Matla A Lentšu La Modimo
1 Lentšu la Modimo ke le matla. (Ba-Heb. 4:12) Lehono bohlatse bja se bo ka bonwa maphelong a dimilione ao a fetošitšwego a kaone ge batho ba be ba dutše ba diriša ka noši dilo tšeo ba ithutago tšona Beibeleng. Go bile bjalo lekgolong la pele la nywaga ge barutiwa ba Jesu ba be ba abelana le ba bangwe tsebo ya Lentšu la Modimo.—Ba-Roma 12:2.
2 Gore batho ba holwe ke dithuto tša Beibele, ba swanetše go lemoga Beibele e le Lentšu la Modimo. (1 Ba-Thes. 2:13) Ka November re tla ba re nea batho sebaka sa go ithuta mo go oketšegilego ka bohlokwa bja Beibele ge re dutše re sepediša puku ya Beibele—Na ke Lentšu la Modimo Goba la Motho?
3 Ke ka baka la’ng o sa boeletše dikarolo tše dingwe tše di kgahlišago tša puku ya Lentšu la Modimo? Lelokelelo la dikagare le tla go lebiša dikgaolong tšeo di ahla-ahlago mehlolo, ditaba tšeo go thwe’ng di a ikganetša, tumelelano ya tša thutamahlale, diporofeto le ditaba tše dingwe. Go na le diswantšho tše dintši. Ditšhupetšo tša tshedimošo di lokeleditšwe karolong ya ka morago ya puku. Dikarolo tše di tla re dira gore re kgone go neela puku ka phišego e kgolo, re kgodišegile ka go tia gore batho tšhemong ya rena ba swanetše go kwa ditaba tše di lokilego tšeo e di rwelego.
4 Re ka diriša puku ye bjang ge re gahlane le mong wa ntlo yo a šetšego a dumela gore Beibele ke Lentšu la Modimo? Kgahlego e ka bjalwa ka go gatelela kgaolo 2 yeo e hlalosago pego ya histori ya go lwela ga Beibele go phela, goba kgaolo 14 yeo e kgothaletšago mmadi go amogela thušo gore a be le kwešišo e kaone ya seo se bolelwago ke Beibele go rena lehono. Go bala mangwalo ao a bontšhitšwego go kgaolo 14 go tla kgonthišetša mong wa ntlo gore poledišano ya lena e theilwe Beibeleng.
5 Ba bantši ba gana go amogela Beibele e le lentšu la Modimo ka baka la boitshwaro bja Bojakane. Kgaolo 3 e rego “Mogwera wa Maaka wa Beibele” e ka dirišwa ka mo go holago boemong bjo.
6 Ge re bala go tšwa Beibeleng ya rena, re ka hwetša gore mong wa ntlo o bontšha kgahlego molaetšeng wa rena eupja ga a na Beibele. Ge e ba ba kwešiša Seisemane mo gongwe re ka ithapela go ba tlišetša kopi ya New World Translation of the Holy Scriptures. Goba o ka hwetša kopi ya Beibele ka leleme la bona go Mokgatlo ka ge o reka Dibeibele ka boati ka maleme a mantši a tikologong ye.
7 Ka Beibele, Jehofa o tsebaditše ditirišano tša gagwe le batho, ka go rialo a re tlwaelanya le semelo sa gagwe se se kgahlišago. Eka re ka diriša puku ya Lentšu la Modimo ka mo go holago go thušeng ba bangwe go ithuta ka Jehofa le matla a Lentšu la gagwe!—2 Ba-Kor. 10:4.