Go Boela Bakeng Sa Go Tutuetša Kgahlego Beibeleng

1 Ka dinako tše dingwe re gahlana le batho tirelong ya tšhemo, bao ba bontšhago kgahlego e itšego ditabeng tše di lokilego eupja ba swaregile kudu go ka boledišana le rena ka nako yeo re etetšego ka yona. Na re leka go boela ka nako e nngwe go ya go abelana molaetša wa Mmušo le bona? Goba mohlomongwe re ba le poledišano e kgahlišago le mong wa ntlo eupja a sa tšee dipuku. Na re boela go ya go boledišana le yena ka mo go tšwelago pele ka therešo?

2 Ke gabohlokwa go akaretša tšhemo ya rena ka mo go feletšego le go latelela kgahlego ka moka yeo re ka e hwetšago. Na re boela feela go bao ba tšeago puku goba dimakasine? Ge e ba go le bjalo, mo gongwe re ka ba re hlokomologa batho ba bangwe bao ba thabelago. Ruri ga re nyake go ahlola motho o mongwe e le yo a sa swanelwego ke kgothatšo e oketšegilego ya moya feela ka gobane a se a amogela dipuku. (Bapiša le Ba-Roma 14:4.) Mohlomongwe ka morago ga ketelo ya rena, mong wa ntlo a ka nagana ka seo se boletšwego goba a ka thoma go leboga boiteko bjo re bo dirilego bja go mo etela. Mo gongwe a ka bontšha kgahlego ge re boela.

3 Ge o boela go motho yo a bego a swaregile, mo gongwe o ka re:

◼“Ke thabela go go bona gape. Nakong e fetilego ge ke be ke le mo ga se ra kgona go boledišana ka gobane o be o se na nako. Ke a bona gore o motho yo a phelago a swaregilego gomme ke tla bolela ka boripana. Go ka direga gore o tshwenyegile ka bophelo bja gago bjo bobotse bja mmele le bja bao o ba ratago. Lega go le bjalo, na o be o tseba gore Modimo o holofeditše go fediša bolwetši ka moka? Na seo e ka se be se sebotse? [Dumelela karabo.] Ela hloko ntlha e lego go serapa 4 sa pukwana ye yeo e rego ‘Bonang, Dilo ka Moka ke di Dira tše Mpsha.’” Ge e ba nako e dumela, bala serapa gomme o hlalose le lengwe la mangwalo ao a lego botlaseng bja letlakala 4 leo le hlalosago maemo lefaseng le lefsa. Ge e ba mong wa ntlo a rata, mo gongwe o ka kgona go thoma thuto ya legae ya Beibele.

4 Ge o etela gape motho yo a amogetšego pampišana, mo gongwe o ka bolela selo se se swanago le se:

◼“Nakong e fetilego ge ke be ke go bona o ile wa amogela kopi ya pampišana ye ye e nago le sehlogo se se rego Ge e le Gabotse ke Mang yo a Bušago Lefase? Na o hwetša go le thata go dumela gore Sathane o buša lefase le? [Dumelela karabo.] Ela hloko serapa sa pele go letlakala 6.” Bala serapa ke moka o botšiše gore: “Ke ka baka la’ng Sathane a tla nyaka go re fora?” Ka morago ga karabo ya mong wa ntlo, hlahlobang gotee serapa sa bone go letlakala 3. Le ka tšwela pele go hlahloba pampišana ka botlalo, goba mo gongwe o ka rata go rola pukwana ya Na Modimo Ruri o na le Taba le Rena? gomme le ahla-ahle serapa 8 go letlakala 13.

5 Go na le lebaka le le kwalago la gore re be le kgopolo e nepagetšego le go latelela kgahlego yeo re e hwetšago modirong wa rena wa boboledi gaešita lege e bontšhwa go se nene. Ke gabohlokwa go tshwenyega ka ba bangwe, go tutueletšega go ba thuša go ithuta therešo. Mokgatlo wa Jehofa o nea dipuku le dithero tšeo di šišintšwego tšeo di ka re thušago go dira ba bangwe gore ba lemoge dinyakwa tša bona tša moya.—Mat. 5:3, NW.

6 Ge e ba o kile wa ba le poledišano e kgahlišago le motho yo a ka bago a be a thabela go se nene, o se ke wa hlokomologa go boela go ya go hlagolela kgahlego. Go ka feleletša ka go thoma thuto ya legae ya Beibele le go tsenya motho o mongwe tseleng e išago bophelong. Re kgothaletša bohle gore ba tšwele pele ba e-ba le karolo ka kelohloko modirong wo wa go phološa bophelo.—1 Tim. 4:16.