Abelana Le Ba Bangwe Tsebo E Nepagetšego Ka Jesu Kriste

1 Bodireding bja rena bja tšhemo ka December re tla bolelela puku ya Motho yo a Phagamego Kudu yo a Kilego a Phela. O tla re’ng ge o thoma poledišano e lego nakong ya Beibele, gona o tla rola bjang puku ye e kgahlišago kudu?

2 Go e Neela go ba Bangwe: Dikarolo tše dingwe tšeo di kgahlišago ka pukung ye tšeo re ka di hlalosago ke dife? Kgaolo 5 e rotoša potšišo e swanetšego bakeng sa nako ye ya ngwaga e rego, “Jesu o Belegetšwe Kae Gomme Neng?” Mo gongwe o ka tanya kgahlego ya mofsa ka pego e kgahlišago e lego go kgaolo 44 e rego, “Go Homotša Ledimo Leo le Tšhošago.” Motho yo a babjago mmeleng goba yo a fokolago a ka homotšwa e le ka kgonthe ke kgaolo 57 e rego, “Kwelobohloko go Bao ba Babjago.” Kgaolo 90 e rego “Kholofelo ya Tsogo” e swanetše go ba e ipiletšago go motho lege e le ofe yo a kilego a kwa bohloko bja go lahlegelwa ke moratiwa. Poledišano mabapi le maemo ao a nyamišago a lefase e ka lebiša go kgaolo 111 e rego, “Pontšho ya Mehla ya Bofelo.”

3 Ka morago ga tumedišo ya maleba, mo gongwe o ka re:

◼“Re botšiša batho ge e ba ba dumela gore Jesu Kriste e be e le motho yo a phagamego kudu yo a kilego a phela. [Dumelela nako ya go araba.] Ee, banna ba bantši ba ile ba tutuetša ditaba tša batho, gomme ba bangwe ba tsentše letsogo tšwelopeleng ya moloko wa batho, eupja ela hloko seo se dirago gore Jesu Kriste e be yo a arogilego go ba bangwe ka moka. [Bala Johane 17:3.] Ga go na motho o mongwe yo a nago le matla a go nea batho bophelo bjo bo sa felego. [Phetla kgaolo 111 ya puku ya Motho yo a Phagamego.] Ge Jesu a be a le mo lefaseng, o ile a hlalosa ditiragalo tšeo di bego di tla direga pele ga bofelo bja lefase. Eupja gape o ile a kgothaletša barutiwa ba gagwe go thaba ka gobane ditiragalo tše di be di tla ba di bolela gore phološo e a batamela.” Ka morago ga go ahla-ahla ka boripana dikarolo tše dingwe tša pontšho ya go ba gona ga Kriste, bontšha dintlha tše dingwe tše kgolo tša puku. Neela puku ka moneelo wa R8,00.

4 Tsela e nngwe, ka morago ga tumedišo e tlwaelegilego o ka re:

◼“Ka December batho ba nagana le go bolela mo gontši ka Jesu. Ke ka ditsela dife re ka ekišago mohlala wo o beilwego ke Jesu, e lego motho yo a phagamego kudu lefaseng? [Dumelela karabo, ke moka o lebiše tlhokomelo go 1 Petro 2:21.] O rutile balatedi ba gagwe go rata baagišani ba bona, go dula ba hlwekile boitshwarong le go rapelela go tla ga Mmušo wa Modimo. Phološo ya rena e ithekgile ka go lemoga le go kwa Jesu e le Mophološi wa rena. [Bala Johane 14:6.] Jesu e be e se motho yo a tlwaelegilego. Puku ye e mo hlalosa e le motho yo a phagamego kudu yo a kilego a phela. Kgaolo 59 e tiiša se, e mo hlalosa e le “Kriste Morwa wa Modimo e a phelaxo.” Ka ge re ithekgile ka yena bakeng sa phologo, na ga o nagane gore go a nyakega gore re ithute mo gontši ka mo go kgonegago ka modiro wa gagwe le seo a se rutilego? Puku ye e lokišeleditšwe morero woo ka mo go kgethegilego, gomme ke tla thabela go dira gore o hwetše kopi ye ka moneelo wa R8,00.”

5 Thea Motheo Bakeng sa Ketelo e Tlago: Ee, go sa šetšwe ge e ba re sepedišitše puku ya Motho yo a Phagamego, dimakasine tše pedi, pampišana goba re bile le poledišano e thabišago feela, mo gongwe re ka re: “Nakong e tlago ge ke e-tla ke tla rata go abelana le wena taba e kgahlišago mabapi le motse wo Jesu a belegetšwego go wona.” Kgonthišetša gore o gopola ketelo gabotse le kgahlego yeo e bontšhitšwego.

6 Mmušo o nea kholofelo e nnoši ya kgonthe bakeng sa batho. Eka re ka bontšha kganyogo ya rena e tšwago pelong ya go abelana le bohle bao re gahlanago le bona “tsebo e nepagetšego ya sephiri se sekgethwa sa Modimo, e lego Kriste.”—Ba-Kol. 2:2, NW.