Go Nea Bohlatse Setarateng ka Tsela e Atlegago
1. Ke tsela efe e nngwe yeo re ka ekišago Jesu ka yona?
1 Nakong ya bodiredi bja gagwe bja lefaseng, Jesu ga se a ka a dikadika go bolela le batho bao a bego a kopana le bona tseleng le mafelong a mangwe a batho bohle. (Luka 9:57-61; Joh. 4:7) O be a nyaka go abelana le batho ba bantši ka moo a bego a ka kgona ka gona molaetša wa gagwe o bohlokwa. Lehono, go nea bohlatse setarateng ke tsela e botse ya go thuša batho go hwetša bohlale bja Modimo. (Die. 1:20) Re ka atlega kudu ge e ba re dira boiteko bja go batamela batho gomme re diriša temogo.
2. Go gata mogato wa pele go akaretša’ng ge re nea bohlatse setarateng?
2 Gata Mogato wa Pele: Gantši go kaone go ya go batho go ena le go ema goba go dula felo go tee o letetše gore bao ba fetago ka tsela ba tle go wena. Myemyela, ba lebelele ka mahlong gomme o bontšhe bogwera. Ge o šoma le bagoeledi ba bangwe, gantši go kaone go ya go batho bao ba fetago ka tsela o le noši. Le gona go nyakega gore re gate mogato wa pele go latelela bao ba bontšhitšego kgahlego. Ge e ba go nyakega, mafelelong a poledišano ya gago le motho, mmotšiše ka botho gore o ka ikopanya bjang gape le yena. Bagoeledi ba bangwe ba nea bohlatse setarateng ka mehla lefelong le tee, e lego seo se dirago gore ba bone batho batee gantši le gantši gomme ba tšwetše pele kgahlego.
3. Re ka diriša bjang temogo ge re nea bohlatse setarateng?
3 Diriša Temogo: Diriša kahlolo e botse ge o kgetha moo o tlago go ema gona setarateng le batho bao o tlago go ba bolediša. Ga go hlokagale go nea bohlatse go motho yo mongwe le yo mongwe yo a fetago ka tsela. E ba šedi. Ka mohlala, go ka ba kaone go tlogela motho gore a fete ge e ba a le lebelong. Ge o nea bohlatse pele ga lefelo la kgwebo, diriša temogo gore o se ke wa dira gore molaodi wa kgwebo a tshwenyege ka go ba gona ga gago moo. Gantši go kaone go nea bohlatse go batho ge ba etšwa lefelong la kgwebo go ena le go ba nea bohlatse ge ba tsena. Eya go batho ka tsela yeo e ka se kego ya ba tšhoša goba go ba tlaba. Le gona, diriša temogo ge o ba nea dikgatišo. Ge e ba batho ba bontšha kgahlego e nyenyane, o ka ba nea pampišana go e na le go ba nea makasine.
4. Ke ka baka la’ng go nea bohlatse setarateng e le tsela e holago le e thabišago?
4 Go nea bohlatse setarateng go re kgontšha go gaša dipeu tše dintši tša therešo ka nako e nyenyane. (Mmo. 11:6) Go ka direga gore batho ba bangwe bao re kopanago le bona ke bao re sa kgonego go ba hwetša ka magaeng ge re nea bohlatse ka ntlo le ntlo. Ke ka baka la’ng o sa dire ditokišetšo tša go tšea karolo go neeng bohlatse setarateng, e lego tsela e thabišago le e atlegago ya tirelo ya tšhemo?