Tiragalo e Bohlokwa-hlokwa Historing ya Batho
1 Jesu o tlile lefaseng ka taelo ya Tatagwe e le gore a tle a hlatsele therešo yeo e bego e tla re iša bophelong bjo bo sa felego. (Joh. 18:37) Go botega ga gagwe go fihla lehung go tlišeditše Jehofa tumišo, gwa kgethagatša leina la Modimo le go nea topollo. (Joh. 17:4, 6) Se ke seo se dirilego gore lehu la Jesu e be tiragalo e bohlokwa-hlokwa historing ka moka ya batho.
2 Go tloga go bopšeng ga Adama, go bile le batho ba babedi feela ba ba phethagetšego bao ba kilego ba phela godimo ga lefase le. Adama o be a le boemong bja go tlišetša bana ba gagwe bao ba bego ba sešo ba belegwa ditšhegofatšo tše di kgahlišago. Go e-na le moo o ile a rabela ka boithati, a ba iša bophelong bjo bo nyamišago bjo bo bego bo tla feleletša ka lehu. Ge Jesu a e-tla, o ile a bontšha potego e phethagetšego le go kwa, a bula sebaka sa bophelo bjo bo sa felego bakeng sa bohle ba ba bontšhago tumelo.—Joh. 3:16; Ba-Roma 5:12.
3 Ga go na tiragalo e nngwe yeo e ka bapetšwago le lehu la Jesu la sehlabelo. Le fetotše tsela ya histori ya batho. Le theile motheo bakeng sa go tsoša batho ba dimilione tše dikete bahung. Le theile motheo bakeng sa Mmušo o sa felego woo o tlago go fediša bokgopo gomme wa dira lefase paradeise. Le tla feleletša le lokolotše batho ka moka mehuteng ka moka ya kgateletšo le bokgoba.—Ps. 37:11; Dit. 24:15; Ba-Roma 8:21, 22.
4 Tše ka moka di re thuša go kwešiša lebaka leo ka lona Jesu a laetšego barutiwa ba gagwe gore ba gopole lehu la gagwe ka go bina monyanya wa Segopotšo ngwageng o mongwe le o mongwe. (Luka 22:19) Ka go lemoga bohlokwa bja sona, re lebeletše pele go bokana le diphuthego tša Dihlatse tša Jehofa lefaseng ka bophara ka morago ga ge letšatši le sobetše ka Labohlano, April 14. Pele ga nako yeo, e tla ba mo gobotse go bala re le gotee bjalo ka lapa dipego tša Beibele tša matšatši a Jesu a mafelelo lefaseng le go emela ga gagwe therešo ka sebete. (Ditemana tše di šišintšwego di ngwadilwe go 1995 Calendar, April 9-14.) O re beetše mohlala wa boineelo go Mmopi wa rena. (1 Pet. 2:21) A re direng sohle se re ka se kgonago go laleletša bagwera ba rena le malapa, gotee le barutwana ba Beibele le batho ba bangwe ba ba thabelago monyanyeng wo o bohlokwa. Hlalosa e sa le pele ka seo se tlago go direga gotee le seo se bolelwago ke diswantšhetšo.—1 Ba-Kor. 11:23-26.
5 Bagolo ba swanetše go rulaganya gabotse e sa le pele go kgonthišetša gore Holo ya Mmušo e thakgilwe gabotse e bile e hlwekile. Go swanetše go dirwe ditokišetšo tša gore yo mongwe a yo hwetša diswantšhetšo. Go sepedišwa ga diswantšhetšo go swanetše go rulaganywe gabotse. Ditšhišinyo tše holago tša kamoo re ka bontšhago tlhompho ka gona bakeng sa Selalelo sa Morena, di neilwe ka go Morokami wa February 15, 1985, letlakala 17. E tla ba mo go swanetšego kudu gore phuthego e rulaganyetše modiro o oketšegilego wa tirelo ya tšhemo matšatšing a mmalwa pele ga monyanya gotee le matšatši a sego kae ao a o latelago.
6 Ngwagola, palo-moka ya ba 12 288-917 ba bile gona lefaseng ka bophara bakeng sa go gopola tiragalo ye e bohlokwa. Ka ge e le letšatši le bohlokwa kudu tšhupamabakeng ya rena, ka moka ga rena re swanetše go ba gona.