Go Bina Monyanya Wa Lehu Le Le Neago Kholofelo Ya Bophelo Bjo Bo Sa Felego

1 Ka morago ga ge letšatši le sobetše ka April 6, 1993, re tla bina monyanya wa lehu la Mmoleledi o Mogolo wa bophelo. (Dit. 3:15, NW) Ee, ke mo go swanetšego kudu go gopola bophelo le lehu tša Jesu Kriste. Kholofelo ya rena ka noši ya go phela ka mo go sa felego e theilwe mading a Jesu a tšholotšwego.

2 Segopotšo se gatelela bohlokwa bja lehu la Kriste go phethagaleng ga morero wa Jehofa. Morero woo o akaretša go neela sehlabelo sa motho se se phethagetšego seo se nyakegago bakeng sa go lopolla bana ba Adama, go dira gore go kgonege gore ba dimilione tše dikete ba bontšhe tumelo gomme ba phele ka mo go sa felego lefaseng la paradeise.—Joh. 3:16.

3 Barati ka moka ba therešo le bophelo ba fagahlela go bina monyanya wa Selalelo sa Morena ka go kwa taelo ya Jesu. (Luka 22:19) Rena re le batho ka o tee ka o tee re ka dira’ng go bontšha tebogo ya rena bakeng sa tokišetšo ya sehlabelo sa Kriste sa topollo? Ka go lemoga bohlokwa bja monyanya wo, thulaganyo e botse ke ya bohlokwa kudu. O dira ditokišetšo dife bakeng sa tiragalo ye e kgethegilego?

4 Go Lokišetša e sa le Pele go a Nyakega: Ee, re tla kgonthišetša gore setho se sengwe le se sengwe sa lapa se ba gona. Gape re swanetše go lokiša monagano ka go bala le go naganišiša ka ditemana tša Beibele tšeo di bontšhitšwego go 1993 Calendar bakeng sa April 1-6. E ka ba mo go swanetšego go akaretša tsebišo e lego mabapi le bohlokwa bja Segopotšo thutong ya Beibele ya motho ka noši le ya lapa pejana ga April 6. Rulaganyetšang go fihla ka pela le go dula nako e kopana ka morago ga ge monyanya wa Segopotšo o phethilwe e le gore le be gona bakeng sa go amogela ba bafsa bao ba ka bago ba tlile ka lekga la mathomo.

5 Dibekeng tša pele ga Segopotšo, laletšang batho ka moka bao ba thabelago bao le ba tsebago monyanyeng wo. Dirišang ditaletšo tše di gatišitšwego tšeo di otarilwego ke phuthego ya lena. Ge le di diriša, gopolang go tsebiša batho bao ba thabelago ka aterese le nako bakeng sa monyanya lefelong la lena. Lokišetšang lelokelelo la bao le ratago go ba laletša. Na bohle bao ba ratago go tla ba na le dinamelwa? Ge e ba go se bjalo, le ka dira’ng bakeng sa go ba thuša? Ge e ba o e-na le sekgoba ka koloing ya gago, ke ka baka la’ng o sa botšiše bagolo ge e ba go e-na le motho yo a nyakago senamelwa?

6 Ka ge wo e le monyanya o bohlokwa kudu wa ngwaga gomme go letetšwe batho ba bantši, bagolo ba tla swanelwa ke go dira ditokišetšo tše di kgethegilego e sa le pele. (1 Ba-Kor. 14:40) Beke goba go feta moo pele ga April 6, bagolo ba tla rulaganya seboka se se kgethegilego le banababo rena bao ba tlago go thuša monyanyeng, ba kgonthišetše gore ba kwešiša dithulaganyo tša madulo le kamoo diswantšhetšo di swanetšego go fetišwa ka gona. Ge e ba o abetšwe go thuša nakong ya monyanya bjalo ka mohlokomedi goba yo a fetišago diswantšhetšo, kgonthišetša gore o latela tlhahlo ya bagolo ka kelohloko mabapi le ditaba tše. Ka go hlahloba dikgopotšo lepokising le le lego go letlakala 7, bagolo ba ka kgonthišetša gore dithulaganyo ka moka tša bahlokomedi, bao ba fetišago diswantšhetšo, diswantšhetšo le seboledi di dirilwe e sa le pele.

7 Ke ba sego kae ba banababo Kriste bao ba šetšego lefaseng lehono, gomme nakong e tlago e sa fetšego pelo go binwa ga monyanya wa Selalelo sa Morena go tla kgaotša. (1 Ba-Kor. 11:25, 26) Ge feela re sa dutše re e-na le tokelo ya go dira bjalo, eka re ka tšwela pele re bina ka mo go swanetšego monyanya wa lehu leo le neago kholofelo ya bophelo bjo bo sa felego.