Letlolo La Dipotšišo

◼ Na ke mo go swanetšego go neela bakeng sa senamelwa seo se newago ke ba bangwe?

Ba bangwe ba rena re na le maemo ao a re nyakago gore re ithekge ka ba bangwe bakeng sa thušo gore re be gona dibokeng ka mehla le go tšea karolo tirelong ya tšhemo. Banababo rena ba bantši le dikgaetšedi ba dira boiteko bjo bo kgethegilego ka botho le go diriša nako ya bona ka lerato, dikoloi le matlotlo a mangwe bakeng sa go re thuša ka dinamelwa. Le ge mo gongwe ba ka swanelwa ke go itokiša e sa le ka pela go feta kamoo ba bego ba ka dira ka gona gomme ba diega go boela gae, ba thuša ka dinamelwa ka moya o ratago.

Go etša sebopegong se sengwe le se sengwe sa bodiredi bja Bokriste, molao wa motheo o hwetšwago go Ba-Galatia 6:5 o a šoma: “Motho ka o tee ka o tee ó rwešwa morwalo e lexo wa xaxwe.” Ka baka leo, ge e ba motho yo mongwe a re thuša ka senamelwa ka mehla, re swanetše go bontšha tebogo ya rena e sego feela ka mantšu eupša ge e ba re kgona, gape le ka moneelo o lekanego go thuša go hlokomela ditshenyagalelo tšeo di akaretšwago.—Mat. 7:12; 1 Ba-Kor. 10:24.

Gaešita le ge motho yo a dirišago koloi ya gagwe a sa kgopele thušo ya tša ditšhelete gomme go sa bonale a e nyaka, go neela ka go tšwa pelong go a lebogwa ka mehla. Mootledi a ka gana go amogela selo le ge e le sefe; ee, ke yena a swanetšego go dira phetho ya seo. Eupša ke mo go swanetšego gore o neele. Ge e ba o sa kgone go neela selo le ge e le sefe ka nako yeo, o ka dula o gopola; mo gongwe o ka kgona go neela selo se se oketšegilego nakong e tlago ge o nametšwa.—Luka 6:38.

Ke ga lerato kudu go bao ba nago le dikoloi gore ba thuše ba bangwe ka dinamelwa bao mo gongwe ba bego ba ka se kgone go ba gona dibokeng goba go tšea karolo bodireding bja tšhemo. (Die. 3:27) Ka nako e swanago, e bile ke ga lerato go bao ba holwago ke botho bjo bo bjalo gore ba bontšhe ditebogo tša bona ka go neela go dumelelana le maemo a bona.—Ba-Kol. 3:15.