Na O Bea Mabaka Ka Mangwalo?
1 Mohlabani yo a nago le phihlelo ge a e-ya ntweng e tla ba yo a itlhamilego ka mo go feletšego le yo a šireletšegilego. Setsebi sa mešomo ya diatla seo se itokišetšago go šoma mošomong o mogolo wa go aga se tla rwala ditlabakelo tšeo se di nyakago bakeng sa go phetha mošomo. Mohlanka wa Jehofa yo a lego bodireding bja tšhemo o tla swara “thšoša” ya gagwe gomme a e kgatikanya ka bokgoni nako lege e le efe ge a hwetša sebaka. (Ba-Ef. 6:17) Na se ke sa therešo ka wena ka noši? Ge o le tirelong, na o dumelela Lentšu la Modimo gore le bolele e le gore moya o mokgethwa o ka kgoma dipelo tša batheetši ba gago?—Die. 8:1, 6.
2 Boboledi ga se ka mehla e lego modiro o bonolo. Mašemong a mangwe batho ke ka sewelo ba bago gae, gomme bao ba arabago mojakong gantši ke bao ba swaregilego, ba nea sebaka se senyenyane bakeng sa dipoledišano tše di nabilego tša Beibele. Ka ge Beibele e le puku ya rena ya motheo e ithutwago, re ka e diriša bjang ka mo go oketšegilego tirelong gomme ra dumelela molaetša wa yona o buduletšwego gore o tutuetše batheetši ba rena?
3 Lebakeng le Lengwe le le Lengwe: Mojakong o mongwe le o mongwe, re tla rata go diriša Beibele go tutuetša mong wa ntlo. Re swanetše go itokišetša go dira se go sa šetšwe puku yeo e sepedišwago. Ge e ba motho a swaregile gomme go se na nako e lekanego ya go bula Beibele le go bala temana goba tše pedi, na o ka tsopola goba wa bolelela temana pele o neela dipuku? Seo se nnoši se ka dira gore motho a eme gomme a theetše.—Ba-Heb. 4:12.
4 Ka mohlala, ge e ba o bolelela Phafoga! ya December 8, 1993 e nago le sehlogo se se rego “Lefase Leo le se Nago Bolwetši,” ka morago ga go šupa seswantšhong se se lego letlakaleng la ka ntle, rotoša potšišo e rego, “Na o dumela gore bolwetši bo tla ka bja fela, gwa ba le nako yeo ka yona yo mongwe le yo mongwe a tlago go thabela bophelo bjo mafolofolo bjo bobotse bja mmele?” Go sa šetšwe karabo, mo gongwe o ka kgona go bala ka go lebanya Beibeleng ya gago goba wa bolelela temana, bjalo ka Jesaya 33:24 goba Kutollo 21:4. Ka tsela ye o dumelela Lentšu la Modimo gore le bolele.
5 Maetong a go Boela: Re swanetše go lokišetša pele re dira maeto a go boela. Lega go le bjalo, gantši ditaba tšeo re sa lokišetšago go di ahla-ahla di tla rotoga. Ye ke nako yeo ka yona Go Boledišana ka Mangwalo e ka ipontšhago e le sedirišwa se se holago. Go tsopola ga rena goba go bala ditemana tšeo di thekgago taba go tšwa pukung ya Go Boledišana go tla thuša batho go lemoga gore re bahlanka ba Modimo e sego babapatši ba Lentšu.—2 Ba-Kor. 2:17.
6 Ge o boela moo go sa kago gwa ahla-ahlwa taba e itšego, mo gongwe o ka fo phetla puku ya Go Boledišana sehlogong seo se swanetšego, se bjalo ka “Jesu Kriste,” “Mehla ya Bofelo” goba “Tsogo” gomme o diriše se sengwe sa dihlogwana go thoma poledišano. Beng ba dintlo ba ka laletšwa go bala tše dingwe tša ditemana go tšwa Beibeleng ya bona ka noši. Ka tsela yeo Beibele e tla ba e phelago go bona, gomme moya wa Jehofa o mokgethwa o tla elela ge e ba e le bao ba sekametšego go lokeng.
7 Boikarabelo bja rena bja go bolela ditaba tše di lokilego le go lemoša ba kgopo ke bjo bogolo. Ke molaetša wa Jehofa e sego wa rena. Dumelela Lentšu la gagwe, e lego tšhoša ya moya gore le go thuše.