Go Phethagatša Keno Ya Rena Letšatši Le Letšatši
1 Mopsalme Dafida o ile a tutueletšega go ipolela go Jehofa gore: “Ké mo ke tl’o xo hlaba sefela sa ’ina la xaxo xo ya xo ile, ka phêtha ’kênô tša-ka ka mehla le mehla.” (Ps. 61:8) Dafida o be a tseba gore go dira keno ke taba ya boithatelo ka mo go feletšego. Lega go le bjalo, o be a bile a lemoga gore ge e ba a be a dirile keno, o be a tlamegile go e phethagatša. Lega go le bjalo, o ile a reta Jehofa bakeng sa sebaka sa go phethagatša dikeno tša gagwe letšatši le letšatši.
2 Ge re be re ineela go Jehofa, re ile ra ikana ka go ithatela gore re dire thato ya gagwe. Re ile ra itatola gomme ra dira go hlankela Jehofa selo se segolo seo re se phegelelago bophelong. (Luka 9:23) Ka gona, le rena re swanetše go phethagatša keno ya rena letšatši le letšatši. (Mmo. 5:4-6) Boipolelo bja rena bja phatlalatša bjo bo dirilwego nakong ya kolobetšo ya meetseng bo swanetše go bonagatšwa mokgweng ka moka wa rena wa go phela, ka ge re tseba gore “motho . . . ó ipolela ka molomo a tseb’o phološwa.” (Ba-Roma 10:10) Se se akaretša go bolela ditaba tše di lokilego. (Ba-Heb. 13:15) Maemo a motho ka noši a fapa-fapana kudu, eupša letšatši le letšatši ka moka ga rena re ka dula re lebišitše tlhokomelo go bohlokwa bja go abelana le ba bangwe ditaba tše di lokilego.
3 Dira Dibaka tša go Bolela Letšatši le Letšatši: Go abelana le motho yo mongwe ditaba tše di lokilego ke phihlelo e thabišago. E le gore re dire se letšatši le letšatši, re swanetše go dira dibaka tša go bolela nako le nako ge maemo a rena a dumela. Diphihlelo tše dintši tše di thabišago di ile tša thabelwa ke bao ba ilego ba gata mogato wa pele bakeng sa go nea bohlatse bjo bo sa rulaganyetšwago go batho ka o tee ka o tee modirong goba sekolong le go baagišani goba go ba bangwe bao ba gahlanago le bona letšatši le lengwe le le lengwe. Gaešita le go ngwala mangwalo goba go diriša mogala e ka ba mokgwa wa go nea bohlatse go ba bangwe. Go diriša mekgwa ye ka moka ka mo go holago gotee le go beela nako ka thoko ka mehla bakeng sa go nea bohlatse ka ntlo le ntlo le go dira maeto a go boela go ka lebiša lethabong le le kgethegilego leo le tlišwago ke go swara thuto ya legae ya Beibele. Ee, letšatši le lengwe le le lengwe re ka kgona go dira dibaka tša go dira boboledi.
4 Kgaetšedi o ile a thoma go bala Go Hlahloba Mangwalo ka Mehla nakong ya gagwe ya go khutša modirong. O ile a laleletša modiri-gotee le yena go bala temana ya letšatši le yena, gomme seo go se go ye kae se ile sa lebiša thutong ya Beibele le mosadi. Ba ile ba ithuta lebaka la seripa sa iri letšatši le lengwe le le lengwe, matšatši a mahlano ka beke. Modiri-gotee yo mongwe o ile a lemoga thuto ya bona ya letšatši le letšatši. Mafelelong o ile a itsebiša gore ke yena ngwanabo rena yo a tapilego. Ka go tutuetšwa ke phišego ya kgaetšedi, o ile a ikopanya le mogolo e le gore a tsošološwe. Kgaetšedi yo o ile a kgoma maphelo a mangwe a mabedi ka tsela e nepagetšego ka baka la go phegelela go phethagatša keno ya gagwe letšatši le letšatši.
5 Ge e ba re tutuetšwa ke pelo yeo e tletšego ka tebogo ya go leboga dilo ka moka tše dibotse tšeo Jehofa a re diretšego tšona, go phethagatša keno ya rena ya boineelo gabotse ka mo re ka kgonago letšatši le lengwe le le lengwe go tla re tlišetša lethabo le kgotsofalo. Ka go swana le mopsalme re ka bolela gore: “Ke Xo leboxa ka pelo ka moka, Modimo Mong’a-ka; nka se kxaotše xo rêta leina la xaxo.”—Ps. 86:12.