Go Thoma Dithuto Tša Beibele Ka Puku Ya Motho Yo A Phagamego

1 Go ba le thuto ya legae ya Beibele e tla ba mo go thabišago kudu le mo go putsago bobedi go wena le go mong wa ntlo. Ga go na selo seo se ka lekanywago le lethabo la go abelana tsebo ya Beibele le ba bangwe.—Die. 11:25.

2 Pontšho ya Mehla ya Bofelo: Ge e ba o ile wa diriša tšhišinyo yeo e lego sehlogong se se lego ka mo godimo gomme wa thoma poledišano ya gago ka pampišana ya Na Lefase le le tla Phologa?, bjale o ka thoma bjang thuto o diriša kgaolo 111 ya puku ya Motho yo a Phagamego? Phetla puku go kgaolo 111 gomme o bale dirapa tša pele tše tharo. Mo gongwe o ka botšiša potšišo ya pele yeo e lego mafelelong a kgaolo: “Ke’ng se se hlohleletšago baapostola gore ba botšiše, eupja go bonala ba e-na le eng se sengwe menaganong ya bona?” Thuša mong wa ntlo gore a naganišiše ka karabo gomme o diriše seswantšho go ruta. Ka morago ga go bala serapa sa bone go ya go sa botshelela, botšiša potšišo ya bobedi: “Ke karolo efe ya boporofeta bja Jesu yeo e phethagatšwago ka 70 C.E., eupja ke’ng se se sa diregego ka nako yeo?” Ge e ba mong wa ntlo a bonala a thabela gomme a e-na le nako, tšwelang pele ka poledišano ya lena.

3 Ge e ba go bonala gore mong wa ntlo a ka swanelwa ke go etelwa ka nako e nngwe, mo gongwe o ka botšiša gore: “Na o tla rata go tseba se se oketšegilego mabapi le nako yeo bofelo bja tshepedišo ye ya dilo bo tla tlago ka yona?” Mo gongwe o ka rulaganyetša go boela bakeng sa go yo araba potšišo.

4 Na Lefase le Lefsa la Khutšo le a Kgonega? Ge e ba o dirišitše pampišana ya Bophelo Lefaseng le Lefsa la Khutšo go lebiša pukung ya Motho yo a Phagamego, kgaolo 133 e ka ba e thušago bjang tabeng ya go thoma thuto ya Beibele?

Ka morago ga go bala 2 Petro 3:13, mo gongwe o ka bala goba wa hlalosa ka boripana serapa sa bobedi go letlakala 3 la pampišana ke moka wa re:

◼“Jesu Kriste, Morwa wa Modimo e tla ba Kgoši ya Mmušo wa Jehofa. Ela hloko kamoo puku ya Motho yo a Phagamego Kudu yo a Kilego a Phela e hlalosago Jesu ka gona, le go re nea tsebišo mabapi le seo a tlago go se phetha nakong e tlago.” Ka gona bala kgaolo ka moka. Botšiša mong wa ntlo potšišo ya pele yeo e lego mafelelong a kgaolo: “‘Tokelo e thabišago ya baphologi ba Haramagedone le bana ba bona e tla ba efe?’ [Dumelela karabo. Dipotšišo tše dingwe di ka ahla-ahlwa ka mokgwa o swanago.] Na o tla rata go ba karolo ya lefase le lefsa leo Jesu a tla bušago go lona e le Kgoši? Ke tla rata go ba le sebaka bekeng e nngwe le e nngwe go go thuša go tšwa Beibeleng go bona kamoo se se ka fihlelelwago ka gona.”

5 Batho ba bangwe mo gongwe ba ka thabela go ba le poledišano e tšwelago pele mabapi le Jesu Kriste ketelong ye.

Mo gongwe o ka re:

◼“Go dirilwe boiteko ka pukung ye bja go hlalosa bophelo bja Jesu bja lefaseng bjalo ka ge bo hlalositšwe Diebangeding tše nne. Na o tla rata go ithuta mo gontši ka bophelo bja Jesu bja lefaseng?” Ge e ba mong wa ntlo a dumela, mo gongwe o ka rata go ahla-ahla mohlolo wa pele wa mehlolo ya Jesu go kgaolo 15.

6 Go sa dutše go e-na le batho ba bantši ba dipelo tše di botegago bao ba ratago toko le bao ba tsomago ditharollo tša mathata ao ba lebeletšanego le ona. Ka kgonthe, go ithapela go abelana le ba bangwe dithuto tša Jesu Kriste ka thuto ya Beibele ke boiteko bjo bo putsago e le ruri.