Bagoeledi ba Mmušo ba a Bega
Go Akaretša Tšhemo e sa Abjago kua Paraguay go Tšweletša Dienywa
LEKALA la Paraguay la Mokgatlo wa Watch Tower le tloga le lemoga ka mo go tletšego go nyakega ga go bolela ditaba tše di lokilego tša Mmušo tšhemong ya lona ka moka. (Ditiro 1:8) Ye ke nako ya gore bohle ba ithute ka Mmušo le go direla Jehofa pele a fediša tshepedišo ye e kgopo ya dilo ‘masetla-pelong a magolo’ a tlago. (Mateo 24:21, 22) Diphihlelo tše di latelago di bontšha seo se dirwago go thuša batho ba lego mašemong a sa abjago. Lekala le a bega:
Go ile gwa dirwa dithulaganyo gore tšhemo ka moka e sa abjago e akaretšwe ka go diriša babulamadibogo ba kgethegilego ba nakwana. Nakong ya dikgwedi tša November go ya go January tša ngwaga wa tirelo wa 1990, banababo rena le dikgaetšedi ba 39 ba ile ba akaretša palo-moka ya metse e megolo e lekgolo le ditorotswana tše nyenyane moo go sego gwa hlwa go e-ba le bagoeledi ba Mmušo. Ba ile ba kgona go sepediša dipuku tše 6 119, dipukwana tše 4 262 le dimakasine tše 5 144. Ka baka la modiro wo, dihlopha tše difsa tša bagoeledi di a hlangwa.
◻ Mosadi o mongwe o ile a amogela puku ya O ka Phela ka mo go sa Felego Paradeiseng mo Lefaseng go kgaetšedi wa mmulamadibogo yo a bego a šoma tšhemong e sa abjago. Mmulamadibogo o ile a ithapa gore o tla swara thuto ya Beibele le yena, gomme o ile a amogela seo ka lethabo. Ge mmulamadibogo a boa, o hweditše a se a letelwa ke mosadi yoo feela eupja gape le monna wa gagwe le bana ba bona ba lesome. Ketelong e latelago, lapa gotee le bagwera ba bona le baagišani ba be ba itokišeditše thuto ya Beibele! Mosadi o be a ba laleditše, a bolela gore thuto e be e le botse kudu le gore kholofelo le ditšhegofatšo tšeo Jehofa a di neago e be e le tše makatšago. Se e be e le selo seo go sa kago gwa ba le motho yo a kilego a mmotša sona pele, ka gona o ile a nagana gore baagišani ba gagwe le bagwera le bona ba swanetše go kwa ditaba tše tše di lokilego.
Nako e nngwe le e nngwe ge mmulamadibogo a be a swara thuto, go be go e-ba le ba bantši ba ba tlago mo go bego go le bjalo ka phuthego e nyenyane. Batho ba ba thabelago ba ile ba botšiša dipotšišo tše dintši gomme ba ba le karolo thutong. Ge mmulamadibogo a be a hlalosa gore ge tšhemo e šomilwe yena le badirišani ba gagwe ba be ba tla ya lefelong le lefsa, mosadi ka go tshwenyega o ile a botšiša seo se tlago go direga ka bona. Dithulaganyo di ile tša dirwa le banababo rena ba phuthegong ya kgaufsi gore ba tšwetše thuto pele. Mo nakong ye babulamadibogo ba kgethegilego ba abetšwe gore ba yo thuša batho ba ba ba thabelago ba go swana le dinku.
◻ Nakong ya ge a be a e-ya ka ntlo le ntlo tšhemong e nngwe e sa abjago, kgaetšedi wa mmulamadibogo o ile a hwetša monna yoo a bego a hweditše puku ya Therešo ye Išago Bophelong bjo bo sa Felego nywageng e ka bago e lesome pele ga moo. Ga e sa le go tloga nakong yeo o ile a se sa kgona go kopana le gatee le Dihlatse tša Jehofa. Lega go le bjalo, o be a tseba gore Jehofa, yo a bego a mmitša Jehofa wa mašaba, ke Modimo a nnoši wa therešo le gore ke Yena a nnoši yo a swanetšego go rapelwa. Ka ntle le tlhahlo ya motho o mongwe, o be a dutše a bolela le motho o mongwe le o mongwe yo a mo tsebago ka Jehofa. Ge e le gabotse, beke e nngwe le e nngwe o be a sepela dikhilomithara tše tharo go yo etela banyalani bao ba thabelago gore a boledišane le bona ka Modimo, ka gobane go etša ge a bea taba, ‘Ge e ba ke kgaotša go ba etela, ba tla lebala ka Jehofa.’ Ka ntle le banyalani ba, go be go e-na le ba bangwe ba lesome ba bego ba nyaka thuto ya Beibele—se sohle e le ka ge motho yo yo a thabelago a ile a ba botša ditaba tše di lokilego.
Seo se makatšago ke gore matšatši a sego kae feela pele mmulamadibogo a mo etela, monna yena yo o be a ganne go dumelela moperisita wa lefelong leo le molokeloke wa gagwe ba tsena ka ngwakong wa gagwe ka seswantšho sa kgarebe, a hlalosa gore yena ga a dumele diswantšho. Moperisita o be a befetšwe o šoro. Bošegong bjoo monna o ile a rapela Jehofa bakeng sa thušo. Ka gona akanya kamoo a bego a thakgetše le go thaba ka gona ge mmulamadibogo a etela. Dithulaganyo di ile tša dirwa bakeng sa thuto ya Beibele e tšwelago pele ka thulaganyo, gomme monna o ile a tšwela pele a dira tšwelopele ka go kopanela le phuthego ya pušo ya legodimo.
Ka kgonthe Jehofa o šegofatša modiro wa go kgoboketša kua Paraguay ge banababo rena ba katanela go nea bohlatse bjo bo tletšego mašemong a a sa abjago.—Mateo 24:14.