Go Hwetša ba ba Thabelago ka go Nea Bohlatse mo go Atlegago Setarateng
1 Jesu o laetše barutiwa ba gagwe gore ba tsome ba ba swanelegago go kwa ditaba tše di lokilego tša Mmušo. (Mat. 10:11) Lega go le bjalo, mafelong a mantši lehono go ba thata ka mo go oketšegago go gahlana le batho magaeng a bona. Ka gona, go ka dirwa’ng gore go fihlelelwe ba ba swanelegago ba ba sa hwetšwego?
2 Go nea bohlatse setarateng e ka ba tsela e atlegago ya go hwetša batho ba ba sa hwetšwego modirong wa ntlo le ntlo. Re ka nea bohlatse setarateng mo go emago dipese, kgaufsi le meago ya difolete ye e sa tsenegego gabonolo, diphakeng tša batho bohle le mafelong a mangwe moo batho ba swaregilego ka ditaba tša bona tša letšatši le letšatši.
3 Ge go bolelwa ka go nea bohlatse setarateng, ba bangwe ba ba le maikwelo a poifo. Ba ka ba ba dika-dika go tšea karolo modirong woo ka baka la gore ba e-na le dihlong goba ba naganela go fotlelwa ke batho ba ba ganago molaetša wa Mmušo. Dipelaelo tše gantši ke tšeo di se nago motheo. Ba ba nago le phihlelo modirong wo ba bega gore ga o thata go swana le go nea bohlatse ka ntlo le ntlo. Ge e le gabotse, ba hweditše gore batho ba bantši kudu ba tlwaetše go boledišwa setarateng ka mabaka a fapa-fapanego, gomme ba bangwe ba ka ba le tshekamelo e kgolo ya go tsenela poledišano goba go theetša go feta kamoo ba bego ba tla ba ka gona ge re be re kokotile mojakong wa bona. Ka gona ge e ba re ‘godiša sebete,’ re ka makala ka mo go thabišago.—1 Ba-Thes. 2:2.
4 Modiro wa setarateng o ka dirwa bjang ka mo go atlegago? Ke gabohlokwa go lokišetša gabotse. Bala dimakasine pele ga nako ke moka o kgethe ntlha e tee goba tše pedi tše di ka bolelelwago tšeo o naganago gore di tla kgahliša batho ba o gahlanago le bona. Thero ya metsotswana e ka bago e 30 e lekane. Ka ge pakane e le go kopana ka nama le ba bangwe, kgetha lefelo leo go lona go fetago palo e kgolwanyane ya batho. Gaešita lege e ka ba e le ga bohlale go ba kgaufsi le mogoeledi yo mongwe, gantši go kaone go šoma le arogane. Bagoeledi ba ba emago gotee ba ka ba le tshekamelo ya go fetša nako ba boledišana ba sa šetše batho ba ba ka bago ba sekametše go theetšeng molaetša wa Mmušo.
5 Go ema lefelong le tee ke moka wa fo bontšha dimakasine ga se mo go atlegago go swana le go thoma poledišano le batho ka o tee ka o tee. Leka go lebelela batho ka mahlong. E-ba yo borutho, yo a nago le bogwera le yo a lebanyago taba ge o dutše o katanela go thoma poledišano. Mabakeng a mangwe, o ka ba wa swanelwa ke go sepela dikgato tše sego kae le motho ge o dutše o bolela le yena. Ge e ba a arabela gabotse, neela dimakasine. Ge e ba dimakasine di ganwa, mo gongwe o ka rata go neela pampišana.
6 Gantši ke mo go kaone go lokišetša thero e kopana e rotošago potšišo goba o bolele taba e tlago go tsoša kgahlego. Ge e ba go e-na le karabelo e swanetšego, leka go hwetša leina la motho, aterese, mohlomongwe gaešita le nomoro ya gagwe ya mogala e le gore o kgone go latelela kgahlego. Mo gongwe o ka re: “Ge e ba o tla rata go ithuta mo go oketšegilego, ke tla thabela go go etela legaeng la gago goba go rulaganyetša gore Hlatse e nngwe e dire bjalo.”
7 Mogolo yo a bego a nea bohlatse setarateng o ile a boledišana le mosadi yo mongwe gomme a lemoga gore le ka mohla ga se a ka a ba le sebaka sa go boledišana le Dihlatse legaeng la gagwe. O ile a amogela puku gomme a dumela gore kgaetšedi a mo etele legaeng la gagwe ka nako e swanetšego. Ruri go ka hwetšwa batho ba bantši ba ba swanelegago gomme ba thušwa ge e ba re atlega go neeng bohlatse setarateng.—Dit. 17:17.