go Lokišetša —Senotlelo Se Se Išago Katlegong
1 Go lokišeletša bodiredi e sa le pele go tla thuša go fenya go dika-dika le ge e le gofe mo motho a ka bago le gona mabapi le go tšea karolo tirelong ya tšhemo. Ge o dutše o batamela mejakong, o tla tseba seo o nyakago go se bolela le beng ba dintlo. Ga se wa swanela go boifa mabapi le ditlhohlo tšeo mo gongwe go ka lebanwago le tšona. Ge o boela gae o e-tšwa tirelong, o tla ikwa o kgothatšegile, o tseba gore o dirile boiteko bjo bobotse bodireding. Ee, go lokišetša gabotse ke senotlelo sa go loutša bokgoni bja rena bja go bolela le go ruta.
2 Paulo o gateletše go itokišeletša ka go re kgothaletša gore “dinaong [tša rena re] dulê [re] itlemeletše xo phafoxela Ebangedi ya khutšô.” (Ba-Ef. 6:15) Se se akaretša go lokiša menagano ya rena le dipelo gotee le go ba le pono e nepagetšego le moya o ratago. Ge re itokišeditše go abelana therešo le ba bangwe, modiro wa rena o tla putswa ka dienywa tša Mmušo, gwa re thabiša.—Dit. 20:35.
3 Kamoo go ka Lokišeletšwago Modiro wa Boboledi ka Gona: Re swanetše go kgetha thero yeo re lokologago ka yona, mohlomongwe go tšwa go tšeo di šišintšwego ka pukung ya Go Boledišana goba go tšeo di hwetšwago letlakaleng la mafelelo la Tirelo ya Rena ya Mmušo. Naganišiša ka lengwalo le o rerago go le diriša, o kgethe mantšu goba polelwana yeo o tlago go e gatelela gore ntlha ya gago ya bohlokwa e kwagale. Ga go nyakege gore o sware thero ka hlogo; go e na le moo, go kaone go ba le kgopolo monaganong, o e bee ka mantšu a gago gomme o e bolele ka mokgwa wo o naganago gore o tla ipiletša go motheetši wa gago.
4 Hlahloba puku yeo o rulaganyago go e sepediša, gomme o kgethe dintlha tše dingwe tše di kgahlišago tša poledišano. Kgetha selo seo o naganago gore e tla ba se se kgahlišago bathong ba tšhemo ya geno. Naganišiša kamoo o ka beakanyago thero ya gago ka gona bakeng sa beng ba dintlo ba fapanego—monna, mosadi, motšofadi goba mofsa.
5 Na le ile la leka go swara mananeo a go itlwaetša? Bokanang le ditho tša lapa goba bagoeledi ba bangwe bakeng sa go ahla-ahla dithero tšeo e ka bago tše di atlegago, ka morago le di boeletše ka go hlaboša e le gore bohle ba tle ba di gopole gabotse. Lekang go ekiša maemo a kgonthe le dikganetšo tšeo go ka lebanwago le tšona tšhemong. Go itlwaetša mo go bjalo go tla kaonefatša go bolela ga gago ka go elela, gwa oketša katlego ya gago boboleding le go aga kgodišego ya gago.
6 Go tlaleletša go go lokišetša le go itlwaetša thero ya gago, o swanetše go ipotšiša gape gore, ‘Na diaparo tšeo ke rerago go di apara di swanela bodiredi? Na ke na le seo ke se nyakago mokotleng wa-ka wa dipuku, go akaretša le dipuku tšeo ke rulaganyago go di diriša? Na di boemong bjo bobotse? Na ke na le puku ya-ka ya Go Boledišana, dipampišana, dipego tša ntlo le ntlo le phentshele?’ Go rulaganya e sa le pele mo go etšwego hloko go tla tlaleletša letšatšing le le atlegago kudu tirelong.
7 Ge feela re dirile se sekaone seo re ka se kgonago bakeng sa go itokišetša, re swanetše go rapelela moya wa Jehofa gore o re thuše go ba ba atlegago. (1 Joh. 5:14, 15) Go lebiša tlhokomelo kudu go lokišetšeng go tla feleletša ka go hwetša ga rena lethabo le legolo modirong wa rena, ge re dutše re ‘phetha bodiredi bja rena ka botlalo.’—2 Tim. 4:5, bapiša le PK.