Letlolo La Dipotšišo
◼ Ke tlhokomelo efe e nyakegago ge re šoma tšhemo e kotsi?
1 Ka mo go oketšegago, re kwa dipego tša bošoro, ditlhaselo le dikhuduego tša tša leago, kudu-kudu mafelong a ditoropong. Gaešita le ge re ikwa re kgomega, re a tseba gore gaešita le mafelong a khuduego, go na le batho ba botegago ba ba tlago go arabela molaetšeng wa Mmušo. Ka gona ka nako e swanelago, re swanetše go ba le sebete sa go gatela pele ka modiro, re holofetše tlhokomelo ya Jehofa.—Die. 29:25; 1 Ba-Thes. 2:2.
2 Ge re tsena lefelong le le ka bago kotsi, Jehofa o letetše gore re be ba šetšago le go diriša kahlolo e botse. Phakgamang. “Mohlale ó bôna dikotsi di s’e-tla, a khuta; ba mašilô ba a feta, ba y’o hlaka.” (Die. 22:3) Bagoeledi ba nago le phihlelo ba lemoga bohlale bja go šoma gotee ka bobedi ka bobedi goba gaešita le ka dihlopha tša bagoeledi ba mmalwa ge e ba go nyakega. Lega go le bjalo, go kgethwa gore e be bagoeledi ba babedi feela ba ba tsenago legaeng le go boledišana le mong wa ntlo, ka ge e le ba babedi feela bao ba etetšego ba ka begago nako. Mmoledi 4:9, 12 e re: “Boló ké mola è le ba babedi, e sexo o tee . . . Ó tee a ka fenywa; ba babedi ba tlo êmêlana.” Gantši disenyi di nyaka bao ba lego noši gomme ka go rialo go le bonolo go ba hlasela.
3 Šetšang kudu mabapi le go tsena difoleteng tše di nago le matseno a lefsifsi le manamelo ao go se nago batho go ona. Hlokomelang mabapi le go laleletšwa ka ntlong goba foleteng. Le se ke la ngangišana le bao ba bonalago e le ba tšhošetšago goba ba rumolago. Akgofela go itsebiša o le yo mongwe wa Dihlatse tša Jehofa. Bagoeledi ba bangwe ka mehla ba swara Beibele goba makasine wa Morokami goba wa Phafoga! ka diatleng tša bona ka morero wa go itsebiša.
4 Phafogelang batho ba ba yago godimo le fase ka ntle le morero lefelong leo. Šetšang go tsena ka lifithing le ba bangwe bao ba bonalago e se badudi ba moagong woo. Le se ke la apara mabenyabje a bitšago tšhelete e ntši. Ge e ba o swanelwa ke go ba ditarateng ka morago ga ge lefsifsi le swere, phema go sepela ditarateng tša lefsifsi moo go se nago leema-ema kudu. Ge e ba o le mohlaselwa wa go hlakolwa, o se ke wa gana ge e ba e le feela tšhelete ya gago goba matlotlo ao ba a nyakago; bophelo bja gago ke bja bohlokwa go feta selo le ge e le sefe sa dilo tše di bonagalago tšeo o nago le tšona.—Mar. 8:36.
5 Banababo rena ba ba etelelago pele e swanetše go ba ba phakgamego, ba kgone go lotišiša bagoeledi mohlala tšhemong. Ka mehla go kaone go boloka sehlopha se le ka bontši lefelong le le swanago e le gore ba bangwe ba dule ba le kgaufsi. Ge e ba mohuta le ge e le ofe wa bošoro goba tšhitišo e tšwelela tikologong, sehlopha se swanetše go tloga tšhemong yeo ka bjako.
6 Ge e ba re le ba phafogilego le ba phakgamego, re ka tšwela pele go fihlelela bao ba lego mafelong ao a tletšego bošoro ba ba “[llago] bà hlokofetše ka xo bôna makxapha a a dirwaxó.”—Hesek. 9:4.