Ba Direng Gore ba Ikwe ba Amogelegile Segopotšong
1 Nywageng e sego kae e fetilego, ke feela motho o tee go ba 3 bao ba bego ba le gona Segopotšong yo e bego e le mogoeledi wa ditaba tše di lokilego. Mohlomongwe go tla ba bjalo le lenyaga. Ba bangwe ba ka ba gona ka go kgothaletšwa ke motswalo goba motho yo ba tlwaelanego le yena yo a dulago motseng o mongwe, mola ba bangwe ba ka ba ba laleditšwe ke bagoeledi ba lefelong leo. Gape ba bangwe bao ba bago gona, gaešita lege ba kolobeditšwe, ga ba sa hlwa ba le mafolofolo bodireding. Re amogela ka go tšwa pelong bohle bao ba bontšhago tlhompho ya go hlompha taelo ya Jesu ya gore: “Dirang byalo e bê xo nkxopola.”—1 Ba-Kor. 11:24; Ba-Roma 15:7.
2 Bahlokomedi bao ba abetšwego ba swanetše go phafogela go amogela yo mongwe le yo mongwe, kudu-kudu motho yo mofsa ge a fihla Holong ya Mmušo. Lega go le bjalo, ka moka ga rena re ka ba le karolo go lateleng mokgwa wa go amogela baeng Segopotšong. (Ba-Roma 12:13) Bjang?
3 Mantšiboeng ao bagoeledi ba bangwe ba tla be ba swaregile kudu ka go rulaganya dinamelwa bakeng sa batho bao ba thabelago. Mo gongwe ba bangwe ba ka kgona go fihla e sa le ka pela gomme ba ba gona bakeng sa go dumediša baeng ba ba itletšego ba nnoši. Ge motho yo a sa tsebjego a tsena ka holong, mo dumediše ka borutho gomme o thome poledišano. Mmotšiše ge e ba a e-na le motho lege e le ofe yo a mo tsebago ka phuthegong ya geno. Ge e ba a le gona, mo hlokomele go fihlela ge motho yoo a fihla. (Bapiša le Luka 10:35.) Ge e ba a sa tsebe motho lege e le ofe, ke ka baka la’ng o sa mo laletše gore a dule le wena nakong ya seboka? Hlalosa kamoo beine le senkgwa di tlago go dirišwa ka gona nakong ya lenaneo. Mo gongwe a ka nyaka thušo ya gago go phetla ditemana tšeo di tsopolwago ke seboledi.
4 Bofelong bja monyanya wa Segopotšo, mo tsebiše gore o thabetše ge a tlile. A ka be a e-na le dipotšišo mabapi le modiro wa rena tšeo o ka di arabago. Go bontšha ga gago kgahlego ya motho ka noši go ka lebiša poledišanong ka taba e itšego ya Beibele, e ka ba Holong ya Mmušo goba lefelong le lengwe. Dithuto tše dibotse kudu di thomilwe ke banababo rena ba phakgamego bao ba tšerego mogato wo wa pele wo o retegago. Pele a tloga Holong ya Mmušo, mo tsebiše go ba bangwe gomme o mo nee taletšo e borutho ya gore a boe.
5 Ke lethabo le lekaakang go amogela banababo rena le dikgaetšedi bao ba rategago bao ba bego ba sa be gona dibokeng ka mehla goba bao ba bego ba se mafolofolo bodireding ka nako e itšego! Go e na le go botšiša dipotšišo mabapi le lebaka leo ka lona ba bego ba sa kopanele, e-fo hlalosa go thabela ga gago ge ba bile gona. Mohlomongwe se sengwe seo ba se kwago polelong ya Segopotšo se tla ba tutueletša go hlahlobišiša lefsa tswalano ya bona le Jehofa ya boineelo. Kamogelo e borutho yeo o ba neago yona le go kgomega ga gago e le ka kgonthe mo o go bontšhago mo gongwe go ka kgoma dipelo tša bona. Ba botše gore o lebeletše pele go ba bona gape.—Ba-Roma 1:11, 12.
6 Polelo e kgethegilego ya phatlalatša e nago le sehlogo se se rego “Bodumedi bja Therešo bo Kgotsofatša Dinyakwa tša Lekoko la Batho” e tla newa diphuthegong tše dintši ka April 10. Kgonthišetšang gore bohle bao ba bago gona monyanyeng wa Segopotšo ba a laletšwa gomme ba thušwa gore ba be gona. Ke kholofelo ya rena gore bao ba bago gona dibokeng tše tše di kgethegilego eka ba ka ikwa ba amogelegile gomme ba thabela moya o borutho wa bogwera gare ga batho ba Jehofa.—Ps. 133:1.