Sepedišang Puku ya Dipotšišo tša Bafsa
1 Mehla ye ya gona bjale e ipontšhitše e le nako e thata kudu bakeng sa bafsa ka kakaretšo. Go na le batswadi ba bantši le bafsa bao ba tshwenyegilego ka mathata ao a gakantšhago bafsa. Bakeng sa go ba thuša, re tla be re sepediša puku ya Dipotšišo tša Bafsa tšhemong ka March. Mohlomongwe o šetše o agile thero yeo o tlago go rata go e diriša. Goba mohlomongwe o ka rata go diriša a mangwe a matseno a a latelago:
2 Ka morago ga tumedišo e botse, mo gongwe o ka bolela se sengwe se se swanago le se:
◼ “Go golela mehleng ye e thata ga go bonolo. Bafsa ba lebeletšane le maemo a mantši a mafsa ao a ba nyakago gore ba dire diphetho tše bohlokwa. ‘Na ke swanetše go nwa? Na ke swanetše go diriša dihlare-tagi? Boitshwaro bjo bo swanetšego ke bofe ge ke e-na le batho ba bong bjo bo sa swanego le bja-ka?’ Ge bafsa ba botšiša ka dikgang tše tša motheo, gantši ba kgobelelwa ka dikarabo tše di ganetšanago. O nagana gore ba bantši ba bona ba retologela kae bakeng sa keletšo? [Dumelela ditlhaloso.] Puku ye, Dipotšišo tša Bafsa le Dikarabo tše Šomago e nea tsebišo e holago. [Lebiša tlhokomelo lelokelelong la dikagare, o bontšha dihlogo tše di fapa-fapanego tše di akaretšwago.] Bafsa ba nyaka dikarabo tšeo di lebanyago le tša kgonthe. Dikarabo tše di lego ka pukung ye di thekgwa ke seo se bolelwago ke Beibele. O ka thabela puku ye e thušago le ya diswantšho tše di botse ka moneelo wa R4,50 feela.”
3 Thero e nngwe yeo mo gongwe o ka kgonago go e diriša še:
◼ “Bafsa ba bantši ba ka tlase ga dikgateletšo tše dintši lehono. Ba nyaka thušo ya go lebeletšana le tšona ka katlego. Ge re dira sohle seo re se kgonago go ba thuša, na ga re tsome selo se sengwe seo se neago tlhahlo e holago? [Dumelela tlhaloso.] Tše dingwe tša dikgateletšo tše di tseneletšego kudu di tšwa go bafsa ba bangwe, e lego dithaka tša bona. Ela hloko diswantšho tše di lego go matlakala 76 le 77 ka pukung ye. [Lebiša tlhokomelo go ditlhaloso tša diswantšho tše le go dirapa tšeo di ngwadilwego ka mongwalo wo o sekamego go letlakala 77.] Matlakala ao a latelago kgaolong ye a hlalosa dikarabo tše di botegago le tše di šomago. [Mo nee puku.] Ke ya gago ka moneelo wa R4,50.” Ge e ba mpho ya puku e sa amogelwe, o ka kgetha go ahla-ahla dintlha tše di swanetšego ka pampišaneng ya Na Lefase le le tla Phologa?
4 Kgonthišetša gore o laletša motho lege e le ofe yo a bontšhago kgahlego gore a be gona Segopotšong ka March 26. Gape ba laleletše polelong e kgethegilego e rego “Bodumedi bja Therešo bo Kgotsofatša Dinyakwa tša Lekoko la Batho” yeo e tlago go newa lefaseng ka moka ka April 10.
5 Ruri ye ke “mehla e thata go lebeletšana le yona,” kudu-kudu bakeng sa bafsa. (2 Tim. 3:1, NW) Puku ya Dipotšišo tša Bafsa e ka thuša mofsa e le ka kgonthe go lebeletšana le ditlhohlo tša lehono ka katlego. Dikgaolo tše 39 di na le diswantšho tše dintši, gomme dihlogo tša gona ke tša kgonthe le tše di šomago. Ka gona nako lege e le efe ge sebaka se tšwelela, phafogela go diriša puku ye e botse.