Go Šireletša Bana ba Gago go Dirišweng Gampe ga Madi

1 “Ka kxonthe, bana ba motho ké neô [“lefa,” NW] ya Morêna.” (Ps. 127:3) Ge e ba le e-na le lefa le le bjalo le bohlokwa le le tšwago go Jehofa, lena bjalo ka batswadi le na le boikarabelo bjo bo thabišago lege e le bjo bogolo bja go tlwaetša, go hlokomela le go šireletša bana ba lena. Ka mohlala, na le gatile mogato o mongwe le o mongwe o swanetšego wa go šireletša bana ba lena tšhelong ya madi? Bana ba lena ba be ba tla arabela bjang ge ba be ba ka lebeletšana le dikgonagalo tša go tšhelwa madi? Na le boledišane le le lapa ka seo le ka se dirago go lebeletšana ka katlego le boemo bja tšhoganetšo bjoo go bjona go nago le kotsi ya tšhelo ya madi?

2 Go lokišeletša lapa la gago bakeng sa maemo a bjalo ga se gwa swanela go ba mo go bakago go tshwenyega goba kgateletšo e sa nyakegego. O ka se ke wa fagahlela le go itokišeletša mafelelo a se sengwe le se sengwe bophelong, eupja go na le dilo tše dintši tšeo lena bjalo ka batswadi le ka di dirago e sa le pele go šireletša bana ba lena tšhelong ya madi. Go hlokomologa boikarabelo bjo go ka feleletša ka gore ngwana wa lena a tšhelwe madi ge a newa tlhokomelo ya tša kalafo. Go ka dirwa’ng?

3 Tumelo e Tiilego e Bohlokwa: Go swanetše go naganišišwa kudu mabapi le kamoo ditumelo tša lena ka noši molaong wa Modimo ka madi di tiilego ka gona. Na le ruta bana ba lena go kwa Jehofa tabeng ye, go fo etša ge le ba ruta molao wa gagwe mabapi le potego, boitshwaro, boema-gare le dikarolo tše dingwe tša bophelo? Na ruri re ikwa bjalo ka ge molao wa Modimo o laetše go Doiteronomio 12:23 (PK) gore: “O fele o tiiše gore o se ke wa ba wa ja madi”? Temana 25 (PK) e oketša ka gore: “O se ke wa a ja gore o letlege, wene le bana ba gago ka morago ga gago, ge e le ge o dirile se e lego se se lokilego mahlong a Jehofa.” Mo gongwe ngaka e ka bolela gore madi a tla ‘dira gore dilo di sepele gabotse’ bakeng sa ngwana wa lena yo a babjago, eupja le swanetše go ikemišetša ka go tia go gana madi bakeng sa lena ka noši le bana ba lena pele ga ge boemo lege e le bofe bja tšhoganetšo bo tšwelela, le lebelela tswalano ya lena le Jehofa e le e phagametšego kudu selo lege e le sefe seo go thwego ke go oketša bophelo se se ka akaretšago go roba molao wa gagwe o mokgethwa. Go amogelwa ke Modimo gona bjale le bophelo bjo bo sa felego nakong e tlago di a akaretšwa!

4 Ee, Dihlatse tša Jehofa di rata go phela. Ga di dume go hwa. Di nyaka go phela e le gore di kgone go tumiša Jehofa gomme di dire thato ya gagwe. Ke lebaka le lengwe leo ka lona di yago dipetlele le go iša bana ba tšona moo gore ba alafše. Di kgopela dingaka gore di ba alafe, gomme ge di botšwa gore madi ke tsela ya motheo goba e šišinywago ya kalafo, di kgopela tsela e nngwe ya kalafo e sa dirišego madi. Go na le ditsela tše dintši tše di ka dirišwago go e na le madi. Dingaka tše di nago le phihlelo di a di diriša. Tsela e bjalo yeo e dirišwago ya kalafo ga se kalafo ya bofora, eupja e hlamilwe ka dikalafo gotee le megato e kwalago go ya ka tša kalafo tše di ngwadilwego dipukung tše di tumilego kudu tša tša kalafo. Dingaka tše dikete lefaseng ka moka di dirišana le rena gabotse go neeng tlhokomelo e botse ya tša kalafo ka ntle le go diriša madi, ešita lege ka dinako tše dingwe e sa dutše e le bothata go hwetša dingaka tše di tlago go alafa bana ba Dihlatse ka ntle le go diriša madi.

5 Go Hwetša Ngaka e Nago le Tirišano: Dingaka di na le dilo tše dintši tše di tshwenyegilego ka tšona ge di alafa balwetši gomme ge le di kgopela gore di alafe ngwana wa lena ka ntle le madi, se se godiša tlhohlo. Dingaka tše dingwe di tla dumela go alafa batho ba bagolo ka go hlompha dikganyogo tša bona mabapi le madi ge feela go tlatšwa lengwalo le le amogelegago la go di lokolla molatong. Tše dingwe ka mo go swanago di ka dumela go alafa bana ba ba bontšhitšego gore ke bana ba ba budulego monaganong, ka ge dikgoro tše dingwe tša tsheko di dumetše gore bana ba ba budulego monaganong ba be le tshwanelo ya go ikgethela kalafo. (Bona Morokami wa June 15, 1991, matlakala 16-17, bakeng sa tlhaloso ya se se akaretšwago ngwaneng yo a budulego monaganong.) Lega go le bjalo, dingaka di ka gana go alafa bana ba banyenyane, kudu-kudu masea ka ntle le ge di dumeletšwe go diriša madi. Ge e le gabotse, ke dingaka tše sego kae kudu tšeo di tla neago kgonthišetšo e feletšego ya gore di ka se ke tša diriša madi ka tlase ga maemo lege e le afe ge di alafa ngwana. Ka mabaka a tša kalafo le a tša molao, dingaka tše dintši di nagana gore di ka se kgone go nea kgonthišetšo e bjalo. Lega go le bjalo, palo e golago ya tšona e nyaka go nea bana ba Dihlatse tša Jehofa tlhokomelo mola di dutše di fihla moo di naganago gore di ka kgona tabeng ya go hlompha dikganyogo tša rena ka madi.

6 Ka baka la se, go thwe’ng ge e ba lesolong la lena la go tsomela ngwana wa lena ngaka e swanelegago le hwetša ngaka e tsebjago e e-na le tirišano e botse le Dihlatse tša Jehofa le yeo nakong e fetilego e ilego ya dira mogato o swanago wa go se diriše madi go Dihlatse tše dingwe, fela e nagana gore molao ga o e dumelele go le nea kgonthišetšo e feletšego ya gore madi a ka se ke a dirišwa? Lega go le bjalo, e le kgonthišetša gore e nagana gore go ka se be le bothata le mo nakong ye. Mo gongwe le ka dira phetho ya gore ye ke kgetho e kaone-kaone yeo le nago le yona. Ka tlase ga maemo a mo gongwe le ka phetha ka go nea tumelelo ya go tšwela pele. Lega go le bjalo, hlalosang ka mo go kwalago gore go dumelela ga lena ngwana wa lena gore a alafše ga se gore le dumelela ditšhelo tša madi. Go gata mogato wo e tla ba boikarabelo bjo le tla swanelwago ke go bo rwala ka ntle le gore phetho ya lena e lebelelwe e le go kwanantšha.

7 Ee, ge e ba le ka hwetša kgetho e nngwe e ka dirišwago e swanetšego ya kalafo yeo e tlago go fokotša kudu goba ya kgona go fediša bothata bja go dirišwa ga madi, gona go bonala le tla kgetha mokgwa o se nago dikotsi. Go tla letelwa gore le dire boiteko bjo bogolo bja go hwetša ngaka goba mmui yo a tlago go le kgodiša kudu go feta ba bangwe tabeng ya go dumela gore a ka se diriše madi. Tšhireletšo e kaone kudu ke go letela mathata. Dirang boiteko bjohle gore le hwetše ngaka e nago le tirišano e sa le pele. Lekang go široga dingaka tše di se nago tirišano le dipetlele ge e ba go kgonega.

8 Dinageng tše dingwe lebaka le lengwe le le ka dirago phapano tabeng ya ge e ba go newa tšhelo ya madi, ke kamoo tlhokomelo ya sepetlele e tlago go lefša ka gona. Moo batswadi ba nago le phemelo ya tša maphelo goba tšhireletšo e nngwe e dumelelago go tsoma ngaka e kgethwago ke bona, bana ba ka tlošwa gabonolo diatleng tša dingaka tše di se nago tirišano goba sehlopha sa bašomi ba sepetlele. Go lefelelwa mo go lekanego ga ditshenyagalelo tša tša ditšhelete gantši go laola mohuta wa tirelo le tirišano tšeo lapa le di hwetšago go dingaka le dipetlele. Le gona ge e ba sepetlele goba ngaka e ikemišeditše go dumelela go fetišetšwa pele ga ngwana, gantši go tla ithekga ka go kgona ga batswadi go lefelela tlhokomelo. Ke gabohlokwa gore lena bao le tlago go ba bo-mma le hlokomele maemo a lena a tša maphelo nakong ya boimana! Se se tla thuša kudu go thibela pelego ya pele ga nako le mathata ao a sepedišanago le yona, ka ge tlhokomelo ya motheo ya bana ba ba belegwego pele ga nako le mathata a bona gantši e akaretša go dirišwa ga madi.

9 Ka dinako tše dingwe dingaka di ngongorega ka gore Dihlatse tša Jehofa ga di hlalose mabaka a go gana ga tšona madi go fihlela motsotsong wa mafelelo. Se ga se sa swanela go ba bjalo. Se sengwe sa dilo tša pele tšeo batswadi bao e lego Dihlatse ba swanetšego go di dira ge ba e-ya sepetlele goba ge ba ahla-ahla thušo ya ngaka, ke go hlalosa boemo bja bona ka madi. Ge e ba go bua go akaretšwa, kgopela go kopana pele le ngaka e alafago ka go hwiša bogogoma. Ngaka ya mmui e ka kgona go go thuša go dira se. Difomo tša kamogelo di swanetše go hlahlobja ka kelohloko. O na le tshwanelo ya go phumola selo lege e le sefe seo o se ganago ka go se thala. Gore o tloše pelaelo lege e le efe, ngwala fomong ya kamogelo gore madi ka mabaka a bodumedi le a tša kalafo, ga a nyakege goba ga a dumelelwe ka tlase ga maemo lege e le afe.

10 Thušo e Tšwago go Mokgatlo wa Jehofa: Ke ditokišetšo dife tšeo mokgatlo wa Jehofa o di dirilego go le thuša go šireletša bana ba lena mading? Go na le tše dintši. Mokgatlo o ngwadile mo gontši go re ruta ka madi le kalafo e nngwe e ka dirišwago e sa dirišego madi. Le ithutile poroutšha ya Madi a ka Phološa Bjang Bophelo bja Gago? le dipuku tše dingwe mabapi le taba ye. Gape le na le banababo lena le dikgaetšedi ka phuthegong ya lena ba ba ka le neago thušo e kgolo le thekgo. Ge go e-na le bothata, bagolo ba ka bona e le bohlale gore ba rulaganye gore go letwe diiri tše 24 sepetlele, go kgothaletšwa gore e be mogolo le motswadi wa molwetši goba setho se sengwe sa kgaufsi sa lapa. Gantši ditšhelo tša madi di newa mola ba leloko ka moka le bagwera ba ile gae bošego.

11 Afrika Borwa le dinageng tša kgaufsi go na le Dikomiti tše 12 tša go Hloma Kwano le Dipetlele ditoropong tše dikgolo. Diphuthego ka moka di abetšwe komiting e bopjago ke banababo rena ba ba tlwaeditšwego ba ba hwetšagalago go ka thuša. Kgopelang thušo go bona ka bagolo ba lena ge ba nyakega. Ga se ba swanela go biletšwa mathata a manyenyane, eupja le se ke la diega kudu go ba bitša ge e ba go lemogwa gore bothata bjo bogolo bo ka ba bo agela. Gantši ba ka kgona go nea maina a dingaka tše di nago le tirišano le ditšhišinyo mabapi le ditsela tše dingwe tše di ka dirišwago. Bana ba babo rena ba rulaganyetša go ba gona lefelong le go thuša go rarolla bothata moo go nyakegago e bile go kgonega.

12 Go Letela le go Lebeletšana le go Tsena Ditaba Gare ga Kgoro ya Tsheko: Go thwe’ng ge e ba ngaka goba sepetlele se rera go hwetša taelo ya kgoro ya tsheko ya go tšhela ngwana wa lena madi? Na ye ke nako ya gore le bee fase, le nagana gore ga go sa na selo se sengwe se se ka dirwago? Le gatee! Go sa dutše go ka kgonega go thibela tšhelo ya madi. Go swanetše go dirwa tokišetšo bakeng sa kgonagalo e bjalo e sa le pele. Go ka dirwa’ng?

13 Go kwešiša e mengwe ya melao ya metheo ya tša molao yeo e hlahlago goba e tutuetšago dipetlele le baahlodi ditabeng tše go tla le thuša kudu go iphahlelela. Molao o mongwe o bjalo wa motheo o bohlokwa kudu ke therešo ya gore molao ga o nee batswadi matla a sa lekanetšwago a go amogela goba go gana kalafo bakeng sa bana ba bona. Gaešita lege batho ba bagolo ka kakaretšo ba e-na le tshwanelo ya go dumela goba go gana kalafo ge ba rata, batswadi ga ba lokologa go gana kalafo yeo e tšewago e le e nyakegago bakeng sa bophelo bjo bobotse bja ngwana wa bona, gaešita lege go gana ga bona go theilwe ditumelong tše di kgomaretšwego ka go tia tša bodumedi.

14 Molao wo wa motheo o ile wa bonagatšwa kahlolong ya ka 1944 ya Kgoro-kgolo ya Tsheko ya United States yeo e itšego: “Batswadi ba ka lokologa go ba bahwela-tumelo ka bobona. Eupja se ga se bolele gore ba lokologile maemong a swanago go dira bana ba bona gore e be bahwela-tumelo pele ga ge ba fihla nywageng ya go ba le kwešišo e tletšego le ya molao yeo go yona ba ka ikgethelago ka bobona.” Taba yona ye yeo go tshwenyegilwego kudu ka yona ya go phela gabotse ga ngwana mmeleng le boiketlo bja gagwe, e ngwadilwe melaong ya tša boiketlo bja bana lehono. Melao ye yeo morero wa yona e lego go thibela go swarwa gampe ga bana, e bile e hlametšwe go šireletša bana go hlokomologweng ka tša kalafo.

15 Go šireletša bana go swarweng gampe le go hlokomologweng ke batswadi ruri ga se mo go ganwago ke batswadi ba Bakriste. Eupja melao ya go hlokomologwa ga bana le polelo ya Kgoro-kgolo ya Tsheko e tsopotšwego ka mo godimo gantši di dirišwa ka mo go sa swanelago ditabeng tšeo di akaretšago bana ba Dihlatse tša Jehofa. Ka baka la’ng? Ka mohlala, batswadi ba Dihlatse ga ba ikemišetša go dira bana ba bona “bahwela-tumelo.” Ge nkabe ba be ba ikemišeditše seo, ke ka baka la’ng ba be ba ka iša bana ba bona sepetlele? Ka mo go fapanego, batswadi ba Dihlatse ba ikemišeditše go tsomela bana ba bona kalafo. Ba rata bana ba bona gomme ba nyaka gore ba phele gabotse mmeleng. Eupja ba dumela gore ba na le boikarabelo bjo ba bo neilwego ke Modimo bja go kgetha ka tlhaologanyo mohuta wa kalafo e loketšego bana ba bona. Ba nyaka gore mathata a bana ba bona a tša maphelo a rarollwe ka ntle le madi. Ga se feela gore tsela e bjalo e fapanego ya tlhokomelo ya tša kalafo e sa dirišego madi ke e kaone le e šireletšegilego kudu go feta madi, eupja sa bohlokwa-hlokwa ke gore e dira gore bana ba bona ba dule ba amogelwa ke Monei yo mogolo wa Bophelo, Jehofa Modimo.

16 Go sa šetšwe mehola ya kalafo e sa dirišego madi, dingaka tše dintši le bahlankedi ba tša bophelo bjo bobotse bja bana ba lebelela kalafo ya tšhelo ya madi e le mokgwa wa motheo wa tša kalafo wo e ka bago o nyakegago goba o phološago bophelo maemong a mangwe. Ka gona, ge batswadi ba Dihlatse ba gana ditšhelo tša madi tšeo di kgothaletšwago, mathata a ka tsoga. Ka kakaretšo dingaka di ka se kgone go alafa bana ka molao ka ntle le tumelelo ya batswadi. Gore di fenye go se dumele ga batswadi gore go dirišwe madi, dingaka goba sehlopha se sengwe sa bašomi ba bangwe ba sepetlele ba ka tsoma tumelelo ya moahlodi e le ka sebopego sa taelo ya kgoro ya tsheko. Tumelelo e bjalo e neilwego ke kgoro ya tsheko e ka hwetšwa ka bahlankedi ba tša bophelo bjo bobotse bja bana goba ka dingaka goba ka bahlankedi ba sepetlele ba ba šomago go šireletša ngwana go seo go thwego ke go hlokomologwa ga tša kalafo.a

17 Gantši ditaelo tša kgoro ya tsheko tšeo di dumelelago go dirišwa ga madi di hwetšwa ka pela-pela ka ntle le go nyetlela batswadi goba ba se botšwe le gatee. Dingaka, baokamedi ba tša kalafo goba bahlankedi ba tša bophelo bjo bobotse bja bana ba leka go lokafatša ditaelo tše bjalo tše di dirilwego ka lebelo ka go bolela gore go na le boemo bja tšhoganetšo bja tša kalafo bjo bo sa neego batswadi sebaka sa go tsebišwa ka botlalo ka seo se diregago. Lega go le bjalo, gantši ge dingaka di botšišwa di ile tša dumela gore ga go na boemo bja kgonthe bja tšhoganetšo le gore di nyaka taelo ya kgoro ya tsheko “feela ge e ba” tšhelo ya madi yeo di e naganago e nyakega ka morago. Ka ge le le bahlokomedi ba tlhago ba ngwana wa lena, le na le tshwanelo ya motheo ya go tseba seo dingaka, baokamedi ba tša kalafo goba bahlankedi ba tša bophelo bjo bobotse bja bana ba se dirago mabapi le ngwana wa lena ka dinako tšohle. Molao o laela gore ge e ba go kgonega, le swanetše go tsebišwa ka maiteko a go leka go hwetša taelo ya kgoro ya tsheko gomme le swanetše go dumelelwa go fahlelela lehlakore la lena la kgang pele ga kgoro ya tsheko.

18 Ditherešo tše tša tša molao di gatelela bohlokwa bja go hwetša ngaka e nago le tirišano. Dirišanang le yona gomme le e thuše go rarolla bothata bja tša kalafo bja ngwana wa lena ka ntle le madi ka thušo yeo le e hwetšago go ditho tša Komiti ya gabo lena ya go Hloma Kwano le Sepetlele, goba e fetišetše ngwana wa lena ngakeng goba sepetleleng se se tlago go nea kalafo e bjalo. Eupja ge e ba go e-na le dika tša gore ngaka, mookamedi wa tša kalafo goba mošomi wa tša bophelo bjo bobotse bja bana o rera go hwetša taelo ya kgoro ya tsheko, le swanetše go phafogela go botšiša ge e ba se e le se se rulaganywago. Ka dinako tše dingwe se se dirwa thopeng ka mogala. Ge e ba go e-na le morero wa go ya kgorong ya tsheko, gatelelang gore le nyaka go tseba ka wona e le gore le lena le ka fahlelela lehlakore la lena go moahlodi. (Die. 18:17) Ge e ba go e-na le nako, gantši ke bohlale go tsoma thušo ya ramolao. Mabakeng a mangwe bo-ramolao ba ile ba kgethwa ke kgoro ya tsheko. Ge e ba le e-na le ramolao wa lena ka noši goba yo a kgethilwego ke kgoro ya tsheko, Mokgatlo o ka mo nea tsebišo yeo e tlago go mo thuša go fahlela gabotse ka mo go kgonegago ka tlase ga maemo a.

19 Ge e ba taba ya go gana ga lena madi e išwa kgorong ya tsheko, kgopolo ya ngaka ya gore madi a a nyakega bakeng sa go phološa bophelo bja ngwana wa lena goba boemo bja gagwe bja tša maphelo e ka ba e kgodišago kudu. Moahlodi ka ge a se na tsebo e tletšego ka tša kalafo gantši o tla dumelelana le keletšo ya botsebi bja tša kalafo ya ngaka. Se ke sa therešo kudu ge e ba batswadi ba newa sebaka se senyenyane goba ba sa newe sebaka sa go fahlelela lehlakore la bona tabeng gomme ngaka e dumelelwa go hlalosa dipolelo tša yona mabapi le go nyakega mo go “akgofilego” ga madi ka ntle le go hlohlwa. Ditsheko tše bjalo tša go theetša lehlakore le tee la taba ga di thuše go hwetša therešo. Therešo ke gore nako le lebaka leo ka lona dingaka di naganago gore madi a a nyakega, ke taba e theilwego kudu maikwelong le e sa kgonthišwego. Gantši ge ngaka e nngwe e bolela gore madi a tloga a nyakega bakeng sa go phološa bophelo bja ngwana, ngaka e nngwe e nago le phihlelo ya go rarolla bothata bjo bo swanago bja tša kalafo ka ntle le madi e tla bolela gore madi ga a nyakege gore go alafše molwetši.

20 Le tla dira’ng ge e ba ramolao goba moahlodi a le botšiša lebaka leo ka lona le ganago ge ngwana wa lena a newa tšhelo ya madi yeo e “phološago bophelo”? Lege tshekamelo ya lena ya mathomo e ka ba go hlalosa tumelo ya lena tsogong le go hlalosa tumelo ya lena e tiilego ya gore Modimo o tla buša ngwana wa lena ge a ka hwa, karabo e bjalo ka boyona e ka fo kgodiša moahlodi yoo selo se segolo seo a tshwenyegilego ka sona e lego go phela gabotse ga ngwana mmeleng, gore o motho yo a fišegelago bodumedi ka mo go feteletšego le gore o swanetše go tsena ditaba gare gore a šireletše ngwana wa gago.

21 Seo kgoro ya tsheko e swanetšego go se tseba ke gore, lege le gana madi ka mabaka a kgomaretšwego ka go tia a bodumedi, ga le gane tlhokomelo ya tša kalafo. Moahlodi o swanetše go bona gore ga le batswadi ba ba sa hlokomelego goba ba ba gobošago, go e na le moo le batswadi ba lerato ba ba nyakago ngwana wa bona a alafša. Le upša le sa dumele gore tšeo go thwego ke mehola ya madi e feta dikotsi tša ona tšeo e ka bago tše di bolayago le mathata a ona, kudu-kudu ge e ba go e-na le ditsela tše dingwe tša tša kalafo tše di ka dirišwago tšeo di se nago dikotsi tše.

22 Go ithekgile ka boemo, mo gongwe le ka botša moahlodi gore ke kgopolo ya ngaka e tee gore madi a a nyakega, eupja dingaka di fapana ka ditsela tša tšona gomme le ka thabela go hwetša sebaka sa go hwetša ngaka e tlago go hlokomela ngwana wa lena ka mekgwa e hwetšagalago ka bophara ya kalafo e sa dirišego madi. Ka thušo ya Komiti ya go Hloma Kwano le Sepetlele, mo gongwe le ka ba le šetše le hweditše ngaka e bjalo yeo e tlago go alafa ngwana wa lena ka ntle le madi le yeo e ka neago bohlatse bjo bo thušago kgorong ya tsheko, mohlomongwe ka mogala. Mohlomongwe komiti ya go hloma kwano e tla kgona go abelana le moahlodi—gaešita le ngaka yeo e gapeletšago go newa taelo ya kgoro ya tsheko—dihlogo tša tša kalafo tšeo di bontšhago kamoo bothata bja ngwana wa gago bja tša kalafo bo ka rarollwago ka gona ka katlego ka ntle le go diriša madi.

23 Ge baahlodi ba kgopelwa gore ba ntšhe ditaelo tša kgoro ya tsheko ka go akgofa, gantši ga se ba naganišiša goba ba gopotšwa ka dikotsi tše dintši tša madi go akaretša AIDS, bolwetši bja sebete (hepatitis) le dikotsi tše dingwe tše dintši. O ka lemoša moahlodi ka tšona gomme o ka ba wa mmotša gore wena bjalo ka motswadi wa Mokriste, o tla lebelela go dirišwa ga madi a motho yo mongwe ka boiteko bja go phološa bophelo e le go robja mo gogolo ga molao wa Modimo le gore go gapeletša go diriša madi ngwaneng wa gago go ka lebelelwa go swana le go kata. Wena le ngwana wa gago (ge e ba a gotše ka mo go lekanego go ka ba le ditumelo tša gagwe) le ka hlalosa go hlaswa ga lena tlhaselo e bjalo ya mmeleng gomme le ka lopa moahlodi gore a se ke a nea taelo, eupja a le dumelele go tšwela pele ka go nyakela ngwana wa lena kalafo e nngwe.

24 Ge go fahletšwe ka mo go swanetšego, baahlodi ba kgona go bona lehlakore le lengwe gabotse kudu—e lego lehlakore la lena—le le batswadi. Ka gona ga ba akgofele go dumelela tšhelo ya madi. Mabakeng a mangwe baahlodi ba ile ba thibela o šoro tokologo ya ngaka ya go diriša madi gaešita le go gapeletša gore ditsela tše dingwe di elwe hloko pele, goba ba ile ba nea batswadi sebaka sa go hwetša dingaka tšeo di tlago go alafa ka ntle le madi.

25 Ge le dirišana le ba ba tsomago go gapeletša tšhelo ya madi, ke gabohlokwa gore le ka mohla le se ke la bontšha sešupo lege e le sefe sa go tekema ditumelong tša lena. Baahlodi (le dingaka) ka dinako tše dingwe ba botšiša ge e ba batswadi ba tla ba le bothata lege e le bofe bja go “fetišetša” boikarabelo bja phetho ya go tšhela madi go bona, ba nagana gore se se tla nolofaletša batswadi go phela ka letswalo le le rotšego. Eupja go swanetše go hlaloswa ka mo go kwalago go bohle ba ba akaretšwago gore lena bjalo ka batswadi, le ikwa le gapeletšega go tšwela pele le dira sohle seo le ka se kgonago go phema tšhelo ya madi. Bjo ke boikarabelo bja lena bjo le bo neilwego ke Modimo. Ga se bjo bo ka fetišetšwago go motho yo mongwe.

26 Ka gona, ge le boledišana le dingaka le baahlodi le swanetše go ikemišetša go hlalosa boemo bja lena ka mo go kwalago le ka mo go kgodišago. Ge e ba taelo ya kgoro ya tsheko e ntšhwa go sa šetšwe maiteko a lena a magolo, tšwelang pele le lopa ngaka gore e se ke ya tšhela madi gomme le kgothaletše kalafo e nngwe. Tšwelang pele le mo hlohleletše gore a ikemišetše go hlahloba dihlogo tša tša kalafo le keletšo ya dingaka lege e le dife tšeo di ratago gore go boledišanwe le tšona mabapi le bothata bjo bja tša kalafo, e le gore go phengwe madi. Mabakeng a mmalwa ngaka yeo e bego e bonala e ngangabetše e ile ya tšwa ka phapošing ya go buela gomme ya tsebiša ka go ikgantšha gore ga se ya diriša madi. Ka gona, gaešita le ka morago ga ge go ntšhitšwe taelo ya kgoro ya tsheko le se ke la langwa!—Bona “Dipotšišo tše Tšwago go Babadi” tokollong ya Morokami ya June 15, 1991.

27 Gopolang gore Jesu o itše: “Le phafoxêlê batho, xobane ba tlo Le sekiša dikxorong . . . Ba tlo Le bexa xo babuši le dikxoši ka ’baka la-ka, ya tlo ba bohlatse xo bôná le xo ba dithšaba.” Gore re homotšege ka tlase ga maemo a bjalo, Jesu o okeditše ka gore moya o mokgethwa o tla re thuša gore re gopole seo e tla bago se se swanetšego le se se holago go ka se bolela maemong a bjalo.—Mat. 10:16-20.

28 “E a šetšago taba ka temogo, o tlo bona tše di botse; gomme e a botago Jehofa o na le lehlogonolo.” (Die. 16:20, PK) Batswadi, dirang ditokišetšo tše di nyakegago e sa le pele go šireletša ngwana wa lena tšhelong ya madi e šilafatšago moyeng. (Die. 22:3) Bana, arabelang tlwaetšong ya batswadi ba lena ge ba dira ditokišetšo tše gomme le di bee pelong ya lena. Bjalo ka lapa, ‘le tiiše gore le se ke la ba la ja madi . . . gore le letlege’ ka gobane le hweditše tšhegofatšo ya Jehofa le kamogelo ya gagwe.—Doit. 12:23-25.