Thuto ya Motho ka Noši—Taba ya Bohlokwa
1 Ke dilo dife tše di re bakelago gore re tshwenyege kudu ka tšona? Re swanetše go tshwenyega kudu ka go godiša le go kgomarela tswalano ya kgaufsi le Jehofa. Thuto ya motho ka noši e kgatha tema e kgolo go godišeng tswalano e bjalo. Lehono, ke ba sego kae ba rena bao maemo a bona a ba dumelelago gore ba diriše nako e ntši ba naganišiša le go ba le thuto ya motho ka noši. Lega go le bjalo, ge e ba re sa bale Lentšu la Modimo ka mehla, re ka fokola go fihla mo re hlokago matla a go lwantšha moya wa lefase le dikganyogo tša lona tša nama.
2 E-ba le Tlhologelo ya Lentšu: Ge re be re thoma go ithuta ka merero ya Modimo, mohlomongwe re be re fišegela go hwetša tsebo e oketšegilego. Lega go le bjalo, ge nako e dutše e e-ya tlala ya rena ya dijo tša moya e ka be e ile ya fokotšega. Go ka ba go nyakega gore go ‘tlhologelwe’ dijo tša moya. (1 Pet. 2:2, NW) Re ka godiša bjang tlhologelo e bjalo?
3 Monkgo o monate wa dijo tše di rategago o tla re swariša tlala ka baka la dikgopotšo tše di kgahlišago. Dinako tše kopana tša thuto ya motho ka noši di ka re kgoma moyeng ka tsela e swanago. Go thabela marathana a sego kae a latswegago a dijo tša moya go ka loutša kganyogo ya rena bakeng sa ditherešo tše di tseneletšego. Kgotsofalo yeo e tlišwago ke go ithuta e ka re tutueletša go fatišiša ka Lentšung la Jehofa.
4 Hlagolela Mokgwa wa ka Mehla wo o go Tutuetšago Kudu: Ba bangwe ba beela nako ka moka ya mantšiboa ka thoko bakeng sa thuto ya motho ka noši, mola ba bangwe ba rata dinako tše kopana le tše di ipoeletšago kudu tša go ithuta. Ge e ba o hwetša gore o ka kgona go tsepamiša kgopolo gakaone e sa le mesong kudu, o ka phetha ka go ithuta pele ga sefihlolo. Ge e ba o e-ba yo a phafogilego kudu mantšiboa, o ka kgetha go ithuta pele o e-ya go robala. Boemong le ge e le bofe, selo sa bohlokwa ke go ithuta ka mehla le go kgomarela mokgwa wa ka mehla wo o swanelago dinyakwa tša gago gabotse.
5 Ge re kgothaletšwa go ba le thuto ya ka mehla ya motho ka noši, re ka akgofela go šupa gore re šetše re e-na le lenaneo le le tletšego. Lega go le bjalo, ka moka ga rena re swanetše go botega tabeng ya go seka-seka kamoo re dirišago nako ya rena ka gona. Na go senywa diiri tše dintši letšatši le lengwe le le lengwe go bogetšwe mananeo a thelebišene? Na re ikemišeditše go gafa dikgahlego tše dingwe tša rena? Tsheka-tsheko ya kgonthe ya kamoo re dirišago nako ya rena ka gona mohlomongwe e tla utolla dinako tša letšatši le letšatši tšeo di ka dirišetšwago ka mo go holago kudu thutong ya motho ka noši.—Ba-Ef. 5:15, 16.
6 Thuto ya Lentšu la Modimo e swanelwa ke tlhokomelo ya rena e feletšego. Go leka go dira selo se sengwe nakong ya ge o ithuta go nyenyefatša mehola. Ge e ba re sekametše go ithuta mola re e-ja, re theeditše radio goba re bogetše thelebišene, gona re ka se nwelele ka mo go feletšego go seo re lekago go ithuta sona. (1 Tim. 4:15) Ka gona go nyakega gore re fediše ditšhitišo.—Bona Puku ya Tlhahlo ya Sekolo, matlakala 33-4.
7 Thuto ya letšatši le letšatši le go diriša keletšo ya Beibele di bohlokwa ka gobane yeo ke tsela yeo ka yona re hwetšago tlhahlo e tšwago go Jehofa. Ipeele pakane ya go tšea therešo matlakaleng ao a gatišitšwego gomme o e tsenye ka pelong ya gago. Diriša sebaka se sengwe le se sengwe ka mo go holago o bala, o boeletša goba o naganišiša ka dilo tša moya, go sa šetšwe gore ke se senyenyane gakaakang.—Doit. 6:6-8; Ba-Kol. 1:9, 10.