Thekga Lenaneo la Seboka sa Phatlalatša la Phuthego ya Geno ka mo go Tletšego
1 Nywageng ye e fetilego lesogana le lengwe le ile la hwetša pampišana ya taletšo yeo e bego e tsebiša diboka tša phuthego ya lefelong la gabo. Ka ge a be a tsoma therešo, o ile a dira phetho ya gore a be gona Sebokeng sa Phatlalatša ka Sontaga sona seo gomme a fihla holong e sa le ka pela. Mogoeledi o ile a mo dumediša ka borutho gomme ge ba le gare ba boledišana, mogoeledi o ile a ithapela go mo swarela thuto ya Beibele yeo a ilego a e gana. Lega go le bjalo, o ile a kgahlwa kudu ke polelo ya phatlalatša yeo e lokišeditšwego gabotse mo a ilego a fetola monagano wa gagwe, gomme ka morago ga seboka a amogela thuto. Lesogana le le ile la dira tšwelopele ya ka pela gomme la kolobetšwa dikgweding tše mmalwa ka morago. Bonyenyane re ka ithuta dithuto tše tharo tše di holago phihlelong ye.
2 Ya pele, Seboka sa Phatlalatša se be se tsebaditšwe. Na o diriša dipampišana tše di gatišitšwego tša taletšo go tsebiša lenaneo la diboka tša phuthego ya geno? Ge modula-setulo a tsebiša sehlogo sa polelo ya phatlalatša yeo e tlago go neelwa bekeng ye e latelago, nagana ka bao ba lego tšhemong ya geno bao ba ka kgahlwago kudu ke taba yeo, go sa šetšwe gore mo nakong ye ba bala dipuku tša rena goba ga ba di bale. Batho ba bangwe ga ba rate go bala, goba ba balela bothateng kudu, eupja ba ka ba ba rata go theetša polelo yeo e theilwego poledišanong ya Mangwalo.
3 Ya bobedi, motho yo mofsa o ile a newa kamogelo e borutho. Ge e ba o rulaganyetša go fihla holong e sa le ka pela ka mo go kgonegago, o ka dumediša banabeno le dikgaetšedi gotee le batho lege e le bafe bao ba thabelago. (Ba-Heb. 10:24) Ge e ba motho yo mofsa e le lekga la pele a e-ba gona, a ka ba a sa tsebe seo a ka se letelago. Hlalosa gore diboka tša rena di thoma ka kopelo le thapelo gomme o mmotše kamoo seboka se tlago go swarwa ka gona. Ge e ba go swanela, mo laletše gore a dule le wena e le gore o kgone go badišana le yena Beibele ya gago le go opela le yena ka pukung ya dikopelo. Mo laletše gore a boledišane le wena ka dipotšišo lege e le dife tšeo a ka bago a e-na le tšona gatee-tee ge seboka se phethilwe.
4 Ya boraro, polelo e be e lokišeditšwe gabotse. Bao ba nago le tokelo ya go emela phuthego e le diboledi tša phatlalatša ba fetša diiri tše dintši ba lokišetša le go boeletša taba e le gore ba tle ba tutueletše batheetši leratong le legolo le medirong e mebotse. Ka moka ga rena re ka tlase ga kgateletšo lehono gomme ditherešo tšeo di lapološago tše di tšwago Lentšung la Modimo ke tšona feela tšeo re di nyakago bakeng sa go re thuša go kgotlelela. Ee, go sa šetšwe gore polelo ya phatlalatša ke yeo e rutago gakaakang, e tla ba yeo e sa holego selo go rena ka noši ka ntle le ge re ka theetša ka kelohloko go seo se bolelwago. Na ka dinako tše dingwe o ba le bothata bja go bea mogopolo polelong? E ka ba mo go thušago go ngwala dintlha ka boripana, go fo swana le ge re fela re dira nakong ya dikopano tša rena. Kgonthišetša gore o bala Beibeleng ya gago ge temana e nngwe le e nngwe ya Lengwalo e balwa le go hlaloswa.
5 Mokgatlo o lokišeditše dipolelo tša phatlalatša ka ditaba tše di fapa-fapanego tša Mangwalo. Sehlopha sa bagolo se rulaganya lenaneo la Seboka sa Phatlalatša la phuthego ka go šoma ka molebeledi yo a okamelago goba ngwanabo rena yo a kgethilwego ke yena. Dihlogo tšeo di ngwadilwego ke Mokgatlo di a kgethwa bakeng sa go ahla-ahla dinyakwa tša phuthego tša mo nakong ye. O se ke wa lahlegelwa ke lege e le efe ya tsebišo ye ya bohlokwa, gomme o thekge Seboka sa Phatlalatša sa phuthego ya geno sa beke le beke ka mo go tletšego.