Go Nolofatšwa Ga Kopano Ya Selete Ya 1995
1 Ke mo go thabišago gakaakang go ba gona menyanyeng ya moya, e ka ba dibokeng tša phuthego, dikopanong tša tikologo, matšatšing a kgethegilego a kopano goba dikopanong tša selete! Ka baka la’ng? Go kopana le batho ba ba boifago Modimo go a lapološa, gomme ditaba tša moya tšeo di newago dibakeng tše bjalo di re gopotša ka dilo tša bohlokwa kudu.
2 Dikete-kete tše oketšegago di be di dutše di gogelwa dipokanong tše bjalo tša moya nywageng ya morago bjale. Magareng ga nywaga ya 1985 le 1994, palo ya diphuthego lefaseng ka bophara e oketšegile ka go feta 50 lekgolong, go tloga go 49 716 go ya go 75 573. Ge Jehofa a dutše a akgofiša modiro wa go kgoboketša, palo ya dikopano tša selete le dikopano tša tikologo e oketšega ka mo go swanetšego. (Jes. 60:22) Gaešita le koketšego ya palo ya dikopano tše di swaretšwego tšhemong ya lekala la Afrika Borwa feela, go tloga go tše 21 ka 1984 go ya go tše 30 ka 1994, ke pontšho ya koketšego ye ya palo ya diphuthego. Modiro o tšwelelago o akaretšwago tabeng ya go rulaganyetša le go swara dikopano tše o be o dutše o oketšega. Ka ge re kopana bakeng sa go holwa ke lenaneo la moya le le lokišeleditšwego menyanya ye, ke gabohlale go nolofatša kudu ka mo go holago tabeng ya go hlokomela dithulaganyo tša dilo tše di bonagalago.
3 Megato e Oketšegilego Yeo e Swanetšego go Gatwa: Re lebelela go Jehofa gore a re šegofatše ge re dutše re tšwela pele ka go se kgaotše. Re thabela go bona gore o neile batho ba gagwe moya o nyakegago wa bohlale le tlhaologanyo. Re swanetše go dumela gore Jesu Kriste o laotše ditaba ka bokgoni ka sehlopha sa molaki yo a botegago, bakeng sa go phetha morero wa Jehofa ka tsela e kgahlišago. (Mat. 24:45-47; Ba-Kol. 1:9, 10) Tsebišo e lego ka go Tirelo ya Rena ya Mmušo ya July e itše: “Go thoma ka September 1995 dikopanong tša tikologo le matšatši a kgethegilego a kopano gotee le Dikopano tša Selete tša ‘Bareti ba Thabilego’ bofelong bja ngwaga, go ka se be le dijo. Yo mongwe le yo mongwe o tla swanelwa ke go tla le dijo le dino tša gagwe ka noši.” Go bile le karabelo e botse tsebišong ye. Le ka ba le thabela go tseba kamoo phetogo ye e tlago go ba e holago ka gona. Mohlomongwe poeletšo e latelago ya dipeakanyo tšeo di dirilwego nywageng ya morago bjale e tla itlhatsela e le kgopotšo e botse ya mehola yeo re šetšego re e hweditše ka go nolofatša modiro dikopanong.
4 Dipeakanyo tša Nakong e Fetilego tša go Nolofatša: Pele ga go dirišwa ga dithulaganyo tše di lekaneditšwego le tše nolofaditšwego tša kopano ya selete tše bjalo ka tirelo ya dijo, tirelo ya tša boithapi le tša marobalo, go be go nyakega gore banababo rena le dikgaetšedi ba lefelong leo ba šome kudu modirong wa pele ga kopano. Ka baka la dikgateletšo le dilo tšeo di bego di nyakwa ke bophelo bja letšatši le letšatši go banababo rena gotee le kgolo e tšwelago pele ya mokgatlo, dipeakanyo tša go nolofatša modiro di be di nyakega e le ka kgonthe. Go oketša moo, ka baka la go nolofatša tshepedišo ya rena ya tirelo ya dijo, banababo rena le dikgaetšedi ba bantši ba ba bego ba šoma ka thata ka nako ya mananeo bakeng sa go re lokišetša dijo ba ile ba kgona go theetša lenaneo. Tše e bile dipeakanyo tše dibotse gakaakang, di hwefola modiro le go dumelela gore go lebišwe tlhokomelo e kgolo dibopegong tša moya tša kopano, bašomi ba kgona go theetša le go thabela karolo e kgolo ya lenaneo. (Doit. 31:12) Batho bao ba ba botegago gare ga rena ba ba nago le nywaga e mentši ya tirelo ya potego ba gopola dikaonefatšo tše gabotse, gomme ba bontšhitše tebogo bakeng sa tlhahlo yeo e hweditšwego. Eupša ke modiro ofe wo o bego o ka fedišwa gape go dira gore go kgonege gore ba oketšegilego kudu ba holwe ka botlalo ke lenaneo la moya?
5 Diphetogo tše Letetšwego: Nywageng yeo ka yona go bego go apewa le go abja dijo tše bonolo, go ile gwa lemogwa gore go be go “nyakega” “dilo tše sego kae” kudu e le ka kgonthe. (Bapiša le Luka 10:38-42, NW.) Lega go le bjalo, go atiša dilo tše bjalo tše sego kae ka palo ya ba lego gona go be go sa dutše go bolela tekanyo e kgolo ya ditlabakelo le modiro, gotee le ditlabakelo tše oketšegilego tša theko e kgolo. Ka gona-ge, go be go nyakega palo e kgolo kudu ya baithapi bakeng sa go rulaganya le go thekga dithulaganyo. Go ile gwa swanela gore go lokišetšwe mafelo a polokelo le kabo ya dijo. Go oketša moo, mafapha a mangwe a tša maphelo a mmasepala e bile a feteletšago kudu tabeng ya dinyakwa tša ona bakeng sa go aba dijo, gomme se e bile morwalo go banababo rena ba ba ikarabelelago. Go feta moo, banababo rena ba bantši ba tla imollwa modirong o mogolo wa go hlokomela ditlabakelo tša tirelo ya dijo.
6 Tirelo ya boithatelo ya bao ba ilego ba šoma e le baithapi mafelong a a hlalositšwego e bile e bohlokwa-hlokwa gomme e lebogwa kudu. Lega go le bjalo, ka go nolofatšwa mo mo go oketšegilego, dikete-kete tša bao ba šomago mafapheng a go lokiša le go otlela dilori gotee le go reka, go lokišetša, go romela le go aba dijo ba tla kgona go diriša nako ya bona medirong e mengwe ya bohlokwa ya Mmušo, go akaretša le go thabela bogwera dikopanong ka mo go tletšego kudu. Baithapi bao ba bego ba šoma Tirelong ya Dijo bjale ba tla kgona go thuša mafapheng a mangwe, a bjalo ka la Bahlokomedi le la go Hlwekiša. Se se tla nolofaletša yo mongwe le yo mongwe morwalo gomme se ka se ke sa nyaka gore ba bantši ba šome bošego kudu, e sa le ka pela mesong goba nakong ya mananeo, go etša ge go be go le bjalo ka ba bantši Tirelong ya Dijo.
7 Go Thekga Dithulaganyo: Mokgatlo o leboga kudu thekgo e botse yeo lena banababo rena le dikgaetšedi le e neilego “ka pelo e thšweu” nywageng ka moka dithulaganyong tša kopano, go akaretša le tirelo ya dijo. (1 Kor. 29:9) Se se thušitše ka ditsela tše dintši. Se dirile gore go kgonege gore go hirwe meago e mebotse le go lefelela ditshenyagalelo tša kopano. Le gona go dirile gore bao ba lego gona ba kgone go dula lefelong la kopano nakong e kopana ya go khutša mosegare e le gore ba hwetše dijo ka boiketlo, ba lapologe gomme ka morago ba be gona lenaneong la moya. Le gona ga go na pelaelo gore go fa kudu le thekgo tšeo di ilego tša bontšhwa ke banababo rena le dikgaetšedi tabeng ya go neela bakeng sa ditokišetšo tše di tla tšwela pele. E bile pontšho ya go leboga ga bona ka tsela e šomago.—Die. 11:25; Luka 16:9.
8 Go Hlokomela Dinyakwa tša Gago tša Dijo: Lega go bjalo, ka dipeakanyo tše tše oketšegilego go tla nyakega gore batho ka o tee ka o tee le dihlopha tša malapa ba lokišetše bona feela dijo tše di nyakegago nakong ya rena ya go khutša mosegare. Re lebelela mehola e mebotse ya lenaneo la moya e le ya bohlokwa kudu. E be e ka se be gabohlale go dumelela dijo tša nama gore e be tša bohlokwa ka go fetišiša. Ke gabohlokwa gore yo mongwe le yo mongwe a “kgonthišetše dilo tša bohlokwa kudu” tabeng ye. (Ba-Fil. 1:9, 10a, NW) Dikopano tše dikgolo tša morago bjale tša batho ba Jehofa kua Poland, Russia le Ukraine gotee le mafelong a mangwe, di ile tša swarwa ka katlego e botse ka ntle le dithulaganyo tša tirelo ya dijo. Go oketša moo, ditikologo tše dingwe nageng ye di ile tša swara mananeo a tšona a dikopano le a letšatši le le kgethegilego la kopano ka ntle le tirelo ya dijo ka baka la maemo a lefelong leo. Boemong bjo bongwe le bjo bongwe ba tlilego kopanong ba ile ba itlela le dijo bakeng sa dijo tša mosegare. Re tla hwetša gore ge e ba re fo tla le dijo tše bohwefo tša mosegare, go tla tlaleletša go beng ga rena le boemo bjo bo phafogilego bja monagano, gwa re dira gore re kgone go hwetša mohola o tletšego lenaneong la thapama. Ka go dumelelana le se, yo mongwe le yo mongwe o swanetše go tla le dijo tše bonolo le tše di nago le phepo. Ka mohlala ge Jesu a be a fepa mašaba, o ile a nea dilo tše pedi feela, e lego senkgwa le hlapi. (Mat. 14:16-20; bona le Luka 10:42a, NW.) Gore go phethwe seo, re thabela go nea ditšhišinyo tše itšego ge e le ka seo e ka bago se se swanetšego le se holago ka baka la nako e khutsufaditšwego ya mosegare ya go khutša le mohuta wa meago yeo re e dirišago.
9 Ka ge go ka se sa hlwa go e-ba le dithulaganyo tša tirelo ya dijo kopanong, bao ba bago gona ba tla kgona go ja sefihlolo le malapa a bona e ka ba gae goba lefelong le lengwe ka go rulaganya gabotse. Ka go khutša ka mo go lekanego bošegong bja pele ga kopano, le swanetše go kgona go tsoga e sa le ka pela kudu gore le hwetše seo se nyakegago bakeng sa dijo tša mesong gomme le fihle kopanong go sa na le nako e ntši gore le thabele bogwera le ba bangwe bao ba tlilego kopanong. Mohola o mongwe wa thulaganyo e mpsha ke gore mejako ya meago e ka se ke ya swanelwa ke go ba le baleti le go bulwa e sa le ka pela ge baithapi ba tirelo ya dijo ba tsena gotee le malapa a bona. Mejako ya meago e tla bulwa ka 8:00 a.m. bakeng sa bohle ba ba tlilego kopanong, ka ntle le ba sego kae ba ba nago le dikabelo tše itšego tše di dirago gore go nyakege gore ba tsene pele ga moo. Bjalo ka nakong e fetilego, go ka se ke gwa nyakega gore motho le ge e le ofe a akgofele lefelong la kopano bakeng sa go nyaka madulo, ka gobane go rulaganyeditšwe madulo a lekanego bakeng sa lešaba le le akanyetšwago.
10 Nako ya mosegare ya go khutša e tla ba e kopana go se nene go feta dikopanong tša nako e fetilego. Lega go le bjalo, e sa dutše e tla nea sebaka sa go ja dijo tše bohwefo, gotee le nako ya go kopana le ba bangwe. Banababo rena le dikgaetšedi ba ba dulago motseng wa kopano goba kgaufsi gotee le ba ba boelago gae mantšiboeng a letšatši le lengwe le le lengwe ba tla kgona go lokišetša setho se sengwe le se sengwe sa lapa tekanyo e nyenyane ya dijo bakeng sa nako ya mosegare ya go khutša ya letšatši leo. Se se tla swana kudu le dijo tša mosegare tšeo bafsa ba yago le tšona sekolong, mohlomongwe sangwetši le seenywa, di-biscuit le seno. Batho ba bantši ba tšea dijo tše swanago tša mosegare ge ba e-ya medirong ya bona ya boiphedišo.
11 Se ka ntle le pelaelo se tla tšweletša tlhohlo e kgolo go bao ba bago gona ba tšwago mafelong a lego ka ntle ga motse wa kopano, ka ge go tla nyakega gore ba rulaganye dijo tša bona tša mosegare e sa le pele. Mohlomongwe go ka tliwa le dilo tše bjalo ka di-serviette le dikomiki tša pampiri tšeo di lahlwago go tšwa gae bakeng sa bao ba sepelago le bona sehlopheng. Ba bangwe ba ka hwetša gore dijo tše bohwefo tša dienywa tše dinanana goba merogo e tla ba tše di lekanego bakeng sa go kgotsofatša dinyakwa tša bona, gomme tše le tšona go ka tliwa le tšona go tšwa gae. Dinyakwa tše dingwe tša dijo bakeng sa nako ya mosegare ya go khutša ya letšatši leo di ka rekwa lebenkeleng la go rekiša krosari motseng wa kopano.
12 E le kgopotšo, hle LE SE KE LA APEELA KA DINTLONG TŠA MAROBALO, DIPHAPOŠING TŠA SEKOLO GOBA MEAGONG YA SEKOLO ka ntle le ge di e-na le khitšhi e nyenyane bakeng sa morero woo. Go kotsi e bile ga se ga molao go dira bjalo, gomme go ka senya maboto ka dipatso le makhura. Go tšweletša menkgo yeo go lego thata go e fediša ka diphapošing ka matšatši a mantši. Ke ka baka leo e ka bago gabohlale go nagana ka go reka dilo tše di sa bolego, tše bjalo ka ditokomane, dienywa tše omišitšwego le di-biscuit goba le ka kgetha go tla le dilo tše pakilwego, tše bjalo ka borotho, dikuku goba di-muffin. Ge e ba sejo sa mosegare se se bjalo ka sangwetši se kganyogwa, mohlomongwe lebenkele la dijo leo le lego kgaufsi le lona le ka ba le e-na le karolo ya dijo tšeo di šetšego di apeilwe moo dijo tše di apewago gona. Go reka mohuta wo wa dijo tše di šetšego di apeilwe go tla fediša go apeela dijo lefelong leo le robalago go lona goba ka dinamelweng.
13 E re ka ge lefelo la kopano ge e le gabotse le fetoga Holo e kgolo ya Mmušo nakong ya kopano, gape ke gabohlale go phema go tšweletša moya wa pikiniki nakong ya mosegare ya go khutša. Go fo etša ge re sa je nakong ya diboka Holong ya Mmušo, re ka se ke ra ja goba go nwa nakong ya mananeo a kopano. Di-cooler tše dikgolo tša pikiniki di ka se ke tša dumelelwa lefelong leo kopano e swaretšwego go lona. Di ka baka dikotsi gomme di ka se ke tša tlogelwa ditsejaneng tša magareng ga ditulo goba tša bewa ditulong. Mohlomongwe mekotla e megolo yeo e ka dirišwago leboelela goba diphuthelo tša pampiri tšeo di lahlwago e ka ba tše swanetšego gakaone go dirišetšwa dijo tše bohwefo tšeo di tlago go nyakega bakeng sa nako ya rena ya mosegare ya go khutša. Ge e ba go nyakega, cooler e nyenyane yeo e ka bewago ka tlase ga setulo, e sego godimo ga sona e ka dirišwa.
14 Gape tlhokomelo e swanetše bontšhwa tabeng ya mehuta ya diswaro tša dino tšeo re kgethago go tla le tšona lefelong la kopano. Dino tša go fiša go ka tliwa le tšona ka di-flask. Diswaro tša galase tša mohuta le ge e le ofe di ka ipontšha di le kotsi. Meago e mentši e bile e iletša go dirišwa ga tšona. Ka gona, re kgopela gore GO SE TLIWE LE DISWARO TŠA GALASE mafelong a kopano. Ge e ba seno seo o se kgethilego se se tonyago se ka se ke sa rekwa ka diswaro tša dipolasitiki goba tša aluminum, go tla ba kaone kudu go se tšhela ka gare ga seswaro se senyenyane sa mohuta o mongwe o sa thubegego seo se tlago go lekana ka tlase ga setulo sa gago.
15 Mehola e Oketšegilego: Ka kgonthe re kgona go bona bohlale bja dithulaganyo tše bjalo tše di beakantšwego. Bohle ba tla kgona go lebiša tlhokomelo e tletšego go amogeleng mehola ya moya—e lego morero wa kgonthe wa go bokana ga rena. Mehola ye e newa bogwereng bjo re bo thabelago gotee le lenaneong ka bolona. Ka gona go e na le go tloga lefelong la kopano nakong ya mosegare ya go khutša bakeng sa go yo nyaka dijo, go tla ipontšha e le mo go holago gakaakang go tla le selo se sengwe. Se se tla dira gore re kgone go thabela bogwera bja banababo rena le dikgaetšedi, gomme se tla re thibela go lahlegelwa ke lenaneo le ge e le lefe la thapama.
16 Ka ge ba lapologile moyeng ka morago ga lenaneo la thapama, ba bangwe ba ka thabela bogwera bjo bo tšwelago pele bja Bokriste le go boledišana ka dilo tše dibotse tšeo ba ithutilego tšona ge ba dutše ba e-ja dijo tše tiilego kudu le lapa gotee le bagwera mafelong a go jela a lefelong leo. Ba bangwe ba ka fo reka se sengwe lebenkeleng la krosari goba la dijo tše di šetšego di apeilwe. Bao ba kgonago go boela magaeng a bona ba ka kgetha go ja dijo tša mantšiboa moo, go etša ge ba dira bjalo matšatšing a mangwe ao ba a dirišago modirong wa boiphedišo goba tirelong ya tšhemo.
17 Re tloga re thabela monyanya wa moya dikopanong tše tše dinyenyane le tše dikgolo moo re amogelago dipuku tše difsa, thuto e botse le keletšo e šomago. Ditšhegofatšo tše ke tšeo yo mongwe le yo mongwe a di gopolago, gotee le lethabo la go ba le batho ba Modimo ba bokanego. Diema 10:22 (PK) e re: “Tšhegofatšo ya Jehofa e a humiša, gomme ga e ekeletšwe ka bohloko.” Se ke ka gobane ka ge re le batho ba Jehofa, ga re ye dikopanong ka kgopolo ya go nyaka dilo tše di bonagalago le boiketlo. Re bokana ka kganyogo e nepagetšego ya go hwetša mohola o mogolo kudu ka mo go kgonegago wa moya, gomme Jehofa o re putsa ka mo go humilego ka baka la moya wo re o bontšhago.—1 Tim. 6:6-8; Ba-Heb. 11:6.
18 Dibaka tše tša kgothatšo di re gopotša le ka tšwelopele ya puno ya moya. (Joh. 4:35, 36) Mantšu a mathomo a Jesaya kgaolo 54 a kgopela mokgatlo wa Jehofa o swanago le mosadi gore o lokišeletše dikoketšego tše di thabišago. Re letetše kgolo e oketšegilego, katološo le matla a mpshafaditšwego go etša ge Jesaya a porofetile gore: “Katološa lapá l’axo, hláka ya ngwakô wa xaxo e dirê e kxolo e namê, mathudi a ahlamê, O tsemê dikôkwanê. Xobane Le tlo tlala naxa thokô ya xo le letona le xo la ntsôxôšô.” Go phethagala ga boporofeta bjo bjo bo thabišago go feleleditše ka katološo e makatšago ya borapedi bja therešo yeo re e bonago mo nakong ye.—Jes. 54:1-4.
19 Ruri go bonala e le tsela ya kahlolo e botse go diriša thulaganyo ye e tšwelago pele e nolofaditšwego ya kopano e le gore bohle ba tle ba kgone go thabela ka ntle le tšhitišo lenaneo la moya leo le lokišeditšwego. Gape re holofela gore se se tla šegofatšwa ke Jehofa, ka ge se tla dumelela go hlokomelwa ka mo go lekanego kudu ga kgolo e tšwelago pele. Ka go lebiša tlhokomelo go seo se nyakegago, re tla kgona go thabela matšatši a rena ao a rulaganyeditšwego a bogwera bjo bo thabišago le dilo tše dibotse tša moya. Re holofela ka pelo ka moka gore Jehofa o tla šegofatša maiteko a rena ka moka ge re dutše re tšwela pele go bokana le go fepša tafoleng ya gagwe.—Bapiša le Doiteronomio 16:14, 15.
[Lepokisi go letlakala 8]
Mehola ya go se be le Dithulaganyo tša Tirelo ya Dijo
◼ Go ba le modiro o monyenyane pele ga lenaneo, nakong ya lona le ka morago, go dumelela bogwera bjo bo oketšegilego
◼ Ga go na ditlabakelo tša tirelo ya dijo tše di swanetšego go lokišwa
◼ Batho ba oketšegilego ba tla kgona go lebiša tlhokomelo e tletšego lenaneong la moya
◼ Go tla ba le baithapi ba oketšegilego bakeng sa go thuša mafapha a mangwe
◼ Go tla ba le nako e oketšegilego bakeng sa mediro e mengwe ya pušo ya Modimo
Dilo Tšeo go Šišinywago Gore go Tliwe le Tšo-na Bakeng sa Nako ya Mosegare ya go Khutša
◼ Dijo tše bohwefo, tše bonolo le tše nago le phepo tša mosegare
◼ Dienywa tše omišitšwego, ditokomane, dijo tše di pakilwego le dienywa tše dinanana
◼ Di-cooler tše dinyenyane ge e ba go nyakega
◼ Dino tše bonolo, di-fruit juice goba meetse a lego ka mabotlelong ao a sa thubegego
Tšeo GO SA Swanelwago go tla le Tšona Lefelong la Kopano
◼ Dino tše di tagago
◼ Diswaro tša galase
◼ Di-cooler tše dikgolo tša pikiniki