatšago ge ba dutše ba hlahloba tlhaloso ya bohlanogi, sehlogwana se sengwe le sengwe sa mongwalo o mokoto, le ditemana tša motheo tšeo di kgethilwego ge nako e dumela. Phetha poledišano ka ditlhaloso tšeo di lebanyago tša taba ka moka e agago le yeo e kgothatšago yeo e hwetšagalago bakeng sa go ithuta. Abelana le mong wa ntlo molaetša wo o agago. Ge e ba a botega, o tla bona phapano magareng ga tsela e botse yeo therešo e tšwelelago ka yona le tsela e fošagetšego le ya go ntšha diphošo ya bahlanogi. Ka go gana ga rena kgopolo ya bohlanogi le taba ya gona, re bontšha go botegela ga rena Jehofa le phuthego ya gagwe e bonagalago.
20 mets:“Go ja Dijo tša Moya ka Mehla go Bohlokwa Bakeng sa Lapa la Bokriste.” Poledišano ya Dipotšišo le Dikarabo ka taba.
Kopelo 108 le thapelo ya go phetha.