Go Neela Peeletšo Ya Morokami  Ka May

1 Morero wa Morokami o boletšwe ka boripana ka tokollong e nngwe le e nngwe ka godimo go letlakala 2. Re ka dira’ng ka go dumelelana le morero wo wo o boletšwego e le gore re thuše batho ba bantši ka mo go ka kgonegago? Ka May re tla dira maiteko a kgethegilego a go kgothaletša batho ba bantši ka mo go ka kgonegago gore ba beeletše Morokami.

2 Go motho yo a rego yena ke Mokriste, re ka re:

◼“Re botšiša baagišani ba rena potšišo gomme re be re ka thabela go kwa gore wena o ka re’ng mabapi le yona. Ka ge Jesu a re rutile gore re rapelele Mmušo wa Modimo gore o tle le gore thato ya Gagwe e dirwe lefaseng bjalo ka ge e dirwa legodimong, na o nagana gore thato ya Modimo e tla ka ya dirwa e le ka kgonthe gona mo lefaseng?” Letela karabo, o phetle go Jesaya 55:10, 11 gomme o kgopele mong wa ntlo go ela hloko kamoo dikholofetšo tša Modimo di tlago phethagatšwa ka gona.—rsSE, letl. 13, matseno a bobedi ka tlase ga sehlogo sa “Mmušo.”

3 Ge e ba mong wa ntlo a bontšha go thabela, mo gongwe o ka tšwela pele ka gore:

◼“Morero o mongwe wa makasine wa Morokami ke go lebiša tlhokomelo go phethagatšweng ga boporofeta bja Beibele. Ela hloko sehlogo se.” Ke moka lebiša tlhokomelo sehlogong sa pele sa tokollo ya Morokami ya May 1, e lego “1914—Ngwaga wo o Ilego wa Tšhoša Lefase” gomme o re: “Mo gongwe o ka ba o ipotšiša gore, ‘Ke ka baka la’ng ke swanetše go šetša ngwaga wa 1914?’ Ela hloko seo serapa 2 se se bolelago mabapi le 1914 le Morokami.” Ke moka o bale serapa seo.

4 Ge e ba o rata go ba le poledišano e teletšana, thero yeo e ka godišwa ka go akaretša lengwalo la Kutollo 21:3-5, bjalo ka ge go hlaloswa ka pukung ya Go Boledišana.

Tabeng ye, ka morago ga go bala Jesaya 55:10, 11, o ka re:

◼“Boporofeta bjo bo makatšago mabapi le thato ya Modimo ka lefase bo tla tloga bo phethega. Bo tla kgoma bophelo bja-ka le bja gago. Anke o theetše se se ngwadilwego go Kutollo 21:3-5.” Bjale ke gona o ka balago ditemana gomme wa ahla-ahla ditšhegofatšo tše di tlago go tla ka tlase ga pušo ya Mmušo wa Modimo. Bolela kamoo Morokami o tsebatšago Mmušo wa Modimo ka gona.

Mo gongwe o ka re:

◼“Tokollo ya May 1 e na le sehlogo se se rego ‘Ke Bomang Bao ba Tlago go Phologa “Lebaka la Ditlaišêxô”?’ Se tla go thuša gore o bone kamoo o ka phelago ka gona lefaseng la go loka ka tlase ga Mmušo wa Modimo wo re balago ka wona go Kutollo 21.”

5 Diriša Morokami e le Moratho wa go Tshedišetša Thutong ya Beibele: Paka- ne ya rena ke go thuša ba bangwe go ithuta therešo e le gore le bona ba be badirišani le Jehofa le go kopanela go tsebatšeng Mmušo wa Jehofa. Ka gona-ge, ge re hwetša batho bao ba thabelago, re swanetše go ngwala gomme re ba etele gape kapejana.

6 Gaešita lege bontši bja dipeeletšo tša rena re tla di hwetša ge re e-ya ka ntlo le ntlo, ga se ra swanela go lebala bao re gwebišanago le bona, baagišani ba rena le ba leloko. Ge o le modirong wa setarateng, motho o mongwe mo gongwe a ka re: “Ke bala dimakasine tša lena ka mehla.” Hlalosa kamoo a ka hwetšago Morokami ka mehla ka go beeletša. Na bana ba rena ba na le peeletšo? Na re naganišitše ka go romela mpho ya peeletšo go motho yo re tlogago re mo šetša? Go thwe’ng ka bao re boelago go bona ka mehla goba gaešita le barutwana ba rena ba Beibele? Ge e ba motho a ka se kgone peeletšo ya ngwaga, gona mo nee peeletšo ya dikgwedi tša tshelelago. Ge e ba motho a gana go dira peeletšo, šišinya gore a tšee dimakasine tše pedi.

7 Ge re dutše re abelana therešo le ba bangwe ka thušo ya Morokami, anke re nyake tlhahlo ya Jehofa ka mehla modirong wa rena e le gore re tle re hwetše batho ba swanago le dinku gomme re ba fepe.—Joh. 21:15-17.