Thušang Barutwana Ba Beibele Go Lokišetša Thuto Ya Bona
1 Barutwana ba Beibele bao ba lokišetšago thuto ya bona beke le beke ba bontšha kgahlego ya kgonthe thutong gomme gantši ba dira tšwelopele ya kapejana ya moya go feta bao ba sa lokišetšego. Ka dinako tše dingwe morutwana a ka ba a sa lokišetše ka gobane a sa tsebe tsela ya go lokišetša. Go ka nyakega gore o mo rute mokgwa wa go lokišetša. Se se ka dirwa bjang?
2 Di sa tloga fase, tšea nako e nyenyane go kgonthišetša gore morutwana o kwešiša gore go lokišetša go akaretša thuto ya motho ka noši. Batho ba bantši, gaešita lege ba kgona go bala ga se ba ka ba rutwa mokgwa wa go ithuta. Matlakala 33-43 ka go Buka ea Tataiso ea Sekolo sa Boboleli sa Puso ea Leholimo a nea ditšhišinyo tše dintši tše di holago tšeo o ka kgonago go di fetišetša go morutwana ge go nyakega.
3 Bontšha Morutwana Bohlokwa bja Thuto: Mo gongwe o ka bontšha morutwana puku ya gago yeo o swarago thuto ka yona yeo o swailego go yona goba o thaletšego mantšu le mafokwana ao a rwelego moko. Dira gore a bone kamoo go gaša mahlo dikarolong tšeo di swailwego go ka mo gopotšago ka gona ka dikgopolo tšeo a tlago go kgona go di hlalosa ka mantšu a gagwe. Ka go rialo a ka se ke a lekega gore a bale dikarolo ka moka pukung ge a araba dipotšišo. Tlwaetšo e swanetšego boemong bjo e tla mo thuša gore a nee ditlhaloso tše di kwalago ka morago dibokeng tša phuthego. Ditlhaloso tša gagwe di tla bontšha tebogo bakeng sa taba yeo e ithutwago le go bontšha go iša ga kwešišo ya gagwe.
4 Mo Rute go Diriša Beibele: Morutwana o swanetše go ithuta tsela ya go hwetša ditemana tšeo go šupilwego go tšona tabeng yeo e ithutwago. Ge a kgona go dira se ka bokgoni, o tla lemoga ka mo go tletšego gore ka kgonthe ke morutwana wa Beibele. Lege mathomong a ka swanelwa ke go diriša tlhatlamano ya dipuku tša Beibele yeo e lego ka mathomong a Beibele, morutwana o swanetše go kgothaletšwa gore a tlwaelane le tatelano ya dipuku tše 66 tša Beibele. Ge a phetla le go bala temana, mo thuše go hlaola karolo yeo e thekgago ntlha yeo e hlaloswago serapeng seo se ahla-ahlwago gomme a se ke a arošwa ke dikarolo tšeo di sa tswalanego ka go lebanya le thuto ya gona bjale.
5 Ge morutwana a dutše a gatela pele, mo kgothaletše go bala Beibele go tloga mathomong go fihla mafelelong. Gatelela gore Beibele ka moka ke Lentšu la Modimo leo le buduletšwego le gore Bakriste ba therešo ba swanetše go fepša moyeng ke lona.—Mat. 4:4; 2 Tim. 3:16, 17.
6 Rola Dipuku tše Dingwe tša Pušo ya Modimo: Ge morutwana a gatetše pele ka mo go kgotsofatšago, a ka thoma go diriša dipuku tše dingwe tša pušo ya Modimo. Ka bohlale, mo kgothaletše go tsoma tsebišo e oketšegilego ka dipukung tša Mokgatlo tšeo a tlago go tlwaelana le tšona ge a dutše a e-ba gona dibokeng tša phuthego. Mo rute kamoo a ka dirišago ka gona dikarolo tše kgethegilego tša New World Translation, tše bjalo ka “Bible Words Indexed.” Ge a thoma go aga bokgobapuku bja gagwe ka noši bja pušo ya Modimo, mmontšhe kamoo a ka dirišago ka gona Comprehensive Concordance, Go Boledišana ka Mangwalo, Index le di-volume tša Insight.
7 Ge e ba re ruta barutwana ba Beibele mokgwa wa go lokišetša thuto ya bona ya Beibele, re tla ba hlamela go tšwela pele ba gatela pele therešong e le barutwana ba Beibele bao ba nago le bokgoni gaešita le ka morago ga ge thuto ya bona ka noši ya legae ya Beibele e fedile.