Dulang Le Bolela Ka Dilo Tšeo Le Di Bonego Le Go Di Kwa

1 Gaešita lege ba be ba tšhošetšwa ka go bethwa le go golegwa, baapostola ba ile ba botša baganetši ba bona gore: “Xe e le rena xa re kxône xo lesa xo bolêla tše re di bonexo le tše re di kwilexo.” (Dit. 4:20) Ba be ba lemoga bohlokwa bja mediro le dithuto tša Jesu.

2 Ditaba tše di lokilego mabapi le Jesu le Mmušo wa gagwe ke tša bohlokwa go batho lehono go etša ge di be di le bohlokwa nakong yeo. Ka gona re swanetše go diriša sebaka se sengwe le se sengwe go bolela ka seo re se bonego le seo re se kwelego Lentšung la Modimo. Gantši batho ba boemong bjo kaone bja monagano bja go bolela ka ditaba tša bodumedi matšatšing a maikhutšo, gomme se se bula dibaka tše oketšegilego tša go nea bohlatse.

3 Bafsa, Bolelang Nakong ya Maikhutšo a Sekolo: Dihlatse tše dintši tša bafsa di diriša dibaka tše di oketšegilego ka mo go holago bakeng sa go nea bohlatse nakong ya maikhutšo a sekolo. Bao ba kolobeditšwego gare ga lena mo gongwe ba ka rata go ingwadiša e le babulamadibogo ba go thuša ka December. Diphuthegong tše dintši bagolo ba rulaganyeditše diboka tše di oketšegilego tša tirelo ya tšhemo bakeng sa go nea bagoeledi bao ba tsenago sekolo sebaka. Ga re kgothaletše bana gore ba tšwe ba nnoši, eupja go e na le moo ba šome le batswadi ba bona goba bagoeledi ba bangwe bao e lego batho ba bagolo. Ka December go na le dibaka tše di kgahlišago kudu tša go dira modiro wa setarateng ka ge batho ba bantši ba tla ba ba e-ya go reka dilo tša Keresemose. Dimakasine tša rena di tla ba le dihlogo tšeo di tlago go tsebiša batho kamoo Jesu a ka rarollago mathata a lefase ka gona e le Kgoši e bušago. (Bapiša le Luka 2:14.) Ka ge batho ba bantši ba nagana ka Jesu Kriste le khutšo nakong ye ya ngwaga, na e ka se be nako e botse ya go sepediša puku ya Motho yo a Phagamego go batho ba bantši ka mo go kgonegago?

4 Ge e ba go phema ga gago go ba le karolo meetlong ya bodumedi yeo e tswalanago le Keresemose go tsoša kgang, mo gongwe o ka re:

◼“Ga ke bine menyanya ya Keresemose ka gobane menyanya e bjalo ga e godiše Jesu e le yena a nnoši yo re ka phološwago ka yena le motho a nnoši yo a tlago go fediša ntwa le mathata a merafo. [Tsopola goba o bale Ditiro 4:12.] Jesu ga e sa le lesea eupja ke Kgoši e bušago. Puku ye ya Motho yo a Phagamego Kudu yo a Kilego a Phela e ahla-ahla dithuto le mehlolo ka moka ya Jesu gomme e bontšha kamoo a tlago go fediša tlaišego ya batho ka gona.” Ka gona bontšha seswantšho se se lego go kgaolo 133 gomme o bale serapa sa bobedi letlakaleng le le latelago. Bontšha dintlha tše dingwe tšeo o naganago gore di ka kgahliša motho yoo.

5 Bolela le Bašomi-gotee le Wena: Ngwanabo rena o mongwe o ile a sepediša dipuku tše 63 ka go fo bea puku ya Motho yo a Phagamego tafoleng ya gagwe. Ponagalo ya yona e gogelago le leina la yona ka noši di tsoša dipotšišo. O ka fo botšiša mošomi-gotee le wena gore: “O be o ka re motho yo a phagamego kudu yo a kilego a phela ke mang?” Ka gona oketša ka gore: “Puku ye e akaretša ka botlalo bophelo bja Jesu ka moka, e ahla-ahla polelo e nngwe le e nngwe yeo a e neilego, e araba dipotšišo tšeo ba bantši ba di botšišago mabapi le mehlolo ya gagwe gomme e nea ditaba tše dingwe tše di kgahlišago ka botlalo. Ke poeletšo e feletšego ya seo Beibele e se rutago ka Jesu gomme e hlatsela ka mo go sa belaetšego gore Jesu Kriste e be e le motho yo a phagamego kudu yo a kilego a phela.” Ka gona šupa go tlhaloso ya Napoléon mabapi le Jesu go etša ge e tsopotšwe serapeng sa boraro sa matseno a puku.

6 Go ka tšwelela dibaka tše di swanago tša go nea bohlatse go baagišani goba meloko yeo e sa dumelego. Rapelela gore Jehofa a go nee sebete le bokgoni bja go bolela ka nako e swanetšego. (Dit. 4:29, 31) Seo re tlago go se bolela ka Jesu se tla thabiša dipelo tša batho bao ba naganago bao ba sekametšego go lokeng. Re ka ba le phihlelo efe e thabišago ka ntle le go thuša yo re tsenago le yena ka klaseng, mošomi-gotee le rena, moagišani goba wa leloko go tsena tseleng e išago bophelong bjo bo sa felego?—Joh. 14:6.