E-Bang Ba Atlegago Bodireding Bja Lena

¹ Leratadima le a fsifala, gomme modumo wo o tšhošago o oketšega wa go thiba ditsebe. Leru le le swanago le muši le a theoga. Seo ke eng? Ke madira a ditšie tše dimilione tšeo di tlišago tshenyo e feletšego nageng! Pono ye yeo e hlaloswago ke moporofeta Joele e phethagala lehono modirong wa boboledi wa bahlanka ba tloditšwego ba Modimo le bagwera ba bona, e lego lešaba le legolo.

² Morokami wa May 1, 1998, letlakala 11, serapa 19 o bontšhitše gore: “Madira a mehleng yeno a Modimo a ditšie a neile bohlatse bjo bo tseneletšego ‘motseng’ wa Bojakane. (Joele 2:9) . . . A dutše a fenya mapheko ka moka, a tsena magaeng a dimilione, a batamela batho ditseleng, a bolela le bona ka mogala le go ikopanya le bona ka tsela le ge e le efe yeo e kgonegago ge a dutše a bolela molaetša wa Jehofa.” Na go ba le karolo modirong wo o laetšwego ke Modimo ga se tokelo e kgolo?

³ Ka mo go fapanego le ditšie tša kgonthe tšeo boikemišetšo bo nnoši bja tšona e lego go iphepa, rena ka ge re le bahlanka ba Jehofa re tshwenyega kudu ka maphelo a bao re dirago boboledi go bona. Re rata go thuša ba bangwe gore ba ithute ditherešo tše di kgahlišago tšeo di lego ka Lentšung la Modimo le gore ba tutueletšege go gata megato yeo e tlago go lebiša phološong ya bona ya ka mo go sa felego. (Joh. 17:3; 1 Tim. 4:16) Ka go rialo, re nyaka gore re be ba atlegago tseleng yeo re dirago bodiredi bja rena ka yona. Go sa šetšwe gore ke sebopego sefe sa boboledi seo se dirišwago, re swanetše go hlahloba ge e ba re se dira ka mokgwa le ka nako yeo e tlago go tšweletša mafelelo a mabotse kudu. Ka ge “pono ya lefase le e a fetoga,” re dira gabotse ge re hlahlobišiša mekgwa ya rena le megato ya go kgonthišega gore re fihlelela tlhohlo ya go ba ba tšweletšago ka mo go ka kgonegago. —1 Ba-Kor. 7:31, NW.

⁴ Gaešita le ge re dutše re katanela go kopana le batho ka ditsela tše dintši, modiro wa ntlo le ntlo e sa dutše e le kokwane ya bodiredi bja rena. Na gantši re hwetša gore batho ga ba gona gae goba ba sa robetše ge re etela? Ke mo go ferekanyago gakaakang, ka ge o sa kgone go abelana le bona molaetša wa ditaba tše di lokilego! O ka lebeletšana bjang le tlhohlo ye?

⁵ E-ba yo a Feto-fetogago le Maemo le yo a Nago le Teka-tekano: Isiraeleng ya lekgolong la pele, barei ba dihlapi ba be ba rea dihlapi bošego. Ke ka baka la’ng ba be ba di rea bošego? Gaešita le ge ye e be e se nako yeo e ba loketšego kudu, e be e le nako e botse kudu ya go swara dihlapi tše dintši. E be e le nako ya tšweletšo e ntši. Ge o bolela ka mokgwa wo, Morokami wa June 15, 1992 o boletše gore: “Le rena re swanetše go ithuta tšhemo ya rena e le gore go be bjalo ka ge eka re ya go rea ge batho ba bantši ba le ka gae gomme ba ka kgona go amogela molaetša.” Go šetša ditlwaelo tša batho ka kelohloko go bontšhitše gore ditšhabeng tše dintši tša mafelo a bodulo a kgaufsi le toropo, mohlomongwe batho ba ba ba le gae ge re etela e sa le ka pela ka Mokibelo le Sontaga mesong eupša ka kakaretšo ke bao ba sa amogelego diketelo tša rena ka nako yeo. Ge e ba se se le bjalo lefelong la gabo lena, na le ka beakanyetša nako ya lena ya go etela gore e be ka moragonyana mesong goba gaešita le thapama? Ye ke tsela e botse ya go oketša katlego ya bodiredi bja rena gotee le go bontšha go naganela baagišani ba rena, seo e lego bohlatse bja lerato la kgonthe la Bokriste.—Mat. 7: 12.

⁶ Go Ba-Filipi 4:5, (NW), moapostola Paulo o re gopotša gore re swanetše go dira gore “teka-tekano ya rena e tsebje ke batho bohle.” Ka go dumelelana le taelo ye ye e buduletšwego, re nyaka go ba bao ba leka-lekanego mekgweng ya rena ge re dutše re phetha kabelo ya rena ya boboledi ka phišego le ka mafolofolo. Ga re nyake go ‘tlogelela go ruta phatlalatša le ka ntlo le ntlo,’ eupša re nyaka go kgonthišega gore re phetha modiro wa rena wa ntlo le ntlo ka dinako tše loketšego le tše di nago le tšweletšo. (Dit. 20:20, NW) Go swana le barei ba dihlapi ba Isiraeleng ya lekgolong la pele la nywaga, re kgomega ka ‘go rea dihlapi’ ka nako yeo re ka bago ba tšweletšago kudu, e sego ka dinako tšeo re hwetšago di lokela rena kudu.

⁷ Ke dipeakanyo dife tšeo di ka dirwago? Gantši, diboka tša tirelo ya tšhemo di swarwa ka 9:00 goba ka 9:30 a.m. ka Mokibelo le Sontaga, ka morago ga moo sehlopha gatee-tee se tšwela modirong wa ntlo le ntlo tšhemong. Lega go le bjalo, dihlopha tše dingwe tša bagolo di ile tša rulaganyetša gore sehlopha se kopanele dibopegong tše dingwe tša bodiredi, tše bjalo ka go nea bohlatse setarateng, tšhemo ya kgwebo goba maeto a go boela, pele go iwa ka ntlo le ntlo mafelong a bodulo. Diphuthego tše dingwe di ile tša rulaganyetša gore dinako tša diboka tša tirelo ya tšhemo di be ka moragonyana mesong—ka 10:00 a.m., 11:00 a.m. goba ka 12:00 mosegare. Ka morago ga moo, sehlopha se leba thwii modirong wa ntlo le ntlo gomme sa dula tšhemong go ba go fihla thapama. Mašemong a mangwe, thapama go e na le mesong e ka ba nako e botse kudu ya go kopana bakeng sa tirelo ya tšhemo. Dipeakanyo tše bjalo di ka tlaleletša kudu tšweletšong e oketšegilego modirong wa ntlo le ntlo.

⁸ E-bang le Temogo le Bohlale: Ge re dutše re kopana le batho ka ntlo le ntlo, re kopana le dikarabelo tše fapa-fapanego molaetšeng wa rena. Beng ba dintlo ba bangwe ba a re amogela, ba bangwe ga ba na kgahlego, gomme ba sego kae e ka ba bao ba ratago ngangišano goba bo-ntwa-dumela. Mabapi le bao go boletšwego ka bona mafelelong, go letlakala 7 la Go Boledišana ka Mangwalo re gopotšwa gore ga re tsome go “‘fenya dingangišanong’ le batho bao ba sa hlomphego therešo.” Ge e ba mong wa ntlo a e-na le bonaba, go kaone gore re sepele. Le ka mohla re se ke ra ferehla batho ka go ba phegelela gore ba bolele le rena goba ba amogele pono ya rena. Ga re gapeletše batho molaetša wa rena. Seo e ka se be go bontšha teka-tekano gomme se ka bakela Dihlatse tše dingwe mathata le modiro ka kakaretšo.

⁹ Pele re thoma go šoma tšhemo, ke bohlale go hlahloba karata ya tšhemo bakeng sa diaterese tša badudi ba ilego ba re botša gore re se etele. Ge e ba go e-na le diaterese tše bjalo, mogoeledi yo mongwe le yo mongwe yo a šomago setarata seo o swanetše go botšwa moo a sa swanelago go etela gona. Ga go yo a swanetšego go itirela phetho ya go etela magae a ka ntle le go laelwa ke molebeledi wa tirelo gore a dire bjalo.—Bona Letlolo la Dipotšišo la Tirelo ya Rena ya Mmušo ya September 1994.

¹⁰ Re ka oketša go atlega ga rena ka go ba le temogo ge re dutše re šoma ka ntlo le ntlo. E-bang bao ba elago hloko ge le batamela legae. Na digareteine le diširo di tswaletšwe ka moka? Na go kwagala go homotše? Se se ka bontšha gore badudi ba robetše. Mo gongwe re tla ba le poledišano e tšweletšago dienywa le mong wa ntlo ge e ba re ka etela gape ka morago. Mohlomongwe go ka ba kaone go feta ntlo ye ka nakwana, ra ngwala nomoro ya ntlo. Le ka hlola ntlo gape pele le tloga tšhemong goba la e ngwala gore le tle le e etele gape ka morago.

¹¹ Go sa dutše go ka rotoga maemo ao go ona re ka tsošago motho re se ra ikemišetša goba ka tsela e itšego ra mo šitela. Mo gongwe a ka ba a bonagala a selekegile goba a befetšwe. Re swanetše go arabela bjang? Diema 17:27, (PK) e eletša ka gore: “Monna wa temogo o na le moya wa pelokeledi.” Gaešita le ge re sa itshole bakeng sa go dira bodiredi bja rena, re ka kgopela tshwarelo ka ge re etetše ka nako e sa swanelago. Re ka botšiša ka botho ge e ba go ka ba le nako e swanetšego kudu gomme ra ithapela go boa. Go bolela ka go tšwa pelong ka lentšu le boleta kamoo re kgomegilego ka gona gantši go ka thuša go theoša motho yo bjalo maswafo. (Die. 15:1) Ge e ba mong wa ntlo a re tsebiša gore ka mehla o šoma tšhifi ya bošego, go ka tsenywa lengwalo ka karateng ya tšhemo e le gore diketelo tša nakong e tlago di ka dirwa ka nako e swanetšego.

¹² Gape temogo ke e swanetšego ge re dutše re katanela go šoma tšhemo ka botlalo. Ka ge batho ba bantši ba se gona gae ge re dira ketelo ya pele, re swanetše go dira maiteko a oketšegilego gore re ikopanye le bona gore re abelane molaetša wa phološo le bona. (Ba-Roma10:13) Dipego di bontšha gore bagoeledi ka dinako tše dingwe ba etela legae le tee ka makga a mantšinyana ka letšatši le tee ba leka go hwetša batho ba ka gae. Baagišani ba lebeletše. Go ka tšwelela kgopolo e sa kgahlišego ya gore Dihlatse tša Jehofa ‘ka mehla di etela’ setarateng sa bona. Se se ka phengwa bjang?

¹³ Dirišang temogo. Ge o etela gape legaeng leo go lona go bego go se na motho, na go na le ditšhupo tša gore ga bjale go na le motho ka gae? Ge e ba poso goba matlakala a papatšo a tšwelelela ka ntle ga lepokisi la poso, go bonagala go sa dutše go se na motho gae gomme ketelo e nngwe ntlong yeo e ka se be e tšweletšago dienywa ka nako ye. Ge e ba go sa kgonege gore go hwetšwe motho ka morago ga ge go dirilwe maiteko a sego kae ka dinako tše sa swanego tša letšatši, tša go etša mantšiboa, mo gongwe go ikopanya le mong wa ntlo ka mogala go ka kgonega. Ge e ba a sa hwetšagale, pampišana goba pampišana ya taletšo e ka tsenywa ka tlase ga lemati ka bohlale, kudu-kudu ge e ba tšhemo e akaretšwa gantši ka mo go lekanego. Mo gongwe go ka kopanwa le motho yoo nakong e tlago ge go šongwa tšhemo yeo.

¹⁴ Re swanetše go phema dipoledišano tše telele mojakong wa ntlo ge mong wa ntlo a lebane le boemo bjo bo sa kgahlišego bja leratadima. Ge le laleditšwe gore le tsene, hlokomelang gore le se šilafatše mabato. Dirišang kahlolo e botse ge le hlaselwa ke dimpša tše di gobago. Ge le šoma meagong ya difolete, bolelang ka boleta gomme le pheme go dira lešata leo le šitišago bahiri le leo le tsebišago batho gore le gona.

¹⁵ E-bang le Thulaganyo le Seriti: Ge re e-na le thulaganyo e botse re ka kgona go phema go bopa dihlopha tše dikgolo tšeo di gogago tlhokomelo tšeo di phuthegilego tšhemong. Beng ba dintlo ba bangwe ba ka ikwa ba le kotsing ge dikoloi tše mmalwa le dibene di fihla di ema pele ga ntlo ya bona di rwele sehlopha se segolo sa bagoeledi. Ga re nyake go nea kgopolo ya gore re “hlasela” mafelo a bodulo. Dithulaganyo tša go šoma tšhemo di dirwa gabotse kudu sebokeng sa tirelo ya tšhemo. Dihlopha tše dinyenyane tša bagoeledi, go swana le lapa, ke tšeo di sa boifišego go beng ba dintlo e bile di nyaka thulaganyo e nyenyane ge tšhemo e dutše e šongwa.

¹⁶ Go ba le thulaganyo go nyaka gore batswadi ba hlokomele boitshwaro bja bana ba bona ka kelohloko ge ba dutše ba šoma tšhemo. Bana ba swanetše go itshwara gabotse ge ba sepela le batho ba bagolo ka ntlo le ntlo. Bana ga se ba swanela go dumelelwa go bapala goba go tlala-tlala gohle ka bolokologi, ba goga tlhokomelo ya badudi goba ya ba-feta-ka-tsela ka mo go sa swanelago.

¹⁷ Teka-tekano e nyakega le tabeng ya go khutša go se nene. Tirelo ya Rena ya Mmušo ya June1995, letlakala 3 e boletše gore: “Ge re le tirelong ya tšhemo re ka lahlegelwa ke nako ya bohlokwa ka baka la dinako tša go khutša. Lega go le bjalo, ge maemo a tša leratadima a sa thabiše, nako ya go khutša e tla re lapološa le go re thuša go tšwela pele. Lega go le bjalo, ba bantši ba rata go tšwela pele ba swaregile ka go nea bohlatse bathong gomme ba tlogela go gwerana le banababo bona ka dinako tša go khutša nakong yeo e beetšwego ka thoko bakeng sa bodiredi.” Gaešita le ge go ema bakeng sa dilapološi e le phetho ya motho ka noši, go hlokometšwe gore ka dinako tše dingwe dihlopha tše dikgolo tša banababo rena le dikgaetšedi di kopana lebenkeleng la dilapološi goba go la go jela. Ka ntle le nako yeo e dirišitšwego go ba rekišetša, go ba gona ga lešaba e ka ba mo go tšhošago go bareki ba bangwe. Ka dinako tše dingwe, diphihlelo tša tirelo ya tšhemo ya mesong di ahla-ahlwa ka go bolela ka mantšu a phagamego, gomme se se ka rona seriti sa bodiredi bja rena gomme sa fokodiša go atlega ga bjona. Ka go diriša temogo, bagoeledi ba ka phema go ba ka sehlopha se segolo go feta tekano lefelong la kgwebo gomme ba e-ja nako ya bodiredi ka mo go sa swanelago.

¹⁸ Ba bantši ba bile le mafelelo a mabotse ka go ya go batho kae le kae mo ba ka hwetšwago gona—ditarateng, mafelong a go emiša dikoloi le mafelong a mangwe a phatlalatša. Mo le gona re nyaka go nea bohlatse bjo bobotse, e sego feela ka seo re se bolelago le ka go ba ga rena le teka-tekano. Bagoeledi phuthegong e nngwe le e nngwe ba swanetše go kgonthišega gore ba hlompha mellwane ya tšhemo ya bona e le gore ba se ke ba šitiša bao ba sepelago ka maoto mafelong a kgwebo le matsenong a seteišene sa setimela goba bathwalwa mafelong a modiro, bjalo ka mafelong a go tšhela peterole ao a bulwago diiri tše 24. Bakeng sa go kgonthišetša gore re phetha bodiredi bja rena ka mokgwa o rulagantšwego le wa seriti, re tla šoma feela tšhemong ya rena yeo re e abetšwego ka ntle le ge go dirilwe dithulaganyo tše itšego ka Komiti ya Tirelo ya Phuthego ya phuthego e nngwe, gore re ba thuše.—Bapiša le 2 Ba-Korinthe10:13-15.

¹⁹ Diphuthego tše dingwe tšeo di nago le mafelo a mantši ao go ona go nea bohlatse phatlalatša go kgonegago di rulagantše mafelo a gore e be mašemo. Ke moka karata ya tšhemo e newa mogoeledi ka o tee ka o tee goba sehlopha. Se se dira gore go be bonolo go akaretša tšhemo gabotse e bile se thibela gore bagoeledi ba bantši ba se šome lefelong le tee ka nako e swanago, ka go dumelelana le molao wa motheo wo o lego go 1 Ba-Korinthe 14:40 o rego: “Tšohle di yê ka bothakxa le ka molaô.”

²⁰ Ponagalo ya rena ya motho ka noši ka mehla e swanetše go ba ya seriti le yeo e bontšhago gore re badiredi bao ba rwalago leina la Jehofa. Se ke sa therešo le ka dilo tšeo re di dirišago. Mekotla ya go swara dipuku e onetšego goba Dibeibele tša matlakala a menegilego dintlha goba tše di šilafetšego di rona molaetša wa Mmušo. Go ile gwa bolelwa gore go apara le go itokiša ke “tsela ya ka pela ya go fetišetša molaetša yeo e neago batho bao ba go dikologilego tsebišo ya gore o mang le gore o wela lehlakoreng lefe.” Ka gona, ponagalo ya rena ga se ya swanela go ba ya bošaedi, le gona ga ya swanela go ba ya bo-mpogeng goba ye e bitšago tšhelete e ntši kudu, eupša ka mehla e be ‘ye e loketšego ebangedi.’ —Ba-Fil. 1:27; bapiša le 1 Timotheo 2:9, 10.

²¹ Go 1 Ba-Korinthe 9:26, moapostola Paulo o re: “Xa ke kitime kè sa tsebe mo ke yaxo; xe ke itia, xa ke etše wa go itia lefsifsi.” Re ikemišeditše go ba le bodiredi bjo atlegago le bjo bo tšweletšago dienywa ka go ekiša Paulo. Ge re dutše re kopanela ka phišego modirong wa go nea bohlatse re le karolo ya “madira a ditšie” a Jehofa lehono, eka re ka diriša teka-tekano le temogo tša Bokriste ge re iša molaetša wa phološo go bohle tšhemong ya rena.