Ke Eng Seo Re Tlago Go Se Fihlelela Ngwageng Wo Wa Tirelo?

1 Ka ge ngwaga wa tirelo wa 1994 o thomile ka September 1, bjale ke nako e swanetšego ya gore ka moka ga rena re le batho ba Jehofa re kgonthiše menaganong ya rena seo re nyakago go se fihlelela re le motho ka o tee le ge re le mokgatlo ngwageng wo o mofsa wa tirelo.

2 Tšwelang Pele le Gola Moyeng: Ge e ba re sa tšwa go kopana le therešo, re swanetše go kganyoga go ba bao ba tiilego tumelong. (Ba-Heb. 6:1-3) Ge e ba re šetše re tiile moyeng, ga se feela gore re swanetše go thuša ba bafsa le ba bangwe, eupja gape re swanetše go ela hloko boemo bja rena ka noši bja moya, le ka mohla re sa nagane gore re na le tsebo yohle e nyakegago ya Beibele le phihlelo bophelong bja Bokriste. Na re bala temana ya letšatši, re sepedišana le lenaneo la mmalo wa Beibele leo le ngwadilwego go Lenaneo la Sekolo sa Bodiredi sa Pušo ya Modimo le go lokišeletša Thuto ya Puku ya Phuthego le Thuto ya Morokami? Yeo e swanetše go ba pakane e nyenyane bakeng sa rena ka moka. Re swanetše go tšwela pele re gola moyeng ge e ba re tla phologa tshenyego ya tshepedišo ye e kgopo ya dilo le go phološetšwa lefaseng le lefsa la Modimo.—Bapiša le Ba-Filipi 3:12-16.

3 Dulang le Hlwekile Moyeng: Gore re amogelwe ka mo go feletšego ke Jehofa, re swanetše go hlatswiwa “thšila tšohle tša nama le tša môya.” (2 Ba-Kor. 7:1) Ge feela re hlwekile, ke ka baka la’ng re ka nyaka go “phsikoloxa leraxeng” la lefase le le kgopo la kgale gape? (Bapiša le 2 Petro 2:22.) Re swanetše go ikemišetša go dula re tiile gomme re hlwekile moyeng. Ka gona re ka se ke ra dula re sa tsebe maano a mabe a Sathane gomme ra fekeetšega, ra wela sebeng le go lahlwa ke Jehofa.—2 Ba-Kor. 2:11.

4 E-kwang Keletšo e Bohlale: Diema 15:22 e re: “Maanô . . . a tlo kxônêxa xe baeletši ba ka ata.” Lega go le bjalo, gopola gore monna yo a boletšego mantšu ao, e lego Salomo ka morago o ile a dumelela ‘basadi ba gagwe ba aroša pelo ya gagwe go latela medimo e šele’ ka gobane a paletšwe ke go kwa keletšo ya Modimo mabapi le go se nyale basadi bašele. (1 Dikx. 11:1-4) Ka gona ka ntle ga gore rena ka noši re kwe keletšo e bohlale, re ka letela bjang gore re atlege tirelong ya Jehofa goba re bee mohlala wo o swanelwago ke go ekišwa? (1 Tim. 4:15) Keletšo ya Beibele e tla re thuša go diša pelo ya rena. (Die. 4:23) Go rata seo Jehofa a se ratago, go hloya seo a se hloilego, go tsoma tlhahlo ya gagwe ka go se kgaotše le go dira seo se mo kgahlago ke tšhireletšo ya kgonthe.—Die. 8:13; Joh. 8:29; Ba-Heb. 1:9.

5 Borapedi bja rena go Jehofa ga se selo seo se itiragalelago feela, ga se sebopego sa boineelo go Modimo bjo bo swanago le bja bao ba ipolelago gore ke Bakriste lefaseng, eupja ke bja phišego le bja mafolofolo ka go dumelelana le therešo yeo e hwetšwago Lentšung la Modimo.—Joh. 4:23, 24.

6 Boikemišetšo bja rena bja go dira thato ya Modimo bo ka hlohlwa letšatši le letšatši. Re swanetše go matlafatšwa ke go tseba gore “mokgatlo ka moka” wa banababo rena o lebeletšane le diteko tše di swanago le gore Jehofa ke yena a tlago go re matlafatša. (1 Pet. 5:9, 10) Ka go rialo re tla kgona go phethagatša bodiredi bja rena ka botlalo ngwageng wa tirelo wa 1994.—2 Tim. 4:5.