Letlolo La Dipotšišo

◼ Ke mogato ofe wo o swanetšego go latelwa ge go rolwa ditlamo go phuthego?

 Setlamo se a nyakega ge phetho e swanetše go dirwa mabapi le ditaba tše bohlokwa tše bjalo ka go reka setsha, go mpshafatša goba go aga Holo ya Mmušo, go romela meneelo ye e kgethegilego go Mokgatlo goba go hlokomela ditshenyagalelo tša molebeledi wa tikologo. Gantši ke mo go botse go rola setlamo bakeng sa gore se amogelwe nako le nako ge ditšhelete tša phuthego di abja.

 E le taba ye e arogilego, phuthego e ka ikemišetša go neela tšhelete e itšego go Mokgatlo gatee kgweding e nngwe le e nngwe go okeletša go seo motho yo mongwe le yo mongwe a šetšego a se neela bakeng sa modiro wa boboledi wa lefase ka bophara. Gape, ditshenyagalelo tše di tlwaelegilego mabapi le go dirišwa ga Holo ya Mmušo, tše bjalo ka didirišwa le ditlabakelo tša go hlwekiša ga di nyake go direlwa setlamo.

 Ge go thoma go bonala go nyakega selo se itšego, sehlopha sa bagolo se swanetše go ahla-ahla taba yeo gabotse. Ge e ba bontši bja bona bo dumela gore selo se itšego se swanetše go dirwa, yo mongwe wa bagolo, mohlomongwe yo e lego setho sa Komiti ya Tirelo ya Phuthego o swanetše go lokišetša setlamo seo se ngwadilwego gore se rolwe Sebokeng sa Tirelo.

 Mogolo yo a dirago e le modula-setulo o swanetše go hlalosa ka boripana eupja e le ka mokgwa o kwalago senyakwa seo se lego gona le seo sehlopha sa bagolo se se bolelelago bakeng sa go se hlokomela. Phuthego ke moka e newa sebaka sa go botšiša dipotšišo tšeo di lego mabapi le seo. Ge e ba taba e raragane, go ka ba kaone go diegiša go e boutela go fihlela Sebokeng se se latelago sa Tirelo bakeng sa go nea yo mongwe le yo mongwe nako ya go nagana ka yona. Go bouta ga kgonthe go dirwa ka go emiša matsogo.

 Go boutela setlamo go dirwa feela ke ditho tša phuthego tšeo di ineetšego le go kolobetšwa ka ntle lege dinyakwa tša molao di laela ka tsela e nngwe, ka ge go ka ba bjalo ge go akaretšwa ditaba tša lekgotla goba dikadimo tša ditšhelete tša Holo ya Mmušo. E ka se be mo go swanetšego gore baeng ba tšwago diphuthegong tše dingwe ba be le karolo.

 Ka morago ga ge setlamo se amogetšwe, se swanetše go ngwalwa tšatši-kgwedi, se saenwe le go bewa ka faeleng ya phuthego.