Go Diriša Dipukwana Ka Mo Go Atlegago Ka July
1 Gore o akgofiše modiro wa go dira barutiwa, mokgatlo o abile ka boati dipuku tše dintši tše di fapanego. Gare ga tšona go na le dipukwana tšeo di bolelago ka ditaba tše itšego, tše bjalo ka morero wa Modimo ka lefase, Boraro botee, leina la Modimo, pušo ya Mmušo le go dumelela ga Modimo bokgopo. Re ka diriša bjang dipukwana ka mo go atlegago go thuša batho tšhemong ya rena?
2 Pukwana ya Na Modimo Ruri o na le Taba le Rena? e hlalosa ka mo go kwalago gore lefase le lefsa leo le se nago tlaišego le kgaufsi. Re ka e rola bjang? Go ka hwetšwa ditšhišinyo ka pukung ya Go Boledišana ka tlase ga sehlogo se segolo se se rego “Mahloko,” seo se thomago go letlakala 279 goba mo gongwe o ka kgetha matseno a lego go letlakala 10 ka tlase ga sehlogo se se rego “Bokgopo/Mahloko.”
3 Mo gongwe o ka re:
◼“Na o šetše o kile wa ipotšiša gore: ‘Na Modimo ruri o ela hloko bokgopo le mahloko ao batho ba welwago ke ona?’” Dumelela karabo. Bala Psalme 72:12-14. Ka gona phetla go letlakala 22 la pukwana ya Na Modimo Ruri o na le Taba le Rena? gomme o ahla-ahle dihlogo tša mongwalo o mokoto tšeo di lego go karolo 10 gotee le seo se bolelwago ke seswantšho se se lego go letlakala 23. Ge e ba pukwana e ganwa, ke ka baka la’ng o sa neele pampišana go etša ya Khomotšo go Bao ba Nyamilego goba Bophelo Lefaseng le Lefsa la Khutšo?
4 Go tshwenyegilwe ka taba ya mmušo wa go loka lehono. Ba bantši ba ipotšiša ge e ba pušo ya motho e tla kopanya lefase. Tsebišo e holago e hwetšwa ka tlase ga “Pušo,” seo se thomago go letlakala 377 la puku ya Go Boledišana.
5 O ka botšiša gore:
◼“Na batho ba ka kgona go hloma mmušo woo ruri o tlago go tliša lethabo la neng le neng?” Dumelela karabo ke moka o botšiše gore: “Pego ya histori ya motho e bontšha’ng?” Phetla go Jeremia 10:23 goba o phetle go letlakala 377 la puku ya Go Boledišana gomme o bale ditemana tšeo di swanetšego le ditlhaloso. Ka morago ga moo, phetla go matlakala 24 le 25 ka pukwaneng ya Mmušo gomme o hlalose diswantšho le mangwalo. Hlalosa kamoo Mmušo wa Modimo o tlago go kopanya batho ka gona lefaseng ka moka. Ge e ba mong wa ntlo a sa amogele pukwana, o ka mo nea pampišana ya Na Lefase le le tla Phologa?
6 Ge e ba go e-na le poifo ya go boifa bosenyi tikologong ya geno, matseno a latelago e ka ba ao a ipiletšago.
7 O ka re:
◼“Batho ba bantši ba ipotšiša gore, ‘Ge e ba Modimo e le lerato, ke ka baka la’ng a dumelela bokgopo?’ Na le wena o kile wa ipotšiša ka se?” Dumelela tlhaloso, ke moka o re: “Hlokomela gore Diema 19:3 e lemoša malebana le go phara Modimo ka molato bakeng sa dilo tše mpe tšeo batho ba di dirago.” Ka morago ga go bala temana, lebiša tlhokomelo go letlakala 15 la pukwana ya ‘Bonang, Dilo ka Moka ke di Dira tše Mpsha’ gomme o bale serapa 27. Se se ka lebiša go ahla-ahlweng ga dirapa tše di latelago.
8 Go diriša dipukwana go ruta batho ba ba swanago le dinku mabapi le ditaba tše di lokilego ke selo seo ka moka ga rena re ka se dirago. Re ka thuša batho bao ba tšwago ditšong ka moka gore ba kopanele le mokgatlo wa Modimo. Re na le tokelo ya go tšea karolo modirong wa boboledi ge re dutše re diriša ka mo go atlegago dipukwana tša rena tšeo di lego nakong.