Thuša Ba Bangwe Gore Ba Ikhole
1Jehofa o holofetša go re ruta seo re nyakago go se tseba. O re kgonthišetša go Psalme 32:8 gore: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” Kgonthišetšo ye e na le mohola o mogolo go rena. Re nyaka go bontšha ba bangwe ka ntle le boithati kamoo ba ka ikholago ka gona ka go ela hloko keletšo e bohlale e tšwago Beibeleng. (Jes. 48:17) Re ka dira se ka September ka go sepediša puku ya Phela ka mo go sa Felego. Ge re dira dithero tša rena, go na le ditsela tše di fapa-fapanego tšeo ka tšona re ka bontšhago mohola o šomago wa Beibele.
2Ka baka la go ata ga mathata a lenyalo lehono, mo gongwe o ka kgetha go bolelela kgopolo ye e tšwago pukung ya “Phela ka mo go sa Felego”:
◼ “Bontši bja batho bao ke boledišanego le bona ba tshwenyegile kudu ka koketšego e kgolo ya go hloka lethabo ga lenyalo le tlhalo. O ikwa bjang ka bothata bjo? [Dumelela karabo.] Ba bantši ba ile ba palelwa ke go lemoga dibaki tša motheo. Ge ba dira boiteko bja potego, ga se feela gore banyalani ba ka šireletša lenyalo la bona eupša ba ka hwetša le lethabo la kgonthe. Senotlelo sa katlego se ithekgile ka go diriša keletšo e hwetšwago Beibeleng.” Bala Ba-Efeso 5:28, 29, 33. Phetla go letlakala 243, ahla-ahla dirapa 16 le 17 gomme ka morago o sepediše puku.
3Bana ba nyaka nako ya bohlokwa le tlwaetšo go tšwa go batswadi ba bona. Ge o bolelela puku ya “Phela ka mo go sa Felego,” mo gongwe o ka re:
◼ “Ka moka ga rena re tshwenyegile ka katlego ya ka moso ya bafsa ba rena. Ka kgopolo ya gago, tsela e kaone ke efe yeo batswadi ba ka thušago bana ba bona go hwetša bokamoso bjo bo šireletšegilego? [Dumelela karabo.] Theetša keletšo ye e tšwago seemeng sa Beibele se se ngwadilwego mo e ka bago nywaga e 3 000 e fetilego. [Bala Diema 22:6.] Le ge bana ba rena ba ka holwa kudu ke thuto yeo ba e hwetšago sekolong, tlwaetšo e holago kudu e newa ke batswadi ba bona ka gae. Go nyakega nako, tlhokomelo le lerato, eupša se se tloga se swanelwa ke boiteko.” Phetla go letlakala 245, ahla-ahla dirapa 20 le 21 gomme ka morago o hlalose kamoo puku e ka dirišwago ka gona e le motheo bakeng sa thuto ya lapa ya Beibele.
4Mo gongwe o ka rata go sepediša puku ya “Phela ka mo go sa Felego” ka go bontšha kamoo lefase le tlago go ba paradeise ka gona:
◼ “Ke kgolwa gore o tshwenyegile ka seo bophelo bja gago bo tlago go ba ka gona nakong e tlago. Thapelong ya Morena, Jesu o re rutile go rapelela gore thato ya Modimo e dirwe lefaseng go etša ge e dirwa legodimong. Lefase le tla ba bjang ge seo se direga? [Dumelela karabo.] Mo ke seswantšho sa moswantšhi sa lefase la paradeise. [Bontšha seswantšho se se lego go matlakala 12 le 13. Ke moka o bale Jesaya 11:6-9 yeo e akareditšwego go serapa 12.] Na go phela lefaseng le le bjalo e ka se be mo go kgahlišago? Puku ye e tla go bontšha kamoo wena le lapa la gago le ka phelago ka gona paradeiseng e swanago le ye.”
5Go lokišetša thero ya gago e sa le pele ke lebaka la motheo tabeng ya go laola ge e ba o tla ba le katlego mojakong. Pele o kokota, kgonthišetša gore o na le selo se se kgethegilego seo o tlago go se bolela mabapi le kgopolo ya Mangwalo. Le gona, dula o gopola ka tlhaloso e kopana mabapi le karolo e kgahlišago ya makasine goba pampišana yeo o rerago go e sepediša ge puku e sa amogelwe. Diriša sebaka se sengwe le se sengwe seo o nago le sona ka mo go holago bakeng sa go bjala dipeu tša therešo ya Mmušo ka September. (Mmo. 11:6) O tla be o thuša ba bangwe go buna mehola yeo e tlago go ba ya ka mo go sa felego.