Go Hlahlobja Ke Jehofa​—⁠ke Ka Baka La’ng E Le Mo Go Holago?

¹ Yo mongwe le yo mongwe o kganyoga bophelo bjo bobotse bja mmele. Bo dira gore bophelo e be bjo bo thabišago kudu. Lega go le bjalo, ba bantši ba ba thabelago bophelo bjo bobotse bja mmele ba sa dutše ba hlahlobja nako le nako. Ka baka la’ng? Ba tsoma go hwetša mathata le ge e le afe ao a tšwelelago a tša maphelo e le gore go ka tšewa magato bakeng sa go a alafa. E tloga e le gabohlokwa le go feta go šireletša bophelo bja rena bja moya. Go amogelwa ke Jehofa go ithekgile ka go dula re le “ba phedilego tumelong.”​—⁠Tito 1:⁠13, PK.

² Bjale ke nako e swanetšego ya go hlahlobja ke Jehofa. Ke ka baka la’ng go le bjalo? Ka gobane Jehofa o tempeleng ya gagwe e kgethwa, gomme o hlahloba dipelo tša batho ka moka. (Ps. 11:​4, 5; Die. 17:⁠3) Go swana le Dafida, re kgopela Jehofa gore a re hlahlobe ka mo go tseneletšego: “Nteke Jehofa, gomme o ntsomešiše, sekiša dipshio tša-ka le pelo ya-ka.”​—⁠Ps. 26:⁠2, PK.

³ Re swanetše go itiša malebana le dilo tšeo di beago bophelo bja rena bjo bobotse bja moya kotsing tšeo di ka tšwago go rena ka baka la nama ya rena e sa phethagalago. Diema 4:​23 e eletša ka gore: “Mo xo tšohle di dišwaxo, diša pelo y’axo; xobane bophelô bo hlaxa xo yôna.”

⁴ Bophelo bja rena bja moya bo ka ba bja bewa kotsing ke lefase le šilafetšego le le gobogilego leo le re dikologilego. Ge e ba re itumelela go ba kgaufsi kudu le tshepedišo ye e kgopo, re ka ba ra thoma go nagana go etša kamoo e naganago ka gona le go thoma go ba le boemo bja kgopolo bja lefase. Goba mo gongwe re ka amogela mokgwa wa lefase wa bophelo gomme ra fenywa ke moya wa lefase.​—⁠Ba-Ef. 2:​2, 3.

⁵ Sathane a ka diriša tlaišo goba kganetšo e lebanyago ka boiteko bja go re šwalalanya moyeng. Lega go le bjalo, gantši kudu o diriša ka boradia dikgoketšo tša lefase bakeng sa go re aroša. Petro o re kgothaletša go ‘dula re phafogile gomme re phakgame,’ ka ge Sathane a le “bo-ka tau e bôpaxo; [a] nyaka yo a kaxo mo metša.” Re kgothaletšwa ‘go lwa le yena re tiile tumelong.’​—⁠1 Pet. 5:​8, 9.

⁶ Go nyakega gore re šireletše bophelo bja rena bja moya ka go boloka tumelo ya rena e tiile le ka go e matlafatša letšatši le lengwe le le lengwe. Moapostola Paulo o eletša gore re leke tumelo ya rena ka go se kgaotše. Go etša ge re ela hloko ka bohlale keletšo e šomago yeo re e newago ke ngaka e nago le bokgoni, gape re theetša le Jehofa ge tlhahlobo ya Gagwe ya moya e utolla bothata bjo bo nyakago go lokišwa. Se se dira gore go kgonege go rena “go ba ba lokišegago.”​—⁠2 Ba-Kor. 13:​5, 11, NW.

⁷ Jehofa ke Mohlahlobi yo mogolo e le ka kgonthe. Tlhahlobo ya gagwe e nepagetše ka mehla. O tseba gabotse seo re se nyakago. O nea ditaelo tša dijo tše di phedilego tša moya ka Lentšu la gagwe le ka “molaki e a bôtêxaxo.” (Mat. 24:​45; 1 Tim. 4:⁠6) Go iphepa ka mehla ka dijo tše tše di nago le phepo ka gae le dibokeng tša phuthego go re dira gore re kgone go dula re phedile moyeng. Tlwaetšo ya ka mehla ya moya bodireding le modirong o mongwe wa Bokriste le yona e a hola. Ka baka leo, re amogela go hlahlobja ka mehla ke Jehofa re kgodišegile gore o tla re boloka re le bophelong bjo bobotse kudu bja moya.