“E kwa Mantšu a ba Bohlale”

1. Ke ka baka la’ng re newa keletšo, gona ke ka baka la’ng re e hloka?

KA MOKA ga rena re hloka go dula re eletšwa. Ka nako e nngwe re ka botša motho yo re mo hlomphago gore a re nee keletšo. Maemong a mangwe ngwanabo rena a ka re eletša ge re tšea “kgato e fošagetšego” yeo re tlago go itsholela yona. (Bagal. 6:1) Ka nako e nngwe re ka hwetša keletšo ya go re phošolla ka morago ga ge re dirile phošo. Go sa šetšwe gore keletšo e tla bjang, re swanetše go e kwa. Go theetša keletšo yeo go ka phološa maphelo a rena!—Die. 6:23.

2. Go ya ka Diema 12:15 ke ka baka la’ng re swanetše go kwa keletšo?

² Sehlogo sa rena se re kgothaletša gore re kwe “mantšu a ba bohlale.” (Die. 22:17) Ga go na motho yo a tsebago dilo ka moka, eupša go na le yo a re phalago ka se sengwe. (Bala Diema 12:15.) Ka gona ge re ekwa keletšo re bontšha gore re ikokobeditše. Se se bontšha gore re tseba dilo tšeo re sa kgonego go di dira le gore re hloka thušo gore re fihlelele dipakane tša rena. Jehofa o ile a diriša kgoši Solomone go ngwala gore: “Taba e a atlega mo go nago le baeletši ba bantši.”—Die. 15:22.

3. Re ka hwetša keletšo ka ditsela dife?

³ Re ka hwetša keletšo ka go lebanya goba ge re bala. Re hwetša keletšo bjang ge re bala? Re ka bala ka se sengwe ka Beibeleng seo se ka dirago gore re naganišiše ka sona le gore re fetoše tsela yeo re tlwaetšego go dira dilo ka yona. (Baheb. 4:12) Re hwetša keletšo bjang ka go lebanya? Mogolo goba ngwanabo rena yo a swanelegago a ka re botša phošo yeo re swanetšego go e lokiša. Ge e ba motho a re nea keletšo yeo e tšwago Beibeleng o bontšha gore o a re rata. Ka gona re swanetše go e amogela le go e diriša.

4. Go ya ka Mmoledi 7:9, ke’ng seo re sa swanelago go se dira ge re newa keletšo?

⁴ Re ka hwetša go le thata go diriša keletšo yeo re e newago ka go lebanya. Re ka ba ra kgopišega. Ka baka la’ng? Le ge re tseba gore ga se ra phethagala, eupša go ka ba thata go amogela keletšo ge motho yo mongwe a re botša ka phošo yeo re e dirilego. (Bala Mmoledi 7:9.) Re ka ikemelela. Re ka ipotšiša gore ke ka baka la’ng motho yoo a re nea keletšo, goba ra belaela ka tsela yeo a re neago keletšo ka yona. Re ka nyatša motho yo a re neago keletšo ra ba ra ipotšiša gore: ‘O na le tokelo efe ya go nnea keletšo? Le yena o dira diphošo!’ Ge e ba re sa rate keletšo ya motho yoo re ka kgetha go se ekwe gomme ra inyakela keletšo go motho yo mongwe yoo a tlago go re botša dilo tšeo re nyakago go di kwa.

5. Re tlo ithuta ka’ng sehlogong se?

⁵ Sehlogong se re tlo ithuta ka mehlala ya batho ba ka Beibeleng bao ba ilego ba gana ge ba newa keletšo le bao ba ilego ba e amogela. Re tlo ithuta le gore rena re ka thuša ke eng go amogela keletšo le gore re tlo holega bjang ge re e amogela.

BA ILE BA GANA KELETŠO

6. Re ithuta’ng tseleng yeo Kgoši Rehoboama a ilego a arabela ka yona ge a newa keletšo?

⁶ Nagana ka mohlala wa Rehoboama. Ge a eba kgoši ya Isiraele, batho ba ile ba tla go yena ba mo kgopela se sengwe. Ba ile ba mo kgopela gore a fokotše mošomo wo tatagwe e lego Solomone a bego a ba file wona. Rehoboama o ile a dira selo se sebotse ka gore a ye go bolela le banna ba bagolo ba Isiraele go ba botšiša gore o swanetše go dirang. Banna ba bagolo ba ile ba botša Rehoboama gore ge a ka dira seo ba mo kgopetšego sona, batho ba tlo mo thekga. (1 Dikg. 12:3-7) Rehoboama o be a sa kgotsofatšwe ke karabo yeo a e hweditšego, ka gona o ile a ya a botšiša banna bao a godilego le bona. Banna bao ba be ba le mengwageng ya bona ya bo 40, ka gona ba swanetše go ba ba be ba na le phihlelo. (2 Dikor. 12:13) Ba ile ba mo eletša gampe ka gore a okeletše batho mošomo wo ba bego ba šetše ba na le ona. (1 Dikg. 12:8-11) Rehoboama o ile a hwetša dikeletšo tše pedi tša go se swane, ka gona a ka ba a ile a rapela Jehofa a mmotšiša gore o swanetše go latela keletšo efe. Eupša o ile a kgetha go latela keletšo yeo e mo kgahlago ya batho bao a godilego le bona. Go ile gwa ba le ditlamorago tše mpe go Rehoboama le go Baisiraele. Dikeletšo tšeo re di hwetšago di ka no se re thabiše. Eupša ge di theilwe Beibeleng re swanetše go di amogela.

7. Mohlala wa Kgoši Usia o re ruta’ng?

⁷ Kgosi Usia o ile a gana ge ba mo eletsa. O ile a tsena ka tempeleng ya Jehofa moo go bego go swanetše go tsena baperisita feela, gomme a nyaka go fiša diorelo. Baperisita ba Jehofa ba ile ba re go yena: “Wena Usia, go fišetša Jehofa diorelo ga se mošomo wa gago, eupša ke mošomo wa baperisita.” Usia o ile a arabela bjang. Ge a ka be a ikokobeditše gomme a tloga kamoo tempeleng kapelapela, Jehofa a ka ba a mo swaretše. Eupša ‘Usia o ile a befelwa.’ Ke ka baka la’ng a ile a gana go eletšwa? O be a nagana gore ka ge e le kgoši, o be a na le tokelo ya go dira se sengwe le se sengwe seo a nyakago go se dira. Eupša Jehofa o be a sa dumelelane le yena. Ka ge Usia a dirile seo a bego a sa swanela go se dira, o ile a ba “molephera go fihlela letšatšing leo a hwilego ka lona.” (2 Dikor. 26:16-21) Mohlala wa Usia o re ruta gore go sa šetšwe gore re bo mang, ge e ba re sa latele melao ya Beibele, Jehofa a ka se sa re amogela.

BA ILE BA AMOGELA KELETŠO

8. Jobo o ile a arabela bjang ge ba mo nea keletšo?

⁸ Go se swane le mehlala ya batho bao ba ilego ba gana ge ba newa keletšo, Beibele e re botša ka mehlala ya batho bao ba ilego ba šegofatšwa ka ge ba amogetše keletšo. Nagana ka mohlala wa Jobo. Le ge a be a rata Modimo, o be a dira diphošo. Ka dinako tše dingwe ge a be a gateletšegile, o ile a bolela dilo tšeo di tšwilego tseleng. Ka gona, Jehofa le Elihu ba ile ba mo nea keletšo ka go lebanya. Jobo o ile a arabela bjang? O ile a amogela keletšo yeo. O itše: “Ka gona ke boletše, eupša ke be ke sa kwešiše . . . Ke ka baka leo ke gomišago mantšu a ka, Le gona ke itshola ke le leroleng le meloreng.” Jehofa o ile a šegofatša Jobo ka ge a be a ikokobeditše.—Jobo 42:3-6, 12-17.

9. Moshe o re beetše mohlala o mobotse bjang wa go amogela keletšo?

⁹ Moshe o re beetše mohlala o mobotse wa go amogela keletšo ge a be a phošollwa. Ka letšatši le lengwe, o ile a kwata gomme a se rete Jehofa. Ka gona Moshe o ile a se dumelelwe go tsena nageng ya kholofetšo. (Num. 20:1-13) Ge Moshe a be a kgopela Jehofa gore a tsene nageng ya kholofetšo, Jehofa o ile a re go yena: “O se sa hlwa o bolela le nna gape ka taba ye.” (Doit. 3:23-27) Go fapana le peleng Moshe ga se a kwata, eupša o ile a amogela phetho yeo Jehofa a e tšerego gomme Jehofa a tšwela pele a mo diriša gore a etelele Baisiraele pele. (Doit. 4:1) Jobo le Moshe ba re beetše mehlala e mebotse yeo re ka e ekišago ya go amogela keletšo. Jobo ga se a ipeela mabaka, eupša o ile a fetoša tsela yeo a bego a nagana ka yona. Moshe o bontšhitše gore o amogela keletšo ya Jehofa ka go dula a mmotegela le ge a lahlegetšwe ke tokelo ya go tsena nageng ya kholofetšo.

10. (a) Go ya ka Diema 4:10-13 re tlo holega bjang ge re amogela keletšo? (b) Ba bangwe ba ile ba arabela bjang gabotse ge ba be ba newa keletšo?

¹⁰ Re a holega ge re ekiša mehlala ya go swana le ya banna bao ba bego ba botega ba go swana le Jobo le Moshe. (Bala Diema 4:10-13.) Bana babo rena ba bantši le dikgaetšedi ba ile ba ekiša mohlala wo wa go amogela keletšo. Bona se ngwanabo rena Emmanuel yo a dulago kua Congo a se bolelago ge a be a newa keletšo: “Bana babo rena bao ba godilego moyeng ka phuthegong ba ile ba bona gore ke kgauswi le go senya segwera sa ka le Jehofa gomme ba nthuša. Ke ile ka diriša keletšo ya bona gomme seo sa nthuša go phema mathata a mantši.”b Mmulamadibogo yo a bitšwago Megan wa kua Canada o re: “Ga se ka mehla ke be go ke thabela dilo tšeo ba be go ba mpotša tšona, eupša ke be ke di hloka.” Ngwanabo rena Marko wa kua Croatia o re: “Ke ile ka lahlegelwa ke ditokelo, eupša ge ke nagana ka nako yeo ke a bona gore keletšo yeo ke e hweditšego e nthušitše gore ke tiiše segwera sa ka le Jehofa.”

11. Ngwanabo rena Karl Klein o ile a re’ng ka go amogela keletšo?

¹¹ Mohlala o mongwe wa motho yoo a ilego a holega ge a be a newa keletšo ke ngwanabo rena Karl Klein, yo e be go e le yo mongwe wa Sehlopha se Bušago. Ngwanabo rena Klein o ile a bolela kanegelong ya gagwe ya bophelo gore o ile a hwetša keletšo go tšwa go ngwanabo rena Joseph F. Rutherford, yo e bego e le mogwera wa gagwe yo mogolo. Ngwanabo rena Klein o ile a dumela gore peleng keletšo yeo e ile ya mo kweša bohloko. O itše: “Nakong e nngwe ge ngwanabo rena Rutherford a mpona o ile a ntumediša ka lethabo a re, ‘dumela Karl.’ Eupša ka ge ke be ke sa kwele bohloko ke ile ka leka go mmethiša ka moya. O ile a re: ‘Karl, hlokomela! Sathane o go šetše morago!’ Ke ile ka lewa ke dihlong gomme ka re: Ga go se se ntshwenyago ngwanešo Rutherford. Ka ge a be a tseba gore ke mo kwatetše o ile a tšwela pele ka gore: ‘Ke a kwešiša eupša hlokomela, Sathane o go šetše morago’. O be a bolela nnete! Ge re ka tšwela pele re kwatile ka morago ga gore ngwanabo rena a re nee keletšo, go ba bonolo gore Sathane a re tanye.”c (Baef. 4:25-27) Ngwanabo rena Klein o ile a amogela keletšo yeo a e filwego ke ngwanabo rena Rutherford, gomme ba ile ba tšwela pele e le bagwera.

RE KA THUŠWA KE’NG GORE RE AMOGELE KELETŠO?

12. Boikokobetšo bo ka re thuša bjang gore re amogele keletšo? (Psalme 141:5)

¹² Re ka thušwa ke’ng gore re amogele keletšo? Re swanetše go ikokobetša, re dule re gopola gore ga se ra phethagala le gore ka dinako tše dingwe re ka dira diphetho tša bošilo. Ka ge re boletše pejana, Jobo le yena o ile a dira diphošo, eupša ka morago o ile a fetoša tsela yeo a bego a nagana ka yona gomme Jehofa o ile a mo šegofatša. Ka baka la’ng? Ka gobane Jobo o be a ikokobeditše. O bontšhitše gore o a ikokobetša ka go amogela dikeletšo tšeo Elihu a mo filego tšona le ge Elihu e be e le yo monyenyane go yena. (Jobo 32:6, 7) Go ba le boikokobetšo go tlo re thuša go diriša dikeletšo le ge re ikwa eka re be re sa swanelwa go e newa goba re di filwe ke motho yo e lego yo monyenyane go rena. Mogolo yo mongwe yo a tšwago Canada o re: “Ka ge re sa ipone ka tsela yeo batho ba bangwe ba re bonago ka yona, re ka se kgone go dira diphetogo ge go sena motho yo a re eletšago.” Ke mang mo go rena a sa nyakego go hlagolela dienywa tša moya le go kaonefatša tsela yeo a botšago batho ditaba tše dibotse le go ba ruta?—Bala Psalme 141:5.

13. Re swanetše go ikwa bjang ge re newa keletšo?

¹³ Lebelela keletšo e le tsela ya Modimo ya go bontšha gore o a re rata. Jehofa o re nyakela dilo tše dibotse. (Die. 4:20-22) Ge a re eletša a diriša Lentšu la gagwe e lego Beibele, dikgatišo tšeo di theilwego ka Beibeleng goba Mokriste yo a godilego moyeng, o bontšha gore o a re rata. Baheberu 12:9, 10 e re: “O dira seo a bonago se re loketše.”

14. Re swanetše go lebelela eng ge re newa keletšo?

¹⁴ Lebelela molaetša e sego motho yo o tlilego ka yena. Ka dinako tše dingwe re ka ikwa eka keletšo yeo re e hwetšago ga se ya tla gabotse. Gore re kgone go amogela keletšo, motho yo a re eletšago o swanetše go re eletša ka tsela e bonolo.d (Bagal. 6:1) Eupša ge e ba e le rena re eletšwago re swanetše go lebelela molaetša, le ge e ba re ikwa e ka ga se wa tla gabotse. Re ka ipotšiša gore: ‘Le ge e ba ke sa thabele ka tsela yeo keletšo e tlilego ka yona, nka ithuta’ng go yona? Na nka beela ka thoko diphošo tšeo motho yo a nkeletšago a di dirilego gomme ka lebelela keletšo ka boyona?’ Re tla be re bontšha bohlale ge e ba re ka diriša keletšo e nngwe le e nngwe yeo re e newago.—Die. 15:31.

KGOPELA KELETŠO GORE O TLE O HOLEGE

15. Ke ka baka la’ng re swanetše go kgopela keletšo?

¹⁵ Beibele e re kgothaletša gore re kgopele keletšo. Diema 13:10 e re: “Bohlale ke bja bao ba rerišanago.” Seo ke nnete! Batho bao ba kgopelago go eletšwa go e na le gore ba emele gore ba ba eletše, gantši ba dira tšwelopele e botse go feta bao ba emelago go eletšwa. Ka gona kgopela keletšo o se ke wa letela ge ba go eletša.

16. Ke maemong afe moo re ka kgopelago go eletšwa?

¹⁶ Ke neng moo re swanetšego go kgopela Bakristegotee le rena gore ba re eletše? A re boneng mehlala e mengwe. (1) Kgaetšedi o kgopela mogoeledi yo a nago le bokgoni gore a ye le yena thutong ya gagwe ke moka ka morago o mo kgopela gore a mo eletše gore ke kae mo a ka kaonefatšago. (2) Kgaetšedi yo a sego a nyalwa o nyaka go reka diaparo ke moka o kgopela kgaetšedi yo a godilego moyeng gore a ye a mo thuše go di kgetha. (3) Ngwanabo rena o abetšwe go tlo nea polelo ya phatlalatša la mathomo. O kgopela ngwanabo rena yo a kgonago go nea dipolelo gore a mo theetše ke moka a mo eletše gore a ka kaonefatša kae. Le ngwanabo rena yo a nago le mengwaga e mentši a nea dipolelo a ka dira gabotse ge a ka kgopela bana babo rena ba bangwe bao ba kgonago go nea dipolelo gore ba mo eletše gomme a diriša keletšo yeo.

17. Keletšo e ka re hola bjang?

¹⁷ Ka moka ga rena nakong e tlago re tlo newa keletšo, e ka ba ka go lebanya goba ge re bala Beibele go ba dikgatišo tša rena. Ge seo se direga, nagana ka dintlha tšeo re ithutilego ka tšona. Dula o ikokobeditše. Lebelela molaetša e sego motho yoo o tlago ka yena. Diriša keletšo yeo. Ga go le o tee wa rena yo a belegwego a tseba dilo ka moka. Eupša ge e ba re ‘theetša keletšo gomme re amogela tayo,’ Lentšu la Modimo le re “re tlo hlalefa.”—Die. 19:20.