Go Sepediša Dipukwana Bakeng Sa Go Tsoma Bao Ba Thabelago

1 Dipukwana ke didirišwa tše matla. Ka matlakala a 32 feela, pukwana e ka hlatsela ka go tia ditherešo tša Mangwalo gomme ya šwalalanya dikgopolo le dithuto tšeo di thulanago le tsebo ya Modimo.—2 Ba-Kor. 10:5.

2 Ka morago ga go bala pukwana ya Dihlatse tša Jehofa—Ba Dira Thato ya Modimo ba le Batee Lefaseng ka Moka, monna o mongwe o ile a tutueletšega go ngwala gore: “Le ka mohla ga se ka ka ka bona mokgatlo o bjalo. . . . Ke mo go kgahlišago go hwetša batho bao ba tšeelago thato ya Modimo godimo gakaakaa mehleng ye ya boikaketši bjo bokaakaa bja bodumedi.” Ngaka ya ditaola Afrika e ile ya ithuta pukwana ya Thabela Bophelo Lefaseng ka mo go sa Felego! E bile le mafelelo afe go yona? E ile ya tlogela bongaka bja yona gomme ya raka basadi bao e bego e dula le bona ka ntle le mosadi wa yona o mogolo. Ka gona e ile ya mo nyala ka molao.

3 Pukwana ya Na o Swanetše go Dumela Boraro Botee? ke sedirišwa sa therešo seo se ngwadilwego ka bokgoni, seo se kwalago le seo se šomago. Ge a bolela ka yona, mongwadi wa tša bodumedi wa The Sunday Gleaner kua Jamaica, West Indies, o itše: “Pukwana ye . . . ke sebetša se segolo sa Dihlatse gomme bjale ga go na motho yo a dumelago go Boraro botee—goba yo a dumelago modimo wa dikarolo tše pedi—yo a šireletšegilego. Pukwana e kgobela ditsopolo tše dintši tše di tšwago methopong ya histori le ya bodumedi go bontšha gore thuto ya Boraro botee ga se ya tšewa Beibeleng. . . . Go thata kudu go mongwadi yo wa tša bodumedi go bona kamoo motho yo a tlwaelegilego—goba gaešita le yo a lego ka godimo ga go ba setho se se tlwaelegilego sa kereke—a ka kgonago ka gona go araba mabaka ao a hlohlago le ao a hlahlago ao a lokeleditšwego ke Dihlatse a go lwantšha kgopolo ya gore Jesu ke Modimo.”

4 Di Dirišeng Gabotse: Re swanetše go katanela go sepediša didirišwa tše tše di šomago, tše di kgahlišago le tše di botegago go batho ba bantši ka mo go kgonegago tšhemong ya rena. Ka ge re e-na le dipukwana tše di fapa-fapanego, e nngwe le e nngwe e bolelago ka taba e fapanego, re swanetše go katanela go neela yeo re bonago e le e swanelago kudu motho yo re mo neago bohlatse. Go tseba dipukwana tša rena le go ba le tšona ka go fapa-fapana ga tšona go tla dira gore go be bonolo go rena go di diriša gabotse, e ka ba tirelong ya tšhemo, ka gae goba lege e le kae.

5 Ka mohlala, ge o boledišana le motho o mongwe yo a gakantšhitšwego ke thuto ya Bojakane ya Boraro botee goba yoo mo gongwe a naganago gore Jesu ke Modimo, o be o tla diriša pukwana efe? Ge e ba motho o mongwe a botšiša lebaka leo ka lona Modimo yo lerato a dumelelago tlaišego e kaakaa, ke pukwana efe yeo e bego e tla kgotsofatša senyakwa se? Ge e ba motho a bontšha go tshwenyega ka go nyakega ga mmušo wo o holago batho, ke pukwana efe yeo e ka mo swanelago?

6 Go oketša tabeng ya go tseba pukwana yeo o ka e dirišago, katanela go tsoša kgahlego ya motho mabapi le dikagare tša yona. Ge e ba maemo a dumela, šupa tlhaloso goba seswantšho seo mo gongwe se ka tsošago kgahlego ya gagwe ya go bala pukwana. Goba o ka bala serapa goba tše pedi le yena, le bale ditemana tšeo di bontšhitšwego gomme le ahla-ahle taba. Dithuto tše dintši tše botse tša Beibele di thomilwe ka tsela ye.

7 Dipukwana tša rena di nea dikarabo tša Mangwalo gomme di bjala kholofelo go bao ba llišwago le go hlokofatšwa ke makgapha ao a dirwago lefaseng. (Bapiša le Hesekiele 9:4.) Batho ba go swana le dinku ba tla arabela molaetšeng wo dipukwana tše bjalo di o rwelego. Re na le tokelo ya go diriša dipukwana tše gabotse dikarolong ka moka tša bodiredi bja rena ge re dutše re tsoma bao ba thabelago.