Na o Itokišeditše go Lebeletšana le Boemo bjo bo Hlohlago Tumelo bja tša Kalafo?

Na o Itokišeditše go Lebeletšana le Boemo bjo bo Hlohlago Tumelo bja tša Kalafo?

Boloka tsebišo ye moo o ka e hwetšago ka pela ge e nyakega

1 Ga go na motho yo a naganago kudu ka kgonagalo ya go ba sepetlele lehono goba gosasa. Lega go le bjalo, ‘nako le ditiragalo tše di sa letelwago di re wela bohle.’ (Mmo. 9:11, NW) Gaešita lege o sa amogele kalafo e le sebopego se o se kgethago sa tlhokomelo ya tša maphelo, o tla dira’ng bakeng sa go itšhireletša tšhelong e sa nyakegego ya madi ge go ka direga kotsi gomme wa akgofišetšwa sepetlele o idibetše? Ee, kotsi goba boemo bjo bo befago ka mo go sa letelwago bja tša maphelo bo ka go lebanya gatee-tee le tlhohlo ya tumelo ya gago.

2 Ge o ka ikhwetša o le sepetlele ka lebaka lege e le lefe, o tla dira’ng gore o kgomarele potego ge e ba motho yo mongwe gona moo a go botša gore o tla hwa ge e ba o sa tšhelwe madi? Na o tla akgofela go dumela gore polelo ye e hlalosa boemo bja gago e le ka kgonthe? Na o tloga o kgodišegile gore ga o nyake madi? Na o ikemišeditše go lebeletšana le tlhohlo ye ya tumelo ya gago gomme wa ‘ila madi’?—Dit. 15:28, 29.

3 Go gana ka katlego tšhelo ya madi e sa nyakegego le e šilafatšago moyeng go thoma ka kgodišego e tiilego. Kgodišego e bjalo e swanetše go thewa kwešišong e botse ya seo Beibele e se bolelago ka madi. Go sego bjalo, ka baka la maikwelo a letšhogo a nakwana o ka tšhošetšwa gabonolo ke motho yo a rego yena o tseba kudu ka boemo go feta wena. Na o ka forwa gore o nagane gore dingaka di tseba kudu ka madi go feta Modimo? Ka kgonthe, maemong a o tla swanelwa ke go “ikemišetša ka go tia” go dira “se se lokilego” mahlong a Jehofa, go sa šetšwe seo batho feela ba ka se bolelago. (Doit. 12:23-25, NW) Eupja na o swanelwa ke go lebeletšana le tlhohlo ye o nnoši?—Mmo. 4:9-12.

LEFAPHA LA DITIRELO TŠA TSEBIŠO YA SEPETLELE LE DIKOMITI TŠA GO HLOMA KWANO LE DIPETLELE

4 Go thuša ba ba nyakago thušo ge ba lebeletšane le bothata bja tšhelo ya madi, Mokgatlo o hlomile Lefapha la Ditirelo tša Tsebišo ya Sepetlele kua Brooklyn. Lekala le lengwe le le lengwe le na le Lefapha la tša Tsebišo ya Sepetlele. Afrika Borwa le dinageng tša kgaufsi Mokgatlo o hlomile Dikomiti tše 12 tša go Hloma Kwano le Dipetlele ditoropong tše dikgolo. Dikomiti tše di bopša ke bagolo ba ba fetago 50 ba ba tlwaeditšwego ka mo go kgethegilego bakeng sa modiro wo.

5 Lefapha la Ditirelo tša Tsebišo ya Sepetlele le kgona go dira dinyakišišo dipukung tša tša kalafo lefaseng ka bophara gore le hwetše tsebišo mabapi le go hwetšagala le go atlega ga mehuta e mentši ya go bua le go alafa ka ntle le madi. Ka morago le nea Dikomiti tša go Hloma Kwano le Dipetlele, mafelo a tlhokomelo ya tša maphelo le dingaka tše dingwe tsebišo mabapi le ditšwelopele tše tša tša kalafo. (Ka dinako tše dingwe Lefapha la Ditirelo tša Tsebišo ya Sepetlele le rometše dihlogo tša tša kalafo tše di bontšhago se se ka dirwago ka ntle le madi gomme la fediša ka katlego thulano e tšwelago pele sepetlele.) Le dula le tsebiša dikomiti ka dikahlolo tše di thabišago tša kgoro ya tsheko tše di tlago go thuša baahlodi go hlahloba melato ya rena ka temogo e oketšegilego. Gape le boloka dipego tša dingaka tše di nago le tirišano, e le gore dikomiti di be le difaele tše di nago le tsebišo e lego nakong yeo di ka e dirišago ge mathata a tšhelo ya madi a rotoga.

6 Lefapha la Ditirelo tša Tsebišo ya Sepetlele le bile le hlokomela tlwaetšo le modiro wa Dikomiti tša go Hloma Kwano le Dipetlele. Ditoropong tšeo Dikomiti tša go Hloma Kwano le Dipetlele di lego gona, di atiša go dira ditšhišinyo tše di nago le tsebišo go dihlopha tša bašomi ba sepetlele bakeng sa go kaonefatša ditswalano le bona. Di bile di nyakišiša go dihlopha tše tša bašomi go hwetša dingaka lege e le dife tše dingwe tše di tlago go re alafa ka ntle le go diriša madi. Bana ba babo rena ba dula ba itokišeditše go go thuša, eupja go na le megato ya pele ya makgaola-kgang yeo o swanetšego go e gata bakeng sa go ba theela motheo wa go dira seo ka tsela e atlegago kudu.

MEGATO YA PELE YA MAKGAOLA-KGANG —NA O ŠETŠE O E GATILE?

7 Sa pele, kgonthišetša gore bohle ka lapeng ba na le dikarata tša bona tša medical directive tše di tladitšwego ka botlalo—tše di nago le letšatši-kgwedi, tše di saennwego le tše di saennwego ke dihlatse. Banababo rena ba bangwe ba ba tlilego sepetlele ba swere dikarata tše di sa ngwalwago letšatši-kgwedi e bile/goba di sa saenwa ke dihlatse, ba dirile gore go šoma ga tšona go hlohlwe. Le gona, na bana ba rena ka moka ba ba sa kolobetšwago ba na le di-identification card tša bona tše di tladitšwego? Ge e ba ba se na tšona, bašomi ba sepetlele ba tla tseba bjang boemo bja gago ka madi le yo ba swanetšego go mo leletša mogala boemong bja tšhoganetšo bjo bo akaretšago ngwana wa gago?

8 Ka gona kgonthišetša gore bohle ba šika le dikarata tše KA DINAKO TŠOHLE. Lekola se baneng ba gago pele ba e-ya sekolong letšatši le lengwe le le lengwe, ee, gaešita le pele ba e-ya lebaleng la dipapadi goba lefelong la boitapološo. Ka moka ga rena re swanetše go kgonthiša gore re swere dikarata tše ge re le mošomong, ge re le maikhutšong goba ge re le kopanong ya Bokriste. Le ka mohla re se ke ra di tlogela!

9 Anke o nagane ka seo se ka go diragalelago ge o be o ka ba ka phapošing ya tša tšhoganetšo ya sepetlele o le boemong bjo bo hlobaetšago, o idibetše e bile/goba o sa kgone go ipolelela. Ge e ba o sa swara karata e bile go se na motho wa leloko goba mogolo yo a šetšego a tlile sepetlele yo a ka go bolelelago gomme go phethwa ka gore ‘o swanetše go tšhelwa madi,’ go bonala o tla tšhelwa madi. Ka manyami, se se diragaletše ba bangwe. Eupja ge re swere karata, e a re bolelela le go hlalosa kganyogo ya rena.

10 Ke ka lebaka leo medical document e lego kaone go e na le leseka goba pheta e lemošago ka boemo bja tša kalafo. Tše di boletšwego morago ga di hlalose mabaka a rena ao a theilwego Beibeleng a boemo bja rena gomme ga di na mesaeno yeo e hlatselago se se boletšwego. Kahlolo ya kgorong ya tsheko ya Canada e boletše mabapi le karata ya kgaetšedi yo mongwe gore: “[Molwetši] o kgethile go tsebiša dingaka le ba bangwe ba ba neago tlhokomelo ya tša maphelo ka tsela e nnoši e kgonegago gore ge go ka direga gore a idibale goba a se kgone go bolela dikganyogo tša gagwe ka tsela e itšego, ga a dumele ditšhelo tša madi.” Ka gona, le ka mohla o se e tlogele!

11 Ka ge medical directive ya rena e diretšwe go lebeletšana ka mo go kgethegilego le maemo a tšhoganetšo, gona e tla ba bohlale gore tabeng ya go buiwa ga go ikgethela o ngwale e sa le pele tshedimošo ya gago ka noši e tletšego (e theilwego go medical directive ya rena), e le gore o kgone go akaretša dilo tše itšego tše bjalo ka mohuta wa mogato wa go buiwa le maina a dingaka le sepetlele. O na le tshwanelo ya go dira se, ka go rialo o kgonthišetša kalafo yeo o e kgethago. Gaešita lege wena le ngaka le ka ba le sa letela mathata a magolo, hlalosa gore tshedimošo ye e swanetše go latelwa le ge go ka tšwelela dilo tše di sa letelwago.—Die. 22:3.

12 Mogato o mongwe o bohlokwa ke go boledišana le sehlopha sa bašomi ba tša kalafo ba o tlago go swanelwa ke go dirišana le bona kalafong ya go ikgethela goba ya tšhoganetšo. Ke bomang ba o swanetšego go boledišana le bona ka go lebanya?

BOLEDIŠANA LE SEHLOPHA SA BAŠOMI BA TŠA KALAFO

13 SEHLOPHA SA TŠA KALAFO: Ye ke nako yeo ka yona go boifa motho go sa swanelago go fenya. (Die. 29:25) Ge o bonala o sa kgonthišege, motho yo mongwe a ka phetha ka gore ga o rereše. Ge e ba go nyakega go buiwa ga go ikgethela goba ga tšhoganetšo, wena goba setho se sengwe sa kgaufsi sa lapa se swanetše go botšiša ka boikemišetšo dipotšišo tše di lebanyago ka yo e lego moetapele wa sehlopha sa tša go bua. Potšišo e nngwe e bohlokwa ke ya gore, Na sehlopha se tla hlompha dikganyogo tša molwetši gomme sa mo alafa maemong ka moka ka ntle le madi? Ka ntle le kgonthišetšo ya se, o tla be o sa šireletšega ka mo go kgotsofatšago.

14 Bolela ka mo go kwalago le ka kgodišego yeo e lego ya seriti seo dikganyogo tša gago di lego sona. Bolela ka mo go kwalago gore o nyaka gore bothata bja gago bo rarollwe ka tsela e nngwe e sa dirišego madi. Boledišana le bona o iketlile gomme o e-na le sebete ka tshedimošo ya gago ka noši ya tša kalafo yeo o e dirilego e sa le pele le ka fomo e lokollago sepetlele boikarabelong. Ge e ba ngaka ya mmui e sa ikemišetša go dumelelana le dikganyogo tša gago, o tla ba o seketša nako ge o ka kgopela mookamedi wa tša kalafo wa sepetlele gore a go hweletše ngaka e nngwe. Yeo ke karolo ya mošomo wa gagwe.

15 NGAKA E ALAFAGO KA GO HWIŠA BOGOGOMA: Gare ga bohle ba ba lego sehlopheng sa tša kalafo bao o swanetšego go boledišana le bona pele ga go buiwa, GA SE WA SWANELA GO PALELWA KE GO BOLEDIŠANA LE NGAKA YE. Ka ge boikarabelo bja yona e le go go boloka o phela mola ngaka ya mmui e bua, ngaka e alafago ka go hwiša bogogoma ke yona e dirago diphetho ka ditaba tše bjalo ka go dirišwa ga madi. Ka gona ga o šireletšege ka mo go feletšego ka go fo boledišana le ngaka ya mmui. Ka baka leo o swanetše go boledišana le ngaka e alafago ka go hwiša bogogoma gomme o e kgodiše ka boemo bja gago, o tsebe ge e ba bo tla hlompšha goba go se bjalo.—Bapiša le Luka 18:3-5.

16 Go bonagala eka ka tlwaelo ngaka e alafago ka go hwiša bogogoma e etela molwetši ka nakwana bošego-šego pele ga go buiwa—e lego bošego kudu ge e ba e ganetša boemo bja gago ka madi. Phegelela gore ngaka ya mmui e kgethe e sa le pele ngaka e alafago ka go hwiša bogogoma e nago le tirišano yeo o ka boledišanago le yona e sa le ka pela kudu, pele ga go buiwa ga go ikgethela. Ka gona go tla ba le sebaka sa go hwetša e nngwe ge e ba ya pele e sa rate go dumelelana le dikganyogo tša gago. O se ke wa dumelela motho lege e le mang a leka go go aroša tshwanelong ye ya gore o be yo a kgotsofetšego ka ngaka e alafago ka go hwiša bogogoma e swaraganego le go buiwa ga gago.

17 O swanetše go hlalosetša batho ba ka moka ka boemo bja gago bjo bo sa rerišanwego: MADI GA A NYAKEGE. Kgopela gore boemo bja gago bo rarollwe ka kalafo e nngwe e sa dirišego madi. Bolela dilo lege e ka ba dife tše dingwe tše di tsebjago ka ntle le madi bakeng sa boemo bja gago. Ge e ba sehlopha sa tša kalafo se nagana gore ga di thuše boemong bja gago, se kgopele gore se nyakišiše dikgonagalo tše dingwe dipukung tša tša kalafo. Ba kgonthišetše gore ge e ba ba rata o ka ba hweletša tsebišo ka go kgopela bagolo ba geno gore ba ikopanye le Komiti ya kgaufsi ya go Hloma Kwano le Sepetlele.

GO DIRIŠA DITSHWANELO TŠA GAGO

18 Hlahloba ka kelohloko fomo ya go lokologa boikarabelong le fomo ya tumelelano tšeo sepetlele se go kgopelago gore o di saene ge o amogetšwe sepetlele. Ka dinako tše dingwe ka morago ga go bolela gore ba tla hlompha dikganyogo tša gago, serapa se se latelago se bolela gore mosaeni o dumela gore sepetlele se ka diriša kalafo “e phološago bophelo” ge se gahlana le mathata. Yeo e ka akaretša madi. O na le tshwanelo ya go fetola dipolelo lege e le dife tše bjalo gore di se akaretše madi goba wa di phumola ka mo go feletšego ka go di thala. Baoki ba ka leka go go botša gore ga se wa swanela go dira bjalo, eupja o na le tshwanelo yeo! Hlalosa gore fomo e bjalo ke kwano ya gago le bona le gore o ka se ke wa saena kwano yeo o sa dumelelanego le yona. Ge e ba motho lege e le ofe a leka go go gapeletša go saenela selo seo o sa se nyakego, kgopela go boledišana le mookamedi wa tša kalafo goba/le moemedi wa balwetši wa lefelo leo la tlhokomelo ya tša maphelo.

19 Na o na le tshwanelo ya go dira dilo tše bjalo? Ee, o na le yona. Ka gona, lemoga ditshwanelo tša gago bjalo ka molwetši. Ditshwanelo tše tša batho ga di šale ka ntle ge o tsena sepetlele. Ga o swanelwe ke go di gafa e le gore o hwetše kalafo. O se ke wa dumelela motho lege e le ofe a go botša se se fapanego.

20 E nngwe ya ditshwanelo tše bjalo e bitšwa tshwanelo ya go dumela ka morago ga go kwešiša ka botlalo seo se akaretšwago, e lego se se bolelago gore ga go na kalafo lege e le efe e ka dirišwago go wena ka ntle le tumelelo ya gago. O ka ba wa gana dikalafo ka moka ge e ba o rata. Go dumela ga gago kalafo go swanetše go dirwa ka morago ga tlhaloso e kwalago ya seo sehlopha sa tša kalafo se rerago go se dira, go akaretša le dikotsi ka moka. Se se latelago, ba swanetše go go botša ka dilo lege e le dife tše di ka dirišwago tše di lego gona. Ka gona, wena o kgetha kalafo yeo o e nyakago ka morago ga ge o neilwe tsebišo.

21 E le gore o kgonthišege ka seo o se dumelago, o SWANETŠE go botšiša dipotšišo tše di kwalago ka selo lege e le sefe seo o sa se kwešišego, kudu-kudu ge e ba bašomi ba sepetlele ba diriša mantšu a magolo goba mebolelwana ya tša kalafo. Ka mohlala, ge e ba ngaka e bolela gore e nyaka go diriša “plasma,” ka go se tsebe o ka nagana gore e bolela ka “selo se se oketšago tekanyo ya plasma,” eupja ga go bjalo. Pele o dumela, botšiša gore: “Na seo ke karolo ya madi?” Mabapi le mogato lege e le ofe wo a o dirišago, botšiša gore: “Na kalafo yeo e akaretša go dirišwa ga ditšweletšwa tša madi?” Ge e ba a hlalosa setlabakelo se itšego seo a nyakago go se diriša, botšiša gore: “Na go na le nako yeo madi a-ka a tla bolokwago ka thoko ge go dutše go dirišwa setlabakelo se?”

22 Eupja o swanetše go dira’ng ge e ba o dirile tšohle tše di boletšwego ka mo godimo gomme go sa dutše go se na tirišano goba gaešita le go ganetšwa mo go itšego ga boemo bja gago go sa dutše go le gona? O se ke wa dika-dika go kgopela thušo. Ba bangwe ba ile ba diega kudu pele ba ka nyaka thušo gomme ba bea maphelo a bona kotsing.

THUŠO E BOHLOKWA NAKONG YEO E NYAKEGAGO KA YONA

23 Ela hloko megato e latelago ya go hwetša thušo e nyakegago: (1) Kapejana ge wena goba moratiwa wa gago a lebane le go buiwa ga go ikgethela goba ga tšhoganetšo moo go nago le go se kwane ka baka la ge sepetlele se nyaka go diriša madi; goba (2) ge e ba boemo bja gago bja tša kalafo goba bja moratiwa wa gago bo befa ka mo go hlobaetšago kudu; goba (3) ge e ba ngaka, mooki goba mookamedi wa tša kalafo wa sepetlele a bolela gore o ya go nyaka taelo ya kgoro ya tsheko tabeng ya ngwana (goba motho yo mogolo), gona:

24 LELETŠA BAGOLO BA PHUTHEGO YA GENO MOGALA ge e ba o sešo wa dira bjalo. (Ka baka la boemo bja rena mabapi le madi, ruri ke bohlale go lemoša bagolo ba rena ka nako lege e le efe ge re swanelwa ke go ya lefelong la tlhokomelo ya tša maphelo.) Se se latelago, ge e ba go bonwa e le mo go nyakegago, BAGOLO BA TLA LELETŠA KOMITI YA KGAUFSI YA GO HLOMA KWANO LE SEPETLELE MOGALA. Ge e ba o rata, ditho tše dingwe tša Komiti ya go Hloma Kwano le Sepetlele di ka tla sepetlele mo nakong ye go tla go go thuša.—Jes. 32:1, 2, PK.

25 Bagolo ba ba Komiti ya go Hloma Kwano le Sepetlele ba tseba maina a dingaka tše di nago le tirišano tša tikologong ya geno gomme ba ka go kopanya le tšona, ke moka ba thoma go rulaganyetša dingaka tše dingwe goba mafelo a tlhokomelo ya tša maphelo gore a thuše. Ge e ba di sa hwetšagale tikologong ya geno, bagolo ba tla boledišana le komiti e nngwe ya kgaufsi. Ge e ba seo se sa atlege, ba tla leletša Lefapha la tša Tsebišo ya Sepetlele kua Bethele mogala. Ba ka ba ba kgona go rulaganyetša go bonana le ngaka e nago le tirišano yeo e ka hlalosetšago sehlopha sa gago sa gona bjale sa tša kalafo ka se se ka dirwago ka ntle le madi. Banababo rena ba Komiti ya go Hloma Kwano le Sepetlele ba tlwaeditšwe go swaragana le maemo a bjalo.

26 Ditho tša Dikomiti tša go Hloma Kwano le Dipetlele di bile di ikemišeditše go thuša wena goba wa leloko gore a boledišane le ngaka goba mookamedi wa tša kalafo, eupja o swanetše go kgopela thušo yeo. Ee, bana ba babo rena ba ka se ke ba go direla diphetho, eupja gantši ba ka go thuša go ela hloko pono ya Mokgatlo ka ditaba le go go lemoša ka dikgetho tša gago tša kalafo le tša molao.

27 Ge e ba sehlopha sa tša kalafo se sa dutše se gana go ba le tirišano, boledišana le mookamedi wa tša kalafo wa sepetlele mabapi le go tsenya legatong la bona ba bangwe ba ba lego sehlopheng sa gagwe sa bašomi, ba ba tlago go hlompha dikganyogo tša gago. Ge e ba mookamedi a dika-dika go dira seo le ge FEELA o kgonthišegile gore go na le ngaka e nngwe ya mmui e hweditšwego lefelong le lengwe gomme o ka fetišetšwa go yona, gona o ka nea mookamedi lengwalo le le nago le letšatši-kgwedi le le le saennwego leo go lona o bolelago maina a dingaka tše di se nago tirišano le gore di ntšhitšwe tabeng ya gago.

28 Na o na le tshwanelo ya go dira seo? Ee, o na le tshwanelo yeo. Le gona ge e ba ka morago taba ye e tlišwa pele ga moahlodi, lengwalo la gago le ka thuša kudu go mo dira gore a amogele dikganyogo tša gago. Le gona go ka direga gore e bule sebaka ka tsela e hlomphegago sa gore dingaka tše dingwe tša babui bjale di ithotoše gomme di ithapele go go thuša. Sa bohlokwa le go feta ke gore se ka dira gore o hwetše tlhokomelo e nyakegago ya tša kalafo pele boemo bja gago bo befa ka mo go hlobaetšago kudu. O se ke wa diega kudu!

29 Lege re ka se ke ra botša motho lege e le mang gore a ikhweletše phemelo (insurance) ya tša maphelo, re swanetše go go botša gore gantši re ba le mathata a magolo a go hwetša ngaka e nago le tirišano ka mehla gore e alafe ba ba se nago phemelo e lekanego goba lege e le efe ya tša kalafo.

DIPOTŠIŠO TŠE DINTŠI TŠEO O SWANETŠEGO GO DI PHAFOGELA

30 O swanetše go tseba gore go na le dipotšišo tše dingwe tšeo dingaka le ba bangwe ba di botšišago tšeo gantši di sa botšišwego ka morero o mobotse. Yeo gantši e botšišwago ke dingaka (le ke baahlodi ba bangwe) ke e rego:

•“Na o kgetha go hwa (lesa ngwana wa gago a e-hwa) go e na le go amogela ‘tšhelo ya madi e phološago bophelo’?”

31 Ge o ka re ee, o tla ba o nepile ka kgopolo ya bodumedi. Eupja karabo yeo gantši e kwelwa thoko gomme ka dinako tše dingwe e bile e baka dikahlolo tše di sa rategego tša kgoro ya tsheko. O swanetše go gopola gore boemong bjo ga o bodireding. Go e na le moo, o bolela ka kalafo e nyakegago. Ka gona o swanetše go dumelelana le batheetši ba gago, e ka ba ba tša kalafo goba ba tša molao.—Ps. 39:1; Ba-Kol. 4:5, 6.

32 Go ngaka, moahlodi goba mookamedi wa tša kalafo, “ee” e ka bolela gore o nyaka go ba mohwela-tumelo goba o nyaka go dira ngwana wa gago sehlabelo ka baka la tumelo ya gago. Go ba botša ka tumelo ya gago e tiilego tsogong ya bahu boemong bjo gantši go ka se thuše. Ba tla go bitša motho yo a fišegelago bodumedi ka mo go feteletšego, yo a sa kgonego go dira diphetho tše di nago le tlhaologanyo ge bophelo bo le kotsing. Tabeng ya bana, ba tla go lebelela o le motswadi yo a sa šetšego yo a ganago seo go thwego ke kalafo e “phološago bophelo.”

33 Ge e le gabotse GA O gane kalafo. O upja o sa dumelelane le ngaka ka MOHUTA wa kalafo. Boemo bjo gantši bo tla fetoša kgopolo ka moka go bona le go wena. Ka ntle le moo, ke mo go forago gore ba dire gore go bonale eka madi a šireletšegile gomme ke ona kalafo E NNOŠI “e phološago bophelo.” (Bona Madi a ka Phološa Bjang Bophelo bja Gago?, matlakala 7-22.) Ka gona o swanetše go hlalosa ntlha yeo ka mo go kwalago kudu. O ka dira seo bjang? O ka araba ka gore:

•“Ga ke nyake go hwa (gore ngwan’aka a hwe). Ge nkabe ke be ke nyaka go hwa (gore ngwan’aka a hwe), nkabe ke ile ka dula gae. Eupja ke tlile mo gore ke (ngwan’aka a) hwetše kalafo e le gore ke phele. Seo ke se nyakago ke kalafo e nngwe e sa dirišego madi bakeng sa bolwetši bja-ka (ngwan’aka). Go na le ditsela tše dingwe tše di ka dirišwago.”

34 Dipotšišo tše dingwe tše mmalwa tšeo gantši di botšišwago ke dingaka goba baahlodi ke tša gore:

•“O tla diragalelwa ke eng ge e ba tšhelo ya madi e ka gapeletšwa ka taelo ya kgoro ya tsheko? Na o tla rwešwa molato?”

•“Na go amogela goba go gapeletšwa tšhelo ya madi go ka dira gore o rakwe bodumeding bja gago goba o tingwe bophelo bjo bo sa felego? Phuthego ya geno e tla go tšea bjang?”

35 Kgaetšedi yo mongwe o ile a araba moahlodi ka gore ge seo se ka direga, yena boemong bjo bjalo o be a ka se be le molato ka baka la kahlolo yeo moahlodi a e dirilego. Lege seo e be e le therešo go ya ka pono e nngwe, moahlodi o ile a nagana gore ka ge kgaetšedi a be a ka se be le molato, gona yena o be a tla mo rwalela molato wa gagwe. O ile a laela gore a tšhelwe madi.

36 O swanetše go kwešiša gore ba bangwe ge ba botšiša dipotšišo tše gantši ba tsoma tsela ya go lwantšha go gana ga gago madi. O se ke wa ba dumelela go dira seo o sa lemoge! Ka gona re ka phema bjang go se kwešišane moo? O ka araba ka gore:

•“Ge nka gapeletšwa madi ka tsela lege e le efe, go nna go tla swana le go katwa. Ke tla tlaišwa ke mafelelo a tlhaselo e bjalo e sa nyakegego maikwelong le moyeng bophelong bja-ka ka moka. Ke tla lwantšha ka matla a-ka ka moka go gobošwa mo go bjalo ga mmele wa-ka ka ntle le tumelelo ya-ka. Ke tla dira maiteko ohle a gore ke tliše bahlasedi ba-ka kgorong ya tsheko go etša ge ke be ke tla dira tabeng ya go katwa.”

37 Go swanetše go tšweletšwa kgopolo e matla le e kwalago ya gore tšhelo ya madi ya kgapeletšo go rena ke go gobošwa ga mebele ya rena mo go hlaswegago. Ga se taba e nyenyane. Ka gona tsepama. Hlalosa ka mo go kwalago gore o nyaka kalafo e nngwe e sa dirišego madi.

O TLA DIRA’NG GORE O DULE O ITOKIŠITŠE?

38 Re hlahlobile dilo tše dingwe tšeo o swanetšego go di dira gore o itšhireletše gotee le lapa la gago tšhelong ya madi e sa nyakegego. (Ka morago, re holofela go nea dintlha ka botlalo mabapi le go rarolla mathata ao a rotogago ge masea le bana ba le kotsing ya go tšhelwa madi.) Re bone gape seo Mokgatlo o se dirilego ka lerato bakeng sa go nea thušo nakong yeo e nyakegago ka yona. O swanetše go dira’ng ka tsebišo ye gore o kgonthišege gore o itokišeditše go lebeletšana le boemo bjo bo hlohlago tumelo bja tša kalafo?

Sa pele: Swarang poledišano ya lapa bakeng sa go boeletša ditaba tše le go rulaganya seo le tlago go se bolela le go se dira, kudu-kudu boemong bja tšhoganetšo.

Se se latelago: Kgonthišegang gore le na le dikarata ka moka tšeo le di nyakago.

Sa mafelelo: Rapelelang taba go Jehofa ka matla gore a le thekge maikemišetšong a lena a tiilego a go ‘ila madi.’ Go kwa molao wa gagwe mabapi le madi go re kgonthišetša gore o tla re putsa ka bophelo bjo bo sa felego.—Dit. 15:29; Die. 27:11, 12.

Ge e ba boemo lege e le bofe bja tša kalafo bo befa ka mo go hlobaetšago kudu mo e bilego o tšhošetšwa ka tšhelo ya madi, hlahloba lepokisi le mabapi le seo o swanetšego go se dira:

1.Leletša bagolo ba phuthego ya geno mogala gore ba go thuše. 2.Ge go nyakega, kgopela bagolo gore ba leletše Komiti ya kgaufsi ya go Hloma Kwano le Sepetlele mogala. 3.Komiti ya go Hloma Kwano le Sepetlele e ka go thuša ka go boledišana le dingaka gotee le ba bangwe. 4.Komiti ya go Hloma Kwano le Sepetlele e ka go thuša gore o ikopanye le dingaka tše dingwe gore di boledišane le dingaka tša babui mabapi le ditsela tše dingwe tše di ka dirišwago. 5.Komiti ya go Hloma Kwano le Sepetlele e ka go thuša gape gore o fetišetšwe lefelong le le hlomphegago kudu bakeng sa kalafo e nyakegago.