Bontšha Tebogo Bakeng sa Ngwako wa Modimo
1 Mehleng ya Beibele Jehofa o be a laetše batho ba gagwe gore ba bokane gotee ka mehla ngwakong wa gagwe. (Lef. 23:2) Dipokano tše di be di ba thuša gore ba dule ba nagana ka lentšu la Modimo, di ba nea nako ya go naganišiša, ya bogwera le ya go ahla-ahla Molao wa Jehofa. Menagano ya bona e ile ya tlala dikgopolo tša Modimo tšeo di ilego tša tliša ditšhegofatšo tše di humilego tša moya. Tše e be e le dinako tša lethabo e le ka kgonthe. Thulaganyo e be e godiša botee le borapedi bjo bo hlwekilego. Dipokano ngwakong wa Modimo lehono ga se tšeo e sego tša bohlokwa.
2 Re ka Bontšha Bjang Gore re Leboga Diboka? Diphuthego tše dingwe di bega palo e lego tlase ya ba ba bago gona dibokeng. Ka dinako tše dingwe boemo bja motho bo ka mo thibela go ya dibokeng. Eupja na o dumeletše mathata a manyenyane a šitišana le go ya ka mehla dibokeng? Ba bangwe ba ka kgetha go dula gae ge ba opša ke hlogo ganyenyane goba ba ikwa ba lapile ka morago ga go swarega letšatši ka moka. Ba bangwe ba ile ba ikwa ba gapeletšega go amogela meloko e sa dumelego yeo e nyakago go etela. Ba bangwe ba bile ba fošitše diboka e le gore ba bogele lenaneo le le rategago la TV goba tiragalo e itšego ya dipapadi. Tekanyo ya tebogo e bontšhwago maemong a, go molaleng gore e hlaelelwa ke kganyogo e tšwago pelong e bontšhitšwego ke barwa ba Kora ge ba re: “Môya wa-ka o xoletšwe, ó hloloxetšwe ’kxôrô tša Morêna.”—Ps. 84:2.
3 Gaešita le ge go newa dijo tša moya ka boati dibokeng, ba bangwe ba ba lego gona ba ba le bothata bja go theetša. Ba ka ikhwetša ba lelera ka monagano, ba nagana ka dipelaelo tša letšatši goba ba bile ba otsela. Ba bantši ba hweditše gore go ngwala dintlha tše kopana go ba thuša gore ba dule ba phafogile le go tsepamišetša kgopolo go se se bolelwago. Go ngwala dilo fase go bile go gatiša tsebišo monaganong. Go oketša moo, go lokišetša e sa le pele ke thušo bakeng sa go holega ka botlalo. Ge e ba re lokišetša gabotse, re tla kgona “go šetša ka go fetiša kudu.”—Ba-Heb. 2:1, PK.
4 Bana gotee le batho ba bagolo ba swanetše go monya thuto e newago dibokeng. Seo bana ba ithutago sona e tla ba se senyenyane kudu ge e ba batswadi ba ba nea dibapadišwa goba dipuku tša go tsenywa mebala bakeng sa go ba boloka ba swaregile e bile ba homotše. Go hlokega tayo e swanetšego ge bana ba dumelelwa go bapala, go bolela, go lla goba go dira dilo tše dingwe tše di šitišago ba ba dutšego kgaufsi. Go ya ntlwaneng goba go ya go nwa meetse leboelela le ka mo go sa nyakegego nakong ya seboka gantši go a fokotšwa, ge ngwana a tseba gore yo mongwe wa batswadi ba gagwe o tla dula a mo felegetša.
5 Go Boloka Nako ke Gabohlokwa: Ka dinako tše dingwe maemo a sa phemegego a ka re thibela go fihla dibokeng ka nako, eupja go tlwaela go fihla ka morago ga nako ka morago ga kopelo ya go bula le thapelo go bontšha go se hlomphe morero o mokgethwa wa diboka le boikarabelo bja rena bja go phema go šitiša ba bangwe. Gopolang gore go opela le go rapela gotee le banababo rena dibokeng tša phuthego ke karolo ya borapedi bja rena. Go tlwaela go ba ka morago ga nako gantši go bakwa ke go se rulaganye gabotse goba go palelwa ke go rulaganya e sa le pele. Go boloka nako go bontšha gore re hlompha le go leboga diboka tša rena.
6 Ge letšatši le dutše le batamela ka mehla, go nyakega ga go bokana gotee go gola kudu. (Ba-Heb. 10:24, 25) A re bontšheng tebogo ya rena ka go ba gona ka mehla dibokeng, go lokišetša e sa le pele, go boloka nako, go hlwaya tsebe ke moka re diriše seo re ithutago sona.