Go Sepediša Dipeeletšo Ka Ntlo Le Ntlo

1 Morero wa Phafoga! o hlaloswa ka mo go kwalago go letlakala 4 la tokollo e nngwe le e nngwe: “Makasine wo o aga tumelo kholofetšong ya Mmopi ya lefase le lefsa la khutšo le le le šireletšegilego pele ga ge moloko wo o bonego ditiragalo tša 1914 o ka feta.” Ka kgonthe makasine o bjalo o swanelwa ke go abja ka gohle ka mo go kgonegago bodireding bja rena bja ntlo le ntlo! Ka October re na le sebaka sa go sepediša makasine wo o mobotse motheong wa peeletšo go batho ba bantši ka mo go kgonegago.

2 Phafoga! ke mokero o mobotse kudu bakeng sa go tsoša kgahlego ya batho bao ba ka bago ba se ba sekamela dilong tša moya. Ge o bala tokollo e nngwe le e nngwe, tsoma dintlha tše di swanetšego tše o ka di abelanago le ba bangwe. Bagoeledi ba bangwe ba ngwala dintlha koping ya bona ka noši, gomme pele ba e-ya tirelong ya tšhemo ka tokollo yona yeo ba hlahloba dintlha e le gore ba be le tše di kgethegilego monaganong tšeo ba ka di abelanago le beng ba dintlo.

3 Mo gongwe re ka kgetha go thoma thero ya rena ka go hlalosa ka go lebanya taba yeo e ahla-ahlwago tokollong ye re e dirišago ya Phafoga!

Ka morago ga matseno a makopana re ka rola makasine, mohlomongwe ka gore:

◼“Sehlogo se sa Phafoga! se hlalosa taba ye ka botlalo.” Ka gona bala mothaladi goba e mebedi yeo e kgethilwego pele, gomme o tšwele pele: “Ka ge o bonala o thabela taba ye, na o tla rata go bala sehlogo se gotee le dihlogo tše dingwe tšeo di lego nakong tokollong ye ya Phafoga!? Ge e ba go le bjalo, ke tla thabela go go rulaganyetša gore o beeletše makasine wo o mobotse ka moneelo wa R9,50 feela ka ngwaga. Ka gona o tla amogela ditokollo tše 12 ka poso.” Ge e ba mong wa ntlo a gana mpho ya peeletšo, mo kgothaletše go tšea dimakasine tše pedi. Ge e ba mong wa ntlo a amogela dimakasine, mo gongwe e ka ba mo go swanetšego go bolela selo se se swanago le se: “Re kgopela moneelo wa R1,60 bakeng sa go lefelela ditshenyagalelo tša kgatišo ya dimakasine tše tše pedi.”

4 Ge e ba mong wa ntlo a bontšha kgahlego e lego molaleng dilong tša moya, mo gongwe re ka bula temana e bjalo ka 2 Timotheo 3:1-5 e lego mabapi le mehla ya bofelo. Ka morago ga moo, gore re tsoše kgahlego ya gagwe dimakasineng tša rena re ka bala ka go lebanya karolong ya mathomo go letlakala 2 la tokollo ya gona bjale ya Morokami e rego: “Morero wa Morokami.” Ka morago re mo neele peeletšo.

5 Mafelong a mantši batho ba tshwenyegile ka maemo a tša boiphedišo ao a befelago pele goba go oketšega ga bosenyi le bošoro. Mo gongwe o ka rata gore:

◼“Re abelana le baagišani ba rena pono e nepagetšego ya bokamoso. O nagana’ng ka bokamoso bja rena bjo bo lego kgaufsi? Na le wena o tshwenyegile ka maemo a tša boiphedišo ao a befelago pele gotee le go oketšega ga bosenyi le bošoro? [Dumelela karabo.] Na o nagana gore go na le motho lege e le ofe yo a nago le tharollo ya kgonthe bakeng sa mathata a? [Dumelela karabo.] Ke hweditše Beibele e le e holago kudu tabeng ye.” Diriša temana e tee goba tše oketšegilego tše di lego ka pukung ya Go Boledišana go matlakala 325-30, tše di hlalosago seo Mmušo wa Modimo o tlago go se direla batho. Lebiša tlhokomelo ya mong wa ntlo sehlogong se se swanetšego ka go Morokami. Neela peeletšo.

6 Ge re dutše re e-ya ka ntlo le ntlo, anke re gopoleng gore re na le didirišwa tše pedi tše dibotse kudu lefaseng bakeng sa go thuša batho go tšwela pele moyeng, e lego Morokami le Phafoga! Eka re ka katanela go tsoša kgahlego ya beng ba dintlo dimakasineng tše le go sepediša peeletšo sebakeng se sengwe le se sengwe.