Bafsa—Thabišang Pelo Ya Jehofa

1 Ge motho a diriša matla le mafolofolo a bofsa ka tsela e nepagetšego, bophelo e ka ba bjo bo thabišago e le ka kgonthe. Kgoši Salomo yo bohlale o ngwadile gore: “Wene Lesoxana! Ithabêlê Ò sa le bofseng bya xaxo, O tsefêlwa ke matšatši a bofseng bya xaxo.” (Mmo. 11:9) Lena bafsa le ikarabela go Modimo ka ditiro tša lena.

2 Tsela yeo o phelago bophelo bja gago ka yona e dira phapano e sego go wena feela, eupja le go batswadi ba gago. Diema 10:1 e re: “Ngwana yo bohlale ó kxahla tat’axwe; ’me ngwana wa lešilo ó nyamiša mm’axwe.” Eupja sa bohlokwa le go feta ke gore, tsela yeo o phelago bophelo bja gago ka yona e kgoma Mmopi wa gago, Jehofa Modimo. Ke ka baka leo Diema 27:11 le yona e kgothatšago bafsa ka gore: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” Lena bafsa le ka thabiša bjang pelo ya Jehofa mehleng yeno? Se se ka phethwa ka ditsela tše dintši.

3 Ka Mohlala o Mobotse: Lena bafsa le lebeletšana le “mabaka a mathata” ao a boletšwego e sa le pele Lentšung la Modimo. (2 Tim. 3:1) Gape le ka gateletšwa ke bao le tsenago le bona sekolo ba ba sa dumelego gaešita le barutiši bao ba ka kwerago dikgopolo tša lena tše di theilwego Beibeleng. Ka mohlala, morutiši yo mongwe o ile a bolelela kgopolo ya tlhagelelo e le therešo gomme Beibele e le nonwane. Lega go le bjalo, mogoeledi wa mofsa ka klaseng yeo o ile a lwela Beibele ka potego. Ka baka leo, go ile gwa thongwa dithuto tše dintši tša Beibele. Ba bangwe bao ba thabelago ba ile ba thoma go ya dibokeng. Tumelo ya lena banababo rena le dikgaetšedi ba bafsa e latola lefase leo le sa boifego Modimo gomme e gogela ba dipelo tše di botegago therešong.—Bapiša le Ba-Hebere 11:7.

4 Na o ka kgothatša dithaka tša gago ka phuthegong gore di se ke tša ineela bobeng? Ka go bea mohlala o mobotse sekolong, ka gae le ka phuthegong, o ka matlafatša tumelo ya bagoeledi ba bangwe ba bafsa. (Ba-Roma 1:12) Thabiša pelo ya Jehofa ka go beela ba bangwe mohlala o mobotse.

5 Ka Moaparo le go Itokiša: Kgaetšedi yo mongwe wa mofsa o be a kwerwa le go kodutlwa ka baka la moaparo wa gagwe wa bothakga, e bile a bitšwa “yo a sa kgongwego.” Se ga se sa ka sa mo tšhoša gore a itumelelanye le ditekanyetšo tša lefase tša go se boife Modimo. Go e na le moo, o ile a hlalosa gore ke yo mongwe wa Dihlatse tša Jehofa gomme o kgomaretše tekanyetšo e phagamego ya Dihlatse. Na o na le sebete se bjalo? Goba na o dumelela lefase la Sathane gore le go dire gore o nagane le go itshwara ka tsela ya lona? Ke mo go thabišago gakaakang go bona ba bantši ba lena bafsa ba e-kwa thuto ya Jehofa gomme ba gana meaparo ya bošaedi, yeo e lego nakong, medingwana ya diswantšho le dithuto tša lefase. Ka kgonthe, re swanetše go lemoga gore dilo tšeo tše di tšwago lefaseng di tutuetšwa ke batemona!—1 Tim. 4:1.

6 Ka Kgetho ya Boithabišo le Boitapološo: Batswadi ba swanetše go dula ba gopola bohlokwa bja go thuša bana ba bona go kgetha mohuta o swanetšego wa boithabišo le wa boitapološo ka bohlale. Ngwanabo rena yo mongwe o ile a reta lapa le lengwe le lebotse leo a ilego a le rata kudu. Ka ge ba be ba sekametše dilong tša moya, batswadi ba be ba nea tlhahlo yeo e bego e bile e dirišwa boitapološong bja lapa. Ngwanabo rena o itše: ‘Ke rata go dira ga bona dilo gotee. Ga se feela gore batswadi ba thuša bana go lokišetša bakeng sa tirelo, eupja ge e le nako ya boitapološo ba thabela go fo sepela ba thobolla maoto, go etela mebusiamo goba go fo dula gae ba bapala goba ba šoma mešomo. Go ratana ga bona le go rata ga bona ba bangwe go go dira gore o ikwe o kgodišegile gore ba tla sepela therešong nakong e tlago go sa šetšwe seo se diregago.’

7 Ee, go na le dinako tšeo go sa kgonegego gore lapa ka moka le itapološe le go ithabiša. Lena bafsa le swanetše go lemoga se le bohlokwa bja go kgetha kamoo le tlago go diriša e nngwe ya nako ya lena ya boiketlo ka gona. Sathane o ikemišeditše go aroša ba bantši ka mo go kgonegago. Ba bafsa le bao ba se nago phihlelo ke bao ba hlaselegago gabonolo ka mo go kgethegilego ditirong tša gagwe tša bohwirihwiri le kgoketšong ya boradia. (2 Ba-Kor. 11:3; Ba-Ef. 6:11) Ka gona lehono Sathane o diriša mekgwa e fapa-fapanego go le tutuetša gore le aroge gomme le phegelele bophelo bja go tsoma ka boithati maipshino le bobe.

8 Thelebišene ke segoketši se segolo seo se godišago mokgwa wa bophelo wa go rata dilo tše di bonagalago le wo o gobogilego. Dipaesekopo le di-video ka mehla di bontšha bošoro le dikopano tše di gobogilego tša botona le botshadi. Mmino o tumilego o fetogile o gobogilego le o lešago dihlong ka mo go oketšegago. Dikgoketšo tša Sathane di ka bonala e le tše di se nago molato, fela di weditše bafsa ba dikete ba Bakriste moreong wa go nagana le go itshwara ka tsela e fošagetšego. Gore o gane dikgateletšo tše bjalo, o swanetše go phegelela go loka ka phišego. (2 Tim. 2:22) Ge e ba go nyakega dipeakanyo monaganong goba boitshwarong bja gago mabapi le boithabišo le boitapološo, di ka dirwa bjang? Mopsalme o nea karabo: “Ke Xo nyaka ka pelo ka moka; a nkê ke se aroxanê le ditaêlô tša xaxo.”—Ps. 119:10.

9 Go dirwa ga dinaletšana tša dipapadi le tša mmino medingwana ke mo go atilego. Go boifa Jehofa go tla go thuša go široga go dira batho ba sa phethagalago medingwana. Gaešita le boitshwaro bjo bo gobogilego bja botona le botshadi bo dirilwe modingwana ke ba bantši lehono. O ka itiša malebana le tshekamelo ye ka go phema diswantšho tša bootswa le mmino o gobošago. Mabapi le mmino, tokollo ya Morokami ya April 15, 1993 e itše: “Mmino ke mpho ya Modimo. Lega go le bjalo, go ba bantši o fetogile selo se se sa agego seo ba swaregago kudu ka sona. . . . Ikemišetše go bea mmino mo o swanetšego gona, gomme o dire gore modiro wa Jehofa e be selo seo o tshwenyegago ka sona kudu. E-ba yo a kgethago gomme o be šedi mabapi le mmino wo o o kgethago. Ka gona o tla kgona go diriša—e sego go diriša gampe—mpho ye ya Modimo.”

10 Hlagolela go hlaswa ka mo go feletšego se e lego se sebe. (Ps. 97:10) Ge o lekega go dira bobe, nagana kamoo Jehofa a lebelelago taba ka gona gomme o naganišiše ka mafelelo: go ima mo go sa nyakegego, malwetši ao a fetišwago ka dikopano tša botona le botshadi, go gatakelwa maikwelong, go lahlegelwa ke boitlhompho le go lahlegelwa ke ditokelo ka phuthegong. Phema go ipea kotsing ya dipontšho tša TV, dipaesekopo, di-video, dikoša goba dipoledišano tše di kgothaletšago bokgopo. Phema go gwerana le bao Beibele e ba bitšago “mašilo.” (Die. 13:19) E-ba yo a kgethago; kgetha bagwera ba kgaufsi bao ba ratago Jehofa le ditekanyetšo tša gagwe tša go loka ka phuthegong.

11 Ee, bafsa bao ba tlogago ba nyaka go thabiša pelo ya Jehofa ba tla kwa keletšo e botse yeo e hwetšwago go Ba-Efeso 5:15, 16 e rego: “Ké xôna phakxamêlang xo swara tsela ka xo itôta; Le se etšê mašilo, Le etšê bahlale. Le thakanêlê sebaka se botse; xobane mehla yeno ké e mebe.” Ke eng seo se tlago go go thuša go dula o ‘phakgametše’ tšwelopele ya gago mehleng ye ya bofelo?

12 Go Hlokomela Dinyakwa tša Moya: Go Mateo 5:3 (NW), Jesu o hlalositše gore: “Go thabile bao ba lemogago dinyakwa tša bona tša moya.” Le wena o ka ba yo a thabilego ka go lemoga dinyakwa tša gago tša moya. Go kgotsofatša senyakwa seo go akaretša go ba le karolo ka mafolofolo boboleding bja ditaba tše di lokilego, ka ge se se aga tumelo ya rena dilong tšeo re ithutago tšona.—Ba-Roma 10:17.

13 Go tšwa phihlelong ya gago ka noši o a tseba gore ga se ka mehla go lego bonolo go ba le karolo ka mehla bodireding. Bogolo bja se e ka ba e le ka baka la go se ikholofele. Ka gona, go nyakega boikemišetšo bja gago bjo bo tiilego. Ka go ba le karolo ka mehla bodireding, o tla loutša bokgoni bja gago bja go nea bohlatse le go aga kgodišego bakeng sa bokgoni bja gago bja go bolela.

14 Dira dithulaganyo tša go šoma le bagoeledi bao ba nago le phihlelo e kgolo ka phuthegong, bjalo ka babulamadibogo ba ka mehla le bagolo. Theetša dithero tša bona ka kelohloko le kamoo ba lebeletšanago le dikganetšo mojakong ka gona. Diriša ka mo go holago puku ya Go Boledišana le ditšhišinyo tšeo di newago go Tirelo ya Rena ya Mmušo. Go se go ye kae o tla hwetša lethabo le legolo bodireding ka gobane o nea Jehofa sohle seo o nago le sona.—Dit. 20:35.

15 Ba bangwe ba kgonne go diriša ka mo go holago dibaka tša go nea bohlatse sekolong gomme e bile bao ba atlegago kudu go direng barutiwa. (Mat. 28:19, 20) Mofsa yo mongwe wa Mokriste o re: “Ke bile le dibaka tše dintši tša go nea bohlatse dinakong tša ge go se na morutiši ka klaseng, kudu-kudu ge go batamela matšatši a maikhutšo. Ge ke be ke tlogetše dipuku tša Beibele godimo ga teseke ya-ka moo ba bangwe ba ka kgonago go di bona, barutwana ba bantši bao ba thabelago ba ile ba tla go nna.” Mafelelong, barutwana ba bantši gotee le morutiši ba ile ba thoma go ya dibokeng tša Bokriste. Ge e le gabotse, morutiši o tšwetše pele go fihla ntlheng ya go ba Hlatse e kolobeditšwego. Jehofa o thaba kudu ge barapedi bao e lego bafsa go etša lena ba tliša theto leineng la gagwe.

16 Tsela e nngwe ya go kgotsofatša tlala ya gago ya moya ke ka thuto ya motho ka noši. Gore re thabiše pelo ya Jehofa, re swanetše go mo tseba, re tsebe merero ya gagwe le tšeo a di nyakago go rena. Na o beela nako ka thoko bakeng sa thuto ya motho ka noši? Na o ithuta ka mehla, go fo swana le ge o e-ba le nako ya go ja ka mehla? (Joh. 17:3) Na o na le lenaneo la gago ka noši bakeng sa go bala Beibele go tlaleletša tabeng ya go leka go sepedišana le lenaneo la mmalo wa Beibele la Sekolo sa Bodiredi sa Pušo ya Modimo? Na o lokišetša gabotse bakeng sa diboka ka moka? Na o bala dimakasine tša Morokami le Phafoga! ka mehla? Ka mo go kgethegilego, na o ba le nako ya go bala sehlogo se sengwe le se sengwe lelokelelong la “Bafsa ba a Botšiša . . . ,” o bala ka kelohloko lengwalo le lengwe le le lengwe? Le gona o se ke wa lebala puku yeo Mokgatlo o e lokišeditšego ka mo go kgethegilego bakeng sa dinyakwa tša gago tša moya, e lego Dipotšišo tša Bafsa le Dikarabo tše Šomago. Bafsa ba Bakriste le batswadi ba bona lefaseng ka moka ba ngwadile go hlalosa kamoo puku ye e ba thušitšego go batamela kgaufsi le Jehofa ka gona.

17 Ge o bala Beibele le dithušo tša go ithuta Beibele tša tša pušo ya Modimo, di go botša ka Jehofa, kgopolo ya gagwe le merero ya gagwe. Nagana kamoo tsebišo ye e ka bago e holago ka gona go wena. Tswalanya seo o se balago le seo o se badilego nakong e fetilego. Se se akaretša go naganišiša. Go naganišiša go dumelela tsebišo gore e fihlelele pelo gomme e go tutuetše.—Ps. 77:12.

18 Re thabela go bona bafsa bao ba lemogago tlala ya bona ya moya ba e-ba gona dibokeng tša phuthego. Lena bafsa ba Bakriste le ka kgothatša ba bangwe ka go nea ditlhaloso tše di kwalago ka mehla nakong ya diboka. Ikemišetšeng go nea bonyenyane tlhaloso e tee sebokeng se sengwe le se sengwe. Godišang ditswalano tše botse le batho ba dihlopha tša bogolo ka moka ka phuthegong ka go ba le segwera se se agago pele le ka morago ga diboka. (Ba-Heb. 10:24, 25) Ngwanabo rena yo mongwe wa mofsa o hlalositše gore batswadi ba gagwe ba mo kgothaleditše gore a boledišane bonyenyane le ngwanabo rena yo a godilego goba kgaetšedi sebokeng se sengwe le se sengwe. Lehono o lebelela phihlelo yeo a e hweditšego ka go gwerana le ditho tše di godilego tša phuthego e le ya bohlokwa.

19 Phegelela Dipakane tša Moya: Ke mo go nyamišago gore maphelo a bafsa ba bantši ga a na morero le tlhahlo. Lega go le bjalo, na ga se mo gobotse go ba le maikwelo ao a tlišwago ke go ipeela dipakane tša pušo ya Modimo le go di fihlelela ka katlego? Dipakane tše, ge di phegelelwa ka tshedimošo ya thuto ya Modimo e tla ba tše di kgotsofatšago go wena ka noši gona bjale gomme mafelelong di tla lebiša phologong ya ka mo go sa felego.—Mmo. 12:1, 13.

20 Ge o ipeela dipakane, di rapelele. Boledišana le batswadi ba gago le bagolo. Itlhahlobe gotee le bokgoni bja gago gomme o bee dipakane tše di lekanetšego go ya ka seo o kgonago go se fihlelela, o sa ipapiše le motho yo mongwe. Motho yo mongwe le yo mongwe o bopegile ka mo go fapanego—mmeleng, monaganong, maikwelong le moyeng. Ka gona, o se ke wa letela gore o fihlelele selo se sengwe le se sengwe seo motho yo mongwe a se dirago.

21 Dipakane tše dingwe tšeo o ka di katanelago ke dife? Ge e ba o se wa hlwa o e-ba mogoeledi goba o se wa hlwa o kolobetšwa, ke ka baka la’ng o sa di dire dipakane tša gago? Ge e ba o le mogoeledi, o ka ipeela pakane ya go diriša tekanyo e itšego ya nako bodireding beke e nngwe le e nngwe. Katanela go ba morutiši yo a nago le bokgoni maetong a go boela gomme o ipeele pakane ya go swara thuto ya Beibele. Ge e ba o le mofsa yo a kolobeditšwego yo a sa lego sekolong, ke ka baka la’ng o sa ipeele pakane ya go ba mmulabadibogo wa go thuša dikgweding tša selemo? Go na le “mo gontši mo le ka go dirago modirong wa Morena.”—1 Ba-Kor. 15:58, NW.

22 Thušo ya Batswadi e a Nyakega: Bafsa ka phuthegong le ka mohla ga se ba swanela go nagana gore ba tee maitekong a bona a go hwetša bophelo. Jehofa ka mokgatlo wa gagwe, o neile keletšo bakeng sa go thuša bafsa ba go dira diphetho tša letšatši le lengwe le le lengwe le go fenya mapheko bophelong. Ee, batswadi bao ba ineetšego ba na le boikarabelo bjo bogolo bja go thuša bana ba bona go dira diphetho tše di nepagetšego. Go 1 Ba-Korinthe 11:3, Beibele e bitša monna gore ke hlogo ya lapa. Ka gona ka lapeng la Bokriste leo mosadi a dirišanago kgaufsi-ufsi le yena, tate o etelela pele go ruteng bana melao ya Modimo. (Ba-Ef. 6:4) Se se dirwa ka tlwaetšo e etšwego hloko yeo e thomago boseeng. Ka ge bogolo bja bjoko bja ngwana bo ipoeletša ka makga a mararo ngwageng wa pele wa bophelo, batswadi le ka mohla ga se ba swanela go nyatša bokgoni bja lesea la bona bja go ithuta. (2 Tim. 3:15) Ge bana ba dutše ba gola, batswadi ba swanetše go ba ruta ka mo go tšwelago pele go rata Jehofa le go godiša tswalano e botse le yena.

23 Mohlala o mobotse wa batswadi ke lefelo le kaone leo go ka thongwago go lona. Se se tla dira mo gontši go thušeng bana ba lena moyeng go feta go fetša nako e ntši le bolela le bona mabapi le seo ba swanetšego goba ba sa swanelago go se dira. Go bea mohlala o mobotse wa batswadi go tla akaretša go bontšha dienywa tša moya ka lapeng, go molekane wa gago le baneng ba gago. (Ba-Gal. 5:22, 23) Ba bantši ba bone go tšwa phihlelong gore moya wa Modimo ke tutuetšo e matla e holago. O ka go thuša go bopa menagano le dipelo tša bana ba gago.

24 Gape batswadi ba swanetše go bea mohlala o mobotse mekgweng ya thuto ya motho ka noši, go beng gona dibokeng le go ba le karolo ka mehla bodireding bja tšhemo. Ge e ba o bolelela therešo ka phišego ka lapeng, o etelela pele ka mafolofolo bodireding e bile o gatelela thuto ya motho ka noši, bana ba gago ba tla tutueletšega go kgahlegela ditaba tša moya e le ka kgonthe.

25 Ge e ba e lokišeditšwe ka šedi, thuto ya ka mehla e nago le morero ya lapa ya Beibele e ka ba e kgahlišago le e thabišago, e lego nako ya go kgonthišetša botee bja lapa. Dirišang nako ye go fihlelela dipelo tša bana ba lena. (Die. 23:15) Lege malapa a mantši a dirišetša sebaka se go lokišetša Thuto ya beke le beke ya Morokami, nako le nako e tla ba mo go kgothatšago go nagana ka senyakwa se itšego sa lapa. Go botšiša dipotšitšo tše di nyakago pono ya motho le go theetša ditlhaloso tša setho se sengwe le se sengwe sa lapa e tla ba mo go sedimošago le mo go lapološago. Go swara thuto yeo e holago setho se sengwe le se sengwe sa lapa ke tlhohlo e kgolo go hlogo ya lapa. Eupja ke mo go putsago gakaakang ge bohle ba gola moyeng! Ka go akaretša yo mongwe le yo mongwe, go tla aparela moya wa lethabo.

26 Tlwaetšo ya lena e lerato le ya bokgoni bjale e a nyakega bakeng sa go phološa maphelo a bana ba lena. (Die. 22:6) Ge le dutše le nagana ka se, go bonolo go kwešiša gore se e ka ba thuto e bohlokwa kudu yeo le tlago go e swara ka mehla. Le ka mohla le se ke la nagana gore le tee modirong wo o kgethegilego le o bohlokwa. Ithuteng go ithekga ka mo go feletšego ka Jehofa bakeng sa tlhahlo ya go hlokomela boikarabelo bja lapa la lena. Ga go felele moo. Go na le ba bangwe bao ba ka thušago kudu ka mo go swanago.

27 Seo ba Bangwe ba ka se Dirago go Thuša: Bagolo ba ka akaretša bafsa gotee le batswadi ba bona go hlwekišeng Holo ya Mmušo. Kgothatšang bana dibokeng tša phuthego. Bagolo le bahlanka ba bodiredi bao ba abetšwego dikarolo Sebokeng sa Tirelo ba swanetše go lebelela matsogo a manyenyane ao a emišitšwego ge go e-na le dikarolo tšeo batheetši ba tšeago karolo go tšona. Tsomang dibaka tša go diriša bafsa bao ba beago mohlala o mobotse dipontšhong gotee le batswadi ba bona. Go ka boledišanwa le ba bangwe gomme ba nee ditlhaloso tše kopana.

28 Le se ke la tšeela maiteko a bona tlase. Bafsa ba ipontšhitše e le mohola wa kgonthe ka phuthegong. Ka boitshwaro bja bona bjo bobotse, ba bantši ba ‘thakgile thuto ya Modimo Mophološi wa rena.’ (Tito 2:6-10) Phafogelang bohlokwa bja go reta bana bao ba tšeago karolo le ka tsela e nyenyane. Se se ba kgothaletša gore ba lokišetše gomme ba be le kganyogo ya go se dira gape nakong e tlago. Kgahlego e bjalo e ka se ke ya elwa; ke ya bohlokwa bjo bo sa lekanywego. Ke gakae wena bjalo ka mogolo goba mohlanka wa bodiredi o ilego wa batamela ditho tša bafsa tša phuthego go di reta bakeng sa polelo goba pontšho ye di e neetšego sebokeng?

29 Babulamadibogo, ke eng seo le ka se dirago bakeng sa go thuša? Ke ka baka la’ng le sa hlahlobe lenaneo la lena go bona kamoo le ka akaretšago bana ba sekolo ka gona dithulaganyong tša lena thapama le mafelo-bekeng? Na le bolela ka mo go kgahlišago ka kgetho ya lena ya tirelo ya nako e tletšego? Na le bontšha ka dika tša lena tša sefahlego gore le hwetša lethabo bodireding bja lena? Na o bo bolelela ka go se dika-dike go ba bangwe, kudu-kudu bafsa? Ge le šoma ka ntlo le ntlo, na polelo ya lena ke e agago le e kgahlišago? Ge e ba go le bjalo, gona bjalo ka mmulamadibogo le wena o tšea karolo modirong wo wa bohlokwa bjo bo fetišago wa tlwaetšo.

30 Bohle ka phuthegong ba swanetše go phafogela e le ka kgonthe modiro wo o bohlokwa wa go tlwaetša bafsa. Na le ka dira dithulaganyo tše di kgonthišeditšwego tša go šoma le bona bodireding bja tšhemo? Na le ka itlwaetša thero le bona ge le lokišeletša modiro wa ntlo le ntlo? Na le phafogela dibaka tša go kgothaletša mediro ya nakong e tlago ya moya ge le šoma gotee bodireding? Mogoeledi yo mongwe le yo mongwe o swanetše go lemoga gore gaešita le tlhaloso e kopana e ka tutuetša dikgopolo tše di nepagetšego mabapi le dipakane tša bophelo ka moka tša moya, bakeng sa go holega ga mofsa ka mo go sa felego.

31 Bafsa ba ka Ithuša: Bafsa, re kgothaletša yo mongwe le yo mongwe wa lena gore a dule a e-kwa dithuto tša Jehofa gomme a gane seo se newago ke lefase. Itekeng ka mo go tšwelago pele ka go hlahloba boitshwaro bja lena le maikwelo a lena a ka gare. Kgopolo ya lena ka Jehofa le seo a se letetšego go lena bophelong bja letšatši le lengwe le le lengwe ke efe? Na le lwa ka matla le tutuetšo ya dikgopolo tša Sathane? (1 Tim. 6:12) Ka ge batho, kudu-kudu bafsa, ka tlhago ba kganyoga go amogelwa ke dithaka tša bona, na le ikhwetša le goketšega gore le latele mogofe go direng se sebe? (Ek. 23:2) Moapostola Paulo o be a kwešiša gore go na le kgateletšo e kgolo ya go itumelelanya le ditsela tša lefase.—Ba-Roma 7:21-23.

32 Go nyaka sebete go gana tutuetšo ya lefase, go tšea tsela e fapanego le ya dithaka tša lefase le go kwa dithuto tša Modimo. Banna ba bogologolo ba dirile bjalo ka katlego e kgolo. Ela hloko sebete sa Noage. O ile a nyatša lefase ka moka ka tumelo ya gagwe le ka go dula a arogile go bafoši ba mehleng ya gagwe. (Ba-Heb. 11:7) E-lwa ka matla ka gobane ke mo go swanelwago ke boiteko. O se ke wa ekiša bao ba fokolago, bao ba se nago matla a semelo le ba ba boifago bao ba latelago lešaba la Sathane. Ka mo go fapanego, tsoma segwera sa bao ba amogelegago mahlong a Jehofa. (Ba-Fil. 3:17) E-ba gare ga bagwera bao ba tlago go sepedišana le wena le bapelane go tsena lefaseng le lefsa leo le holofeditšwego la Modimo. (Ba-Fil. 1:27) Dula o gopola gore go na le tsela e tee feela yeo e išago bophelong bjo bo sa felego.—Mat. 7:13, 14.

33 Ge e ba re thabišwa ke go bona bafsa ba tliša theto le kgodišo go Modimo wa rena, se se swanetše go ba se mo thabiša gakaakang! Ga go na pelaelo gore Jehofa o thabišwa ke go bona bafsa ba e-ba le karolo e tletšego go goeletšeng merero ya gagwe e kgahlišago. Ke “lefa,” (NW) le le tšwago go yena, gomme o ba kganyogela tše kaone feela. (Ps. 127:3-5; 128:3-6) Ka go bontšha kgahlego ya Tatagwe, Kriste Jesu o ile a thabela kudu go ba gotee le bana, gomme o ile a diriša nako go ba kgothatša borapeding bja bona go Jehofa. O bontšhitše maikwelo a borutho go bona. (Mar. 9:36, 37; 10:13-16) Na re lebelela bafsa ba rena ka tsela e swanago le yeo Jehofa le Kriste Jesu ba ba lebelelago ka yona? Na bafsa ka diphuthegong tša rena ba lemoga kamoo Jehofa le barongwa ba lebelelago potego ya bona le mohlala wa bona o mobotse ka gona? Ba swanetše go retwa le go kgothaletšwa go thabiša Jehofa ka go katanela dipakane tša moya. Bafsa, phegelelang dipakane tšeo di tlago go le tlišetša ditšhegofatšo gona bjale le nakong e tlago.