Šetša Lentšu La Boporofeta

¹ “Re na le Lentšu leo la porofetô le le tiilexo ruri.” (2 Pet. 1:​19) Ke ka baka la’ng Petro a ile a bolela se? Diporofeto tša Mmušo tše di lego ka Mangwalong a Sehebere gotee le tše di tšwago go Jesu Kriste ka boyena di be di kgonthišeditšwe, goba di ‘tiišitšwe ruri’ ke seo Petro le barutiwa ba bangwe ba babedi ba bego ba se bone le go se kwa tiragalong ya go tagafala nywageng e 32 pejana. Pono ye ya tiragatšo e be e ba kgonthišeditše gore Jesu Kriste ka kgonthe o be a tla tsena matleng a Mmušo ka letago le le phadimago le ka go thekgwa ka mo go feletšego ke Tatagwe. Bakriste ba lekgolong la pele la nywaga ba be ba ‘dira gabotse ge ba šetša lentšu leo la porofeto bo-ka lebone le le etšago,’ ka ge ka ntle le moo dipelo tša bona di be di tla fsifala. Go šetša lentšu la boporofeta le le bonegelago go be go tla ba dira gore ba dule ba phakgame e bile ba sedimošeditšwe ka mahube a letšatši le lefsa, ge “naledi ya mesô” Kriste a be a tla rotoga a le letagong la Mmušo.​—⁠2 Pet. 1:​16-19; Mat. 17:​1-⁠9.

² Re be re se gona go ka bona tiragalo ya go tagafala ga letago gotee le Petro. Lega go le bjalo, Bakriste ba molokong wo ba ba ilego ba šetša lentšu la boporofeta ba bile le tokelo e phagamego ya go bona, e sego pontšho e dirilwego e sa le pele ya Mmušo wa Kriste, eupja bohlatse bjo bogolo bja gore Kgoši ya letago e buša e le ka kgonthe! Ngwaga o mongwe le o mongwe o fetago ga e sa le go tloga ka 1914, lentšu la boporofeta le tiišwa e le ruri ge re dutše re bona phethagalo ya dikarolo tše di fapa-fapanego tša “pontšho” e kgahlišago yeo Jesu a e neilego ya “go ba gona” (NW) ga gagwe e le kgoši. Karolo e bohlokwa ya pontšho ke ya gore go tsebišwa ga pušo ya gagwe goba Mmušo, go be go tla dirwa ditšhabeng ka moka pele Kgoši e tliša bofelo bja tshepedišo ye ya dilo. Ka tlase ga tlhahlo ya Kriste, bjale modiro wa go bolela ka Mmušo o dirwa dinageng tše 231 ka tekanyo yeo e sa kago ya akanywa pele. (Mat. 24:​3-14) Go feta moo ge nako ya ‘tlaišego e kgolo’ e dutše e batamela, Kgoši e beilwego sedulong sa bogoši e be e dutše e kgoboketša “lešaba le lexolo” la “ba dithšaba ka moka” le le bontšhago tumelo “mading a Kwana” a lopollago.​—⁠Kut. 7:​9, 10, 14.

³ Ka ge “naledi ya mesô” e šetše e rotogile, ke gore Kriste a šetše a le matleng a Mmušo, na go sa na le lebaka la go šetša lentšu la boporofeta? Ee! Jesu Kriste yo a tagafaditšwego o neile moapostola Johane lelokelelo la dipono tše di bopago puku ya Kutollo. Le ge tše e be e le tše di kgothatšago le go ruta go Bakriste ba pele, di na le mohola o kgethegilego go ba ba phelago ‘letšatšing la Morena’ leo re ikhwetšago re le go lona gona bjale. (Kut. 1:​10) Ke ka baka leo diphuthego tša batho ba Jehofa di ithutago gape puku ya Seremo sa Kutollo mo nakong ye.

⁴ “Wa lehlôxônôlô [“thabilego” NW] ké e a balaxo le ba ba kwaxo mantšu á a porofetô le ba ba lôtôlaxo tše di ngwadilwexo mo xo yôna; xobane lebaka le kxaufsi.” (Kut. 1:⁠3) Ge e ba re tla ba ba ba thabilego, re swanetše go hwetša kwešišo, ee, kwešišo ya kgonthe ya dipono tše tša boporofeta. Se se nyaka’ng? Go boeletša go a nyakega bakeng sa go nweletša dipelong tša rena bohlokwa bja pego ya Kutollo. Moapostola Petro yo e bego e le setho sa sehlopha se bušago sa lekgolong la pele la nywaga, o ile a lemoga bohlokwa bja go boeletša ditherešo tša motheo gore a ‘tsoše’ banababo moyeng. (2 Pet. 1:​12, 13) “Molaki e a bôtêxaxo yo bohlale” wa mehleng yeno o re thuša ka mo go swanago go boloka tebogo ya rena e phela ka go lebiša tlhokomelo ya rena leboelela lentšung la boporofeta.​—⁠Mat. 24:​45-⁠47.

⁵ Kamoo go ka Šetšwago ka Gona: Ke tlhokomelo ya mohuta mang yeo e swanetšego go lebišwa lentšung la boporofeta le le lego go Kutollo? Moapostola Paulo o re gopotša gore Modimo ga se a ka a bolela le Bakriste ka barongwa goba baporofeta go etša ge a ile a boledišana le bahlanka ba gagwe ba mehleng ya pele ga Bokriste. Go e na le moo, Jehofa o boletše le rena ka Morwa wa gagwe yo a ratwago kudu yo a mo kgethilego go ba “mo-ja-bohwa wa tšohle.” (Ba-Heb. 1:​1, 2) “Byale xo rata xore re tiišê xo hlôkômêla tše re di kwilexo, xore di se tlo re timêlêla.” (Ba-Heb. 2:⁠1) Ee, re swanetše go šetša Lentšu la Modimo gomme re šetše kudu-kudu lentšu la boporofeta le le tlago ka Jesu Kriste. Re ka lebiša bjang tlhokomelo ka mo go kgethegilego thutong ya rena ya Kutollo?

⁶ Sa pele, ke gabohlokwa kudu go ba gona bekeng e nngwe le e nngwe Thutong ya Puku ya Phuthego. Ee, go ba bantši ba rena le e tla be e le lekga la boraro re ithuta puku ya Seremo sa Kutollo. Ka gona, ba bangwe ba ka lebelela go ba gona thutong ya puku ka go go tshediša mahlo ba nagana gore gaešita le ge ba foša seboka, ba šetše ba tlwaelane le taba. Lega go le bjalo, ge ngwaga o mongwe le o mongwe o feta, tsebišo ye ya boporofeta e ba e swanetšego le e lego nakong kudu go feta kamoo e bego e le ka gona ka 1989 ge re be re thoma go ithuta puku ya Seremo sa Kutollo. Ka moka ga rena re swanetše go phafogela ditiragalo tša mehleng yeno tše di gatelago pele ka lebelo go phethagatša diporofeto tša Kutollo. Ka gona, re ka itokišetša go gata mogato ka go dumelelana le thato ya Jehofa. Ipeele pakane ya go se foše thuto le e tee ya puku nakong ye ya tsheka-tsheko e bohlokwa ya Kutollo, ge e ba go kgonega.

⁷ Sa bobedi, lokišetša thuto ya gago gabotse. Bala mangwalo a bontšhitšwego gomme o naganišiše kamoo a thekgago ka gona tlhaloso ya ditemana tša Kutollo tše di ithutwago. Ka tsela ye o tla hwetša se segolo go feta dikarabo tša dipotšišo. Katanela go hwetša e sego tsebo feela, eupja hwetša le bohlale gotee le kwešišo. (Die. 4:⁠7) Sa boraro, tšea karolo ka mafolofolo ka go nea ditlhaloso le go bala mangwalo. Bea pakane ya go araba bonyenyane gatee, gomme go kgethwa gore e be ka makga a mmalwa thutong e nngwe le e nngwe. Go dira bjalo go tla go thuša gore monagano wa gago o dule o tsepamišitšwe thutong.

⁸ Go lebiša tlhokomelo e fetago e tlwaelegilego lentšung la boporofeta go akaretša se se fetago go lokišetša, go ba gona le go tšea karolo. Gape go bolela gore gaešita le ka morago ga thuto, re tšwele pele re ‘naganišiša ka dilo tše, re nwelele go tšona.’ (1 Tim. 4:​15) Ge e ba lentšu la boporofeta le tla swana le lebone le le phadimago dipelong tša rena, re swanetše go le dumelela gore le kgome motho wa rena wa ka gare ka mo go tseneletšego​—⁠dikgopolo, dikganyogo, maikwelo, ditutuetšo le dipakane tša rena. (2 Pet. 1:​19) Ka gona, re swanetše go ba re ipotšiša dipotšišo tše bjalo ka: Tsebišo ye e bolela’ng go nna ka noši? Ke ithutile’ng ka Jehofa le Morwa wa gagwe, Jesu Kriste? Ke melao efe ya motheo e thekgago taba? Na ke kwešiša thuto pelong ya-ka? Nka diriša bjang ditherešo tše bophelong bja-ka? Ka lapeng lešo? Ka phuthegong? Ka go diriša e le ka kgonthe seo re ithutago sona bjalo ka ge mopsalme a dirile, re ka re: “’Ntšu la xaxo ké lebônê la dinaô tša-ka, ké seetša tseleng ya-ka.”​—⁠Ps. 119:​105; Jobo 29:​3, 4.

⁹ Dulang le Phafogile Dinakong tše Thata: Ngwageng wa 33 C.E., Jesu o ile a lemoša barutiwa ba gagwe ka phedišo e tlago ya Jerusalema le boemo bjo bo bego bo tla bontšha nako ya gore ba tšhabele lefelong le le šireletšegilego. (Luka 19:​41-44; 21:​7-21) Ka morago go ile gwa feta nywaga e 30. Go Bakriste ba bangwe ba Judea, go ka be go ile gwa bonala eka go be go tla fetoga go se nene nakong e tlago e lego kgaufsi. Keletšo e tšwago go moapostola Petro yo a rategago e lego lengwalong la gagwe la bobedi le le ngwadilwego mo e ka bago ka 64 C.E. ya go ‘šetša lentšu la porofeto,’ e be e le nakong gakaakang! (2 Pet. 1:​19) Lebaka le lekopana ka morago ga moo ka 66 C.E., Jerusalema e ile ya dikanetšwa ke madira a Roma. Ge madira a Roma a be a tloga gatee-tee ka ntle le lebaka le le tsebjago, Bakriste ba Judea ba ba bego ba phafogile ba ile ba latela ditaelo tša Jesu gomme ba tšhaba. Ka morago ka 70 C.E., madira a Roma a ile a boa gomme a senya Jerusalema ka mo go feletšego. Bakriste bao ba swanetše go ba ba ile ba thabela gakaakang gore ba šeditše lentšu la Jesu la boporofeta!

¹⁰ Rena Bakriste ba mehleng yeno re phakgametše eng? Diponong tša Kutollo, Jesu o phafošeditše Bakriste ba ba phelago gona bjale ditiragalo tše dintši tše di bego di tla direga letšatšing la Morena. Nywageng e 80 e fetilego, bontši bja ditiragalo tše di šetše di diregile: go tswalwa ga Mmušo; ntwa legodimong le go fenywa mo go latetšego ga Sathane le batemona ba gagwe mo go latetšwego ke go thibelelwa ga bona tikologong ya lefase; go wa ga Babele o Mogolo; le go tšwelela ga sebata se sehwibidu, e lego mmušo wa seswai wa lefase. Go phethagala ga dikarolo tše tša lentšu la boporofeta le le lego go Kutollo go kgonthišetša kudu gore kgaufsinyane re tla bona ditiragalo tše tše di šetšego tše di kgahlišago: go swawa ga ditho tša mafelelo tša ba 144 000, go kgoboketšwa mo go phethilwego ga lešaba le legolo, go fedišwa ga Babele o Mogolo, ntwa ya Haramagedone, go lahlelwa ga Sathane sekoting le Pušo ya Kriste ya Nywaga e Sekete. Ke gabohlokwa gakaakang gore re šetše temošo ya Jesu e rego: “Tsebang, ke e-⁠tla byalo ka lehodu. Wa lehlôxônôlô ke eo a phakxamaxo, a lôtôla diaparô tša xaxwe, a se tlo sepela à hlobotše, ba mmôna dihlong tša xaxwe”!​—⁠Kut. 16:⁠15.

¹¹ Na re dula re phakgame? Re tšeela lentšu la boporofeta godimo gakaaka’ng? Go sa šetšwe ge e ba re neetše maphelo a rena go Jehofa nywageng e mehlano goba e 50 e fetilego, mantšu a Paulo go Bakriste ba Roma a šoma go rena ka mo go swanago: “Lè tseba lebaka la xore ké nakô ya xo tsoxa borokong, xobane xo phološwa xa rena byale ké xôna xò batametše xo fetiša mola rè sa thôma xo dumêla. Bošexo e šetše e le bya matla-xosa, letšatši le kxaufsi.” Ka gona Paulo o kgothaletša Bakriste go ‘apola mediro ya lefsifsi’ le go ‘sepela ka bothakga.’ (Ba-Roma 13:​11-13; bapiša le NW.) Re phela lefaseng le le lego kgamping ya lefsifsi ge go tliwa boitshwarong. Seo e bego e le boitshwaro bjo bo tšhošago nywageng e 30 goba e 40 feela e fetilego, ke se se tlwaelegilego bathong ba bantši ba lefase ngwaga-someng wo wa mafelelo wa ngwaga-kgolo wa bo-20. Banababo rena, hlokomelang gore le ka mohla le se ke la itumelela go gogolelwa lefsifsing la lefase gomme la otsela boitshwarong. Ge e ba le itumelela go ba ba ba tlogelelago dilo goba ba ba kgotlelelago kgopolo e gobogilego ya lefase le le tsela ya bophelo, le tla lahlegelwa ke pono ya dikgang tše dikgolo tšeo re lebanego le tšona lehono le tšeo di tla tlogago di rarollelwa sa ruri: go phagamišwa ga bogoši bja Jehofa le go kgethagatšwa ga leina la gagwe. Go otsela moyeng go tla bea phologo ya motho kotsing, yeo gabjale e batametšego gakaakaa.

¹² Godiša Tebogo e Tšwago Pelong Bakeng sa Lentšu la Boporofeta: Baporofeta ba bogologolo ba ba-Hebere ba be ba kgahlegela kudu go phethagala ga dipolelo tša bona tše di buduletšwego ka moya mabapi le Mesia. Ba “nyakile ba latiša ka menaxano” mabapi le go phethagala ga morero wa Modimo. (1 Pet. 1:​10, 11) Ka mo go swanago, ge o dutše o šeditše lentšu la boporofeta le le lego ka pukung ya Kutollo, tebogo ya gago bakeng sa dilo tša moya e tla gola. Kganyogo ya gago ya dijo tša moya e tla gola moo o tlago go tutueletšega go epa ‘madibeng a diphiri tša Modimo.’ (1 Ba-Kor. 2:​10) Ge o dutše o tlatša pelo ya gago ka tebogo le lerato bakeng sa lentšu la boporofeta, go ka se nyakege gore motho le ge e le mang a go kgothaletše go ya dibokeng; o tla tutueletšega go ba gona le go tšea karolo ka mehla. (Luka 6:​45) Ge e ba lentšu ‘le le ka pelong ya gago,’ o tla tutueletšega ‘go le bolela ka molomo gore o phološwe.’​—⁠Ba-Roma 10:​8-⁠10.

¹³ Ge re dutše re tsenelela gare nakong ya bofelo, ke moo bakweri ba tlago go re kwera ka baka la go phegelela tumelong ya rena dipolelong tša Modimo tša boporofeta. (2 Pet. 3:​3, 4) Lega go le bjalo, re tla dula re phafogetše lentšu la boporofeta. Lebone la Lentšu la Modimo le re bontšha moo re lego gona ge e le mabapi le nako. Le bonega ka mo go phadimago kudu therešong ya gore re mehleng ya bofelo ya lefase le la lefsifsi. Naledi ya meso e rotogile! Kriste o matleng a Mmušo! Re šetše re bona mahube a letšatši le lefsa gore a kgaufsi. Eka lefase le lefsa la Modimo le le holofeditšwego le ka tšwela pele e le la kgonthe go rena, go etša kamoo Mmušo o bego o le ka gona go baapostola ba bararo ba ba bilego le tokelo ya go bona pontšho ya wona e dirilwego e sa le pele ponong ya mohlolo ya go tagafala ga Jesu!