Dikgopotšo Tšeo di Lego Nakong

1 Ba bantši ba rena re tla be re se gona diphuthegong tša gabo rena ka December. Bontši bja banababo rena ba tla ya kopanong ya selete gomme ba bangwe mo gongwe ba tla kopanya matšatši a bona a ngwaga le ngwaga a maikhutšo le kopano ya selete. Ge e ba re tla be re se gona mafelelong a December, re tla rata go kgonthišetša gore re romela dipego tša rena tša tirelo ya tšhemo go mongwaledi wa phuthego. Se se swanetše go dirwa e sa le ka pela ka mo go lekanego gore di akaretšwe pegong ya phuthego ya kgwedi le kgwedi, yeo mongwaledi a e kgoboketšago gomme a e romela go Mokgatlo ka di-6 tša kgwedi. Karolo e kgolo ya banababo rena e tla ya dikopanong tša ditšhaba-tšhaba go tloga ka December 30 go ya go January 2. Se se ka dira gore go be thata kudu go mongwaledi go hwetša pego ya gago ya tirelo ya tšhemo ka nako. Re šišinya gore le tliše dipego tša lena ka Sontaga, December 26. Ge e ba o e-ya bodireding ka morago ga letšatši leo, o ka e tsenya pegong ya gago ya January 1994.

2 Gape re rata go phafogela dibaka tša go nea bohlatse bjo bo sa rulaganyetšwago. Dibaka tše bjalo di ka tšwelela ge re dutše re sepela, re etela meloko goba re boledišana le ba bangwe bao re gahlanago le bona. Na re lebelela dibaka tša go nea bohlatse go swana le kamoo Jesu a bego a di lebelela ka gona? Ga se a ka a phema go nea bohlatse bjo bo sa rulaganyetšwago. (Joh. 4:5-30) Moapostola Paulo ka mo go swanago o ile a ‘thakanela sebaka se se botse’ gomme a hwetša mafelelo a mabotse. (Ba-Ef. 5:16; Dit. 17:17; 28:30, 31; Ba-Kol. 4:5) Gaešita lege re e-ya kopanong, re ka nea bohlatse. Tsela e nngwe ya go dira se ke ya go apara petšhe ya gago ka mehla. Se se ka tšweletša sebaka sa go nea bohlatse. Gape o tla hwetša gore go na le dibaka tša go nea bohlatse pele le ka morago ga mananeo letšatšing le lengwe le le lengwe. E-ba yo a itokišeditšego gabotse ka dintlha tše sego kae tše di lego nakong tšeo di ka bolelelwago gomme o sware dimakasine le dipampišana bakeng sa go tsoša kgahlego.

3 Ka go latela dikgopotšo tše ka kelohloko, re tla kgonthišega gore re diriša nako ya rena ka bohlale selemong se gomme re tla be re nea Jehofa “di-thaka-ngwaxa” tša rena.—Die. 3:9.