Bolela Ditaba Tše Di Lokilego Kae Le Kae

¹ Bakriste ba pele ba be ba bolela ditaba tše di lokilego kae le kae. Ba be ba fišega kudu mo e lego gore lebakeng la nywaga e 30 la go tsošwa ga Jesu Kriste, molaetša wa Mmušo o be o ile wa “anêxêlwa babopya bohle ba tlase xa lexodimo.”—Ba-Kol. 1:23.

² Bahlanka ba fišegago ba Jehofa ba lehono ba na le boikemišetšo bjo bo swanago—e lego go fihlelela yo mongwe le yo mongwe ka mo go ka kgonegago ka ditaba tše di lokilego tša Mmušo. Ke’ng seo se ka re thušago go fihlelela pakane ye? Dikarolong tše dintši tša tšhemo ya rena, kudu-kudu mafelong a magaeng re sa dutše re hwetša batho gae ge re e-ya ka ntlo le ntlo. Gaešita le ge seo se tšweletšwago ka pampiring ye ya ka gare se sa tšeele bodiredi bja rena bja ntlo le ntlo legato, batho ba bantši ba šoma ka nako e tletšego gomme gantši ba ba ba se gona gae ge re etela. Ge ba se mošomong, mo gongwe ba ka ba ba le leetong, ba le mabenkeleng goba ba phegelela sebopego se itšego sa boitapološo. Ba swanelegago gare ga bona ba fihlelelwa bjang ka molaetša wa Mmušo?—Mat. 10:11.

³ Ba bangwe go ikopanywa le bona mafelong a bona a mošomo. Gaešita le ditorotswana di na le karolo ya dikgwebo moo batho ba bantši ba hlwago gona bogolo bja letšatši. Metseng e megolo batho bao ba šomago diintasetering goba diofising tša meago ya malekeleke le bao ba dulago meagong ya difolete ya tšhireletšo e tiilego ba hwetša bohlatse—ba bantši e le ka lekga la mathomo. Mafelo-bekeng ba bangwe bao go ilego gwa ikopanywa le bona ge ba be ba iketlile diphakeng, mafelong a boitapološo, mafelong a go kampa goba dikotaseng goba ge ba be ba letile mafelong a go emiša dikoloi goba mafelong a melokeloke ya mabenkele ba ile ba hwetšwa e le bao ba sekametšego go amogeleng ditaba tše di lokilego ka mo go kgahlišago.

⁴ Bagoeledi ba bantši ba dira boiteko bjo bo kgethegilego go nea bohlatse mafelong a batho bohle, kae le kae moo batho ba ka hwetšwago gona. Mathomong Dihlatse tše di be di ikwa di šia e bile di tšhoga ka baka la gore di tlwaetše go dira boboledi maemong a rulagantšwego, go etša ka ntlo le ntlo. Di ikwa bjang mo nakong ye?

⁵ Ngwanabo rena yo mongwe yo a nago le phihlelo o kgotsa ka gore: “Se se phedišitše bodiredi bja-ka!” Yo mongwe o oketša ka gore: “Se se ntira gore ke dule ke tsepamišitše tlhokomelo.” Mmulamadibogo yo a godilego o re: “E bile mo go matlafatšago monaganong, mmeleng le moyeng, . . . gomme ke sa dutše ke gola.” Mogoeledi yo mongwe o bolela gore mo nakong ye o fihlelela batho ba bantši bao le ka mohla ba se ba kago ba boledišana le Dihlatse tša Jehofa pele. Bafsa le bona ba monya moya wa modiro wo o thabišago. Mofsa yo mongwe o ntšha sa mafahleng a gagwe ka tsela ye: “Go a thabiša ka gobane o kgona go bolela le batho ba bantši kudu.” Yo mongwe o re: “Ke sepediša dipuku tše dintši go feta le ge e le neng pele!” Se ka moka se direga tšhemong yeo e šongwago leboelela.

⁶ Balebeledi ba Basepedi ba Etelela Pele: Ka go lemoga gore “sebopêxô sa lefase leno se a lôba [“fetoga,” NW],” Mokgatlo morago bjale o šišintše gore balebeledi ba basepedi ba beakanye thulaganyo ya bona ya tirelo ya tšhemo beke le beke e le gore batho ba bantši kudu ka mo go ka kgonegago ba ka fihlelelwa ka ditaba tše di lokilego. (1 Ba-Kor. 7:31) E šetše e le nywaga e mentši balebeledi ba tikologo ba beela ka thoko dinako tša mesong tša matšatši a gare ga beke bakeng sa go kopanela modirong wa ntlo le ntlo, mola mathapama a be a dirišetšwa go dira maeto a go boela le go swara dithuto tša legae tša Beibele. Mafelong a mangwe thulaganyo yeo mo gongwe e ka ba e sa dutše e šoma. Go a mangwe mo gongwe go ka ba go phethwa modiro o monyenyane ka go šoma ka ntlo le ntlo dinakong tše dingwe tša mesong tša matšatši a gare ga beke. Maemong a bjalo, molebeledi wa mosepedi mo gongwe a ka phetha ka gore dinakong tša mesong tša letšatši e tla ba mo gobotse go kopanela modirong wa go ya ka lebenkele le lebenkele goba go neeng bohlatse setarateng. Goba mo gongwe a ka rulaganyetša gore dihlopha tše nyenyane di nee bohlatse meagong ya malekeleke ya diofisi, mafelong a mabenkele, mafelong a go emiša dikoloi goba mafelong a mangwe a batho bohle. Ka go diriša ga bagoeledi ka katlego kudu nako yeo e lego gona bakeng sa tirelo ya tšhemo, go tla ikopanywa le batho ba bantši kudu.

⁷ Dipego di bontšha gore peakanyo ye e amogetšwe ka lethabo ke balebeledi ba basepedi le bagoeledi ka mo go swanago. Bontši bja dihlopha tša bagolo di kgopetše molebeledi wa tikologo gore a tlwaetše bagoeledi ba sego kae dibopegong tša modiro tšeo di nyakago tlhokomelo lefelong leo. E bile mo go holago gore bagoeledi ba ba sepele le molebeledi wa mosepedi ge a dutše a tšea karolo go o mongwe wa mediro ye. Le bona ba ile ba kgona go tlwaetša ba bangwe. (2 Tim. 2:2) Ka baka leo, mo nakong ye batho ba bantši ba fihlelelwa ka ditaba tše di lokilego.

⁸ Go ba gona, ga se la swanela go emela molebeledi wa tikologo gore a etele gomme e be gona le lekago tše dingwe tša ditsela tše tša go dira boboledi. Tše dingwe tša dikgopolo tše fapa-fapanego tšeo mo gongwe le ka hwetšago e le tše šomago tšhemong ya gabo lena šidi:

⁹ Go Nea Bohlatse Setarateng: Ka dinako tše dingwe ge re dutše re etela lefelo la madulo leo le se nago batho mesong ya gare ga beke re ipotšiša gore ‘Batho ka moka ba ile kae?’ Ba bangwe mo gongwe ba ka hwetšwa ba phetha mabaka a mangwe goba ba le mabenkeleng. Na o kile wa leka go ba fihlelela ka go nea bohlatse setarateng? Sebopego se sa bodiredi ge e ba se dirišwa ka mo go swanetšego e ka ba seo se enywago kudu. Go e na le go ema felo-gotee ka dimakasine, go kaone kudu gore o batamele batho gomme o thome poledišano ya bogwera. Ga go nyakege gore o nee bohlatse go mofeti yo mongwe le yo mongwe wa tsela. Boledišana le bao ba sa itlhaganelago, go swana le bao ba lebelelago dilo mafasetereng a mabenkele, bao ba lego ka dikoloing tšeo di emišitšwego goba batho bao ba emetšego dinamelwa tša batho bohle. Ge o thoma o ka dumediša ka bogwera gomme wa letela karabelo. Ge e ba motho a rata go bolela, botšiša pono ya gagwe ka taba yeo o naganago gore mo gongwe e ka mo kgahla.

¹⁰ Molebeledi yo mongwe wa mosepedi o ile a laletša bagoeledi ba tshelelago gore ba kopanele le yena le mosadi wa gagwe go neeng bohlatse setarateng. Ka mafelelo afe? O bega gore: “Re bile le meso e kgahlišago! Go be go se na bao ba sego gona gae. Re ile ra sepediša dimakasine tše 80 le dipampišana tše dintši. Re bile le dipoledišano tše dintši tše di kgahlišago. Yo mongwe wa bagoeledi, yoo e bego e le lekga la mathomo a tšea karolo modirong wa setarateng, o ile a kgotsa ka gore: ‘Ke bile therešong ka nywaga e mentši gomme ke be ke sa lemoge seo se bego se ntlhaela!’ Mafelelong a beke sesola se oketšegilego sa dimakasine tše di bego di otarilwe ke phuthego se be se fedile.”

¹¹ Ge a be a hlankela phuthegong e latelago, molebeledi yena yoo wa mosepedi o ile a lemoga gore bagoeledi ba bantšinyana ba be ba ile ba tšea karolo go neeng bohlatse setarateng mesong ya letšatši le lengwe eupša ba ba le katlego e lekanyeditšwego feela. Kgaetšedi yo mongwe o be a ile bolela le batho ba babedi feela lebakeng ka moka la go nea bohlatse, ka ge yo mongwe le yo mongwe yo a bego a kopana le yena a be a itlhaganetše go ya modirong. Molebeledi wa mosepedi o ile a šišinya gore ka moka ga bona ba boele setarateng sona seo ka moragonyana mesong. Ba ile ba boela gomme ba dula go fihla mosegare. Kgaetšedi yo a bego a ile a bolela le batho ba babedi feela pejana mesong o ile a dira gakaone kudu ge a boela. O ile a sepediša dimakasine tše 31 le diporoutšha tše 15, a hwetša maina le diaterese tša batho ba šupago, gomme a thoma dithuto tše pedi tša legae tša Beibele! Ba bangwe sehlopheng ba bile le mafelelo a swanago a kgothatšago.

¹² Ge o hwetša motho yo a bontšhago kgahlego, leka go hwetša leina la motho yoo, aterese le nomoro ya mogala. Go e na le go kgopela tsebišo ka go lebanya, mo gongwe o ka re: “Ke thabetše poledišano ye. Na go na le tsela le ge e le efe yeo ka yona re ka e tšwetšago pele ka nako e nngwe?” Goba botšiša gore: “Na go na le tsela le ge e le efe yeo ka yona nka go fihlelelago gae?” Ba bantši bao ba hweditšwego ka tsela ye ba amogela leeto la go boela. Kgonthišetša gore o na le sesola se se lekanego sa dipampišana tša taletšo bakeng sa go di dirišetša go laletša bao ba ka ratago go ba gona dibokeng tša rena.

¹³ Ge e ba o boledišana le motho yo a thabelago yo a dulago tšhemong yeo e abetšwego phuthego e nngwe, o swanetše go fetišetša tsebišo e le gore banababo rena moo ba ka boela go motho yo a thabelago. Na go nea bohlatse setarateng e ka ba tsela e atlegago ya go gaša ditaba tše di lokilego lefelong la gabo lena? Ge e ba go le bjalo boeletša sehlogo se se rego, “Go Hwetša ba ba Thabelago ka go Nea Bohlatse mo go Atlegago Setarateng” tokollong ya July 1994 ya Tirelo ya Rena ya Mmušo. Ke moka rulaganyetša go kopanela go neeng bohlatse setarateng ka nako e swanetšego ya letšatši yeo e tlago go dira gore o kgone go fihlelela batho ba bantši ka mo go ka kgonegago.

¹⁴ Go Nea Bohlatse Dinamelweng tša Batho Bohle: Mesong e mengwe bontši bja babulamadibogo bo ile bja dira phetho ya go nea bohlatse bathong bao ba bego ba emetše pese kgaufsi le kholetšhe ya lefelong leo. Gaešita le ge ba bile le dipoledišano tše kgahlišago, go be go e-na le bothata. Nakong ya ge poledišano e be e le gare e tšwela pele pese e be e e-tla, gomme ya dira gore poledišano e kgaotše ka bjako. Babulamadibogo ba ile ba rarolla bothata ka go namela pese gomme ba tšwela pele ba nea bohlatse go banamedi ge ba dutše ba sepela go phatša toropo. Ge ba fihla moo pese e felelago gona, babulamadibogo ba be ba tšea leeto la go boela morago ka pese, gomme ba nea bohlatse ge ba dutše ba le tseleng. Ka morago ga maeto a mmalwa ba e-ya le go boa, ba ile ba hlakanya palo-moka ya maiteko a bona: Dimakasine tše fetago 200 di ile tša sepedišwa gomme dithuto tša Beibele tše tshelelago tša thongwa. Banamedi ba bangwe ba ile ba ithapela go nea diaterese tša bona le dinomoro tša mogala e le gore ba ka etelwa gae. Bekeng e latelago babulamadibogo ba ile ba boela boema-peseng gomme ba latela mokgwa o swanago le wa pele. Ba ile ba sepediša dimakasine tše 164 gomme ba thoma thuto e tee ya Beibele. Boema-peseng bjo bongwe monamedi o ile a namela pese gomme a dula bodulong bo nnoši bjo bo bego bo hwetšagala—e lego kgaufsi le mmulamadibogo. O ile a lebelela ngwanabo rena gomme a bolela ka go nywanywa a re: “Ke a tseba gore o ntshwaretše Morokami.”

¹⁵ Bagoeledi ba bantši ba nea bohlatse bjo bo atlegago ge ba sepela ka pese, ka setimela goba ka sefofane. O ka thoma bjang poledišano le monamedi yo a dutšego kgaufsi le wena? Mogoeledi yo mongwe wa nywaga e 12 o ile a fo thoma go bala kopi ya Phafoga! ka peseng, a holofetše gore o tla tsoša kgahlego ya ngwanenyana yo a lego mahlalagading yo a dutšego kgaufsi le yena. Se se ile sa šoma. Ngwanenyana o ile a mmotšiša ka ga seo a bego a se bala, gomme mofsa a araba ka gore o be a bala ka tharollo ya mathata ao bafsa ba swanelwago ke go lebeletšana le ona. O ile a oketša ka gore o hotšwe kudu ke sehlogo seo le gore le yena se ka mo thuša. Ngwanenyana yoo o ile a amogela dimakasine ka lethabo. Poledišano ya bona e ile ya tšewa ka tsebe ke bafsa ba bangwe ba babedi bao le bona ba ilego ba kgopela dikopi tša dimakasine. Ka baka la se, mootledi wa pese o ile a emela ka thoko ga tsela gomme a botšiša lebaka leo ka lona go bego go e-na le kgahlego e kaakaa ya go kgahlegela dimakasine tše. Ge a hweditše lebaka, le yena o ile a amogela dikopi. Go ba gona, ga go le se tee sa tše seo se bego se ka kgonega ge nkabe mogoeledi wa mofsa a be a se a swara sesola se se lekanego sa dimakasine bakeng sa go ka di abelana le yo mongwe le yo mongwe yo a bontšhitšego kgahlego!

¹⁶ Go Nea Bohlatse Diphakeng le Mafelong a go Emiša Dikoloi: Go nea bohlatse diphakeng le mafelong a go emiša dikoloi ke tsela e botse kudu ya go fihlelela batho. Na o kile wa leka go nea bohlatse lefelong la go emiša dikoloi la lefelo la mabenkele? Ka mehla tšea metsotswana e sego kae bakeng sa go šetša tikologo yeo o lego go yona. Nyaka motho yo a sa itlhaganelago goba yo a letilego ka koloing yeo e emišitšwego gomme o leke go thoma poledišano ya bogwera. Ge e ba poledišano e tšwela pele, tsenya molaetša wa Mmušo. Leka go šoma o nnoši eupša mogoeledi yo mongwe a se kgole. Phema go rwala mokotla o mogolo kudu goba go lebiša tlhokomelo mošomong wa gago ka ditsela tše itšego. Hlalefa. Mo gongwe go ka ba kaone kudu go diriša nakwana e kopana lefelong le itšego la go emiša dikoloi gomme ka morago wa ya go le lengwe. Ge e ba motho yo mongwe a sa nyake go boledišana le wena, tloga ka botho gomme o nyake motho yo mongwe yo o ka boledišanago le yena. Ngwanabo rena yo mongwe o ile a sepediša dimakasine tše 90 ka kgwedi e tee ge a be a nea bohlatse mafelong a go emiša dikoloi a diriša mekgwa ye.

¹⁷ Batho ba bangwe ba ya diphakeng bakeng sa go yo iketla; ba bangwe ba ya moo bakeng sa go bapala papadi goba go diriša nako ba e-na le bana ba bona. Phakgamela sebaka sa go nea bohlatse ka ntle le go šitišana ka mo go sa swanelago le tšeo ba di dirago. Ngwanabo rena yo mongwe o ile a thoma poledišano le mohlokomedi wa phaka gomme a hwetša gore o be a tshwenyegile ka dihlare-tagi le bokamoso bja bana ba gagwe. Thuto ya legae ya Beibele e ile ya thongwa gomme ya swarelwa phakeng ka mehla.

¹⁸ Go Nea Bohlatse bjo bo sa Rulaganyetšwago Melokelokeng ya Meago ya Mabenkele: Gaešita le ge e se ka mehla go kgonegago go dira boboledi ka mo go rulaganyeditšwego ka lebenkele le lebenkele melokelokeng ya meago ya mabenkele ka baka la dithibelo tša lefelong leo medirong e bjalo, bagoeledi ba bangwe ba dira dibaka tša go nea bohlatse moo ka mo go sa rulaganyetšwago. Ba dula pankeng gomme ba thoma poledišano ya bogwera le ba bangwe bao ba dulago moo bakeng sa go khutša. Ge kgahlego e bontšhwa, ba sepediša pampišana goba makasine ka bohlale gomme ba katanela go dira dithulaganyo tša leeto la go boela. Ka morago ga go fetša metsotso e sego kae ba nea bohlatse karolong e nngwe ya melokeloke ya meago ya mabenkele, ba fetela go e nngwe gomme ba thoma poledišano le motho yo mongwe. Go ba gona, go swanetše go dirišwa tlhokomelo gore o se ipiletše mahlo ka mo go sa swanelago ge o dutše o nea bohlatse ka mo go sa rulaganyetšwago ka tsela ye.

¹⁹ Ge o dumediša motho, thoma poledišano ka bogwera. Ge e ba motheetši wa gago a arabela, botšiša potšišo, ke moka o theetše ka kelohloko ge a dutše a ntšha sa mafahleng a gagwe. Bontšha kgahlego go seo a se bolelago. Bontšha gore o tšeela pono ya gagwe godimo. Moo go kgonegago, dumelelana le yena.

²⁰ Kgaetšedi yo mongwe o ile swara poledišano e kgahlišago le mokgekolo ka go bolela kamoo ditshenyagalelo tša tša boiphedišo di hlatlogilego ka gona. Mokgekolo o ile a dumela ka ntle le go dika-dika, gomme se sa feleletša ka poledišano e kgahlišago. Kgaetšedi o ile a kgona go hwetša leina le aterese tša mokgekolo gomme leeto la go boela la dirwa bekeng yona yeo.

²¹ Go Šoma ka Lebenkele le Lebenkele: Diphuthego tše dingwe di na le dilete tša tša kgwebo e le karolo ya tšhemo yeo di e abetšwego. Ngwanabo rena yo a hlokomelago tšhemo a ka lokišetša dikarata tše kgethegilego tša mmapa tša dikarolo tše tša kgwebo tše di nago le batho ba bantši. Dikarata le ge e le dife tša mmapa wa tšhemo ya lefelong la bodulo yeo e tsenelelago dikarolong tša kgwebo o swanetše go bontšha gabotse gore dikgwebo ga se tša swanela go šongwa e le karolo ya tšhemo. Mašemong a mangwe, mafelo a kgwebo a ka šongwa gotee le mafelo a bodulo. Bagolo mo gongwe ba ka kgopela bagoeledi ba swanelegago gore ba šome mašemo a kgwebo ka mehla e le gore modiro wa go ya ka lebenkele le lebenkele o se ke wa hlokomologwa.

²² Ge e ba o kgopelwa gore o kopanele modirong wo gomme o se wa ka wa o dira pele, tsela e kaone ya go ‘ipha sebete’ ke go šoma mabenkele a sego kae a manyenyane pele; gomme ge o ikwa o e-na le kgodišego e oketšegilego, šoma a magolo. (1 Ba-Thes. 2:2, NW) Ge o šoma ka lebenkele le lebenkele, apara kamoo o bego o tla apara ka gona ge e ba o be o le sebokeng Holong ya Mmušo. Ge e ba go kgonega tsena ka lebenkeleng ge go se na bareki bao ba letetšego go rekišetšwa. Kgopela go bolela le molaodi goba le motho yo a ikarabelago. E-ba yo a bontšhago botho, gomme godimo ga tšohle, bolela ka bokopana. Ga go nyakege gore o bolele ka go ipona molato. Dikgwebo tše dintši di tlwaelane le bareki gomme di thomile go dula di letetše ditšhitišo.

²³ Ka morago ga go dumediša mong wa lebenkele, mo gongwe o ka re: “Batho ba kgwebo ba dula ba swaregile moo e lego gore ke ka sewelo re ba hwetšago gae, ka gona re go etetše mo lefelong la gago la kgwebo bakeng sa go go tlogelela sehlogo se se šišinyago kgopolo gore o se bale.” Ke moka nea tlhaloso goba tše pedi mabapi le makasine woo o sepedišwago.

²⁴ Goba mo gongwe o ka leka se ge o boledišana le molaodi: “Re lemogile gore batho ba kgwebo ba kgonthišetša gore ba ba le tsebo e botse ya dilo. Tokollo ya morago bjale ya Morokami (goba Phafoga!) e na le sehlogo seo se re kgomago ka moka re le batho ka noši.” Hlalosa seo e lego sona, gomme o phethe ka gore: “Re holofela gore o tla thabela go o bala.”

²⁵ Ge e ba go e-na le bašomi, gomme go bonala e le mo go swanetšego, mo gongwe o ka oketša ka gore: “Na o be o ka tshwenyega ge e ba nka nea thero e swanago e kopana go bašomi ba gago?” Ge e ba tumelelo e newa, gopola gore o holofeditše go bolela ka bokopana, gomme molaodi o tla letela gore o boloke kholofetšo ya gago. Ge e ba bašomi le ge e le bafe ba rata go tsena poledišanong e telele, go tla ba kaone kudu gore o ba etele magaeng a bona.

²⁶ Morago bjale bagoeledi ba mmalwa torotswaneng e nyenyane ba ile ba tlatša molebeledi wa tikologo modirong wa go ya ka lebenkele le lebenkele. Ba bangwe ba bagoeledi ba be ba tšhogile mathomong, ka ge ba be ba se ba ka ba dira modiro wo pele; eupša gatee-tee ba ile ba thekga ditho gomme ba thoma go o thabela. Ka lebaka la ka tlase ga iri, ba ile ba boledišana le batho ba 37 gomme ba sepediša dimakasine tše 24 le diporoutšha tše 4. Ngwanabo rena yo mongwe o ile a lemoga gore ka tlwaelo, ba be ba ka se kgone go kopana le batho ba bantši kgweding e tee ya modiro wa ntlo le ntlo go etša ge ba dirile ge ba be ba šoma lebenkele le lebenkele nakong yeo e kopana.

²⁷ Go Dira Dibaka tša go Dira Boboledi: Jesu ga se a lekanyetša go nea bohlatse ga gagwe maemong a rulaganyeditšwego. O ile a gaša ditaba tše di lokilego ka sebaka se sengwe le se sengwe se se swanetšego. (Mat. 9:9; Luka 19:1-10; Joh. 4:6-15) Ela hloko kamoo bagoeledi ba bangwe ba bulago dibaka tša go dira boboledi.

²⁸ Ba bangwe ba go dira mokgwa go nea bohlatse go batswadi bao ba letetšego bana ba bona kgaufsi le kgoro ya sekolo. Ka ge batswadi ba bantši ba fihla metsotso e 20 pejana, go na le nako ya go ba tsenya poledišanong e tutuetšago ka taba ya Mangwalo.

²⁹ Babulamadibogo ba bantši ba kgomega ka go fihlelela batho bao mo gongwe ba nago le kgahlego e kgethegilego tabeng e itšego yeo e ahla-ahlwago ka dimakasineng tša rena. Ka mohlala, kgaetšedi yo mongwe o ile a hwetša karabelo e botse ge a be a etela dikolo tše tshelelago tšhemong ya phuthego ya gabo ka lelokelelo le le lego mabapi le dikolo leo le tšwelelago ka go Phafoga! ya January 8, 1995. Gape o ile a etela ditirelong tša tlhokomelo ya lapa ka dimakasine tše di lego mabapi le bophelo bja lapa le go tlaišwa ga bana gomme a newa nako e tsepamego ya go tla le ditokollo tša nakong e tlago tše di lego mabapi le dihlogo tše di swanago. Karabelo yeo a ilego a e hwetša ofising ya bao ba hlokago mošomo mabapi le Phafoga! ya March 8, 1996 ye e lego mabapi le go hlokega ga mošomo e ile ya hlaloswa e le e “tlabago.”

³⁰ Molebeledi wa selete o bega gore yena le mosadi wa gagwe ka mehla ba nea bohlatse ka mo go sa rulaganyetšwago ge ba reka korosari ya bona. Ba reka nakong ya letšatši yeo ka yona lebenkele le sa tlalago kudu, gomme bareki ba e-ya tlase le tletlolo le mekgoba ka go iketla. Ba bega dipoledišano tše dintši tše dibotse.

³¹ Bagoeledi ba bantši ba bega gore ba bile le mafelelo a mabotse ge ba be ba nea bohlatse go batho mafelong a bohlatswetšo bja diaparo a batho bohle. Ga ba fo tlogela dimakasine ge go se na motho moo. Pakane ya bona ke go fihlelela batho ka ditaba tše di lokilego, ka gona ba katanela go bolela ka go lebanya le bao ba dirišago didirišwa tše.

³² Mafelong a mangwe, bagoeledi ba kgethilwego ba hwetša tumelelo ya go nea bohlatse maema-fofaneng. Ka dinako tše dingwe ba ile ba thabela go nea bohlatse go basepedi ba ditšhaba-tšhaba bao ba dulago dinageng tšeo go tšona batho ba Jehofa e lego ba sego kae ka palo. Moo kgahlego e hwetšwago ba ile ba sepediša pampišana goba dimakasine.

³³ Ge e ba ba sa dumelelwa go nea bohlatse ka noši go bahiri ba difoleteng tša tšhireletšo e tiilego tšhemong ya phuthego, ba bangwe ba ile ba dira mokgwa wa go nea bohlatse ka bohlale go bahlapetši ba tšhireletšo ba lego modirong goba go balaodi ba diofising tše di hirišwago. Mokgwa o swanago o dirišwa mafelong a phoraefete ao a nago le dikgoro tša mapheko a tšhireletšo. Molebeledi wa tikologo le bagoeledi ba sego kae ba ile ba etela meago e šupago ya difolete ka tsela ye. Lebakeng le lengwe le lengwe ba ile ba botša molaodi gore gaešita le ge ba se ba dumelelwa go etela difolete ka tsela ya rena e tlwaelegilego, ba be ba sa nyake gore a foše tsebišo yeo e lego ka dimakasineng tša morago bjale. Balaodi meagong ka moka e šupago ba ile ba amogela dimakasine ka lethabo gomme ba ba ba kgopela le ditokollo tše di latelago! Ke moka badudi ba meagong e bjalo go ikopanywa le bona ka mogala.

³⁴ Katanela go Dira Boboledi Kae le Kae: Go phelela boineelo bja rena go akaretša go ba le maikwelo a go akgofa ga nako mabapi le kabelo ya rena ya go bolela molaetša wa Mmušo. E le gore re fihlelele batho ka nako e ba swanetšego, re swanetše go beela ka thoko dikgahlego tša rena tša motho ka noši “è le xore mo xo fêla [re] bê le ba [re] ba ruaxo.” Bahlanka ka moka ba ineetšego ba Jehofa ba nyaka gore ba kgone go bolela go etša ge moapostola Paulo a boletše gore: “Tšé ka moka ke di dira ka ’baka la Ebangedi, xore le nna ke bê wa xabô-bao e lexo ba yôna.”—1 Ba-Kor. 9:22, 23.

³⁵ Paulo o ngwadile gape gore: “Ké xôna ke rexo xo kaone xe nka kxahlwa ke xo kxanthša diphôkôlô tša-ka, xore matla a Kriste a axê mo xo nna. . . . Xobane xe ke fôkôla ké mo ke naxo le matla.” (2 Ba-Kor. 12:9, 10) Ka mantšu a mangwe, ga go le o tee wa rena yo a bego a ka phetha modiro wo ka matla a rena ka noši. Re swanetše go rapela Jehofa bakeng sa moya wa gagwe o mokgethwa o matla. Ge e ba re rapelela matla go Modimo, re ka kgodišega gore o tla araba dithapelo tša rena. Ke moka lerato la rena la go rata batho le tla re tutueletša go nyaka dibaka tša go bolela ditaba tše di lokilego go bona kae le kae moo ba ka hwetšwago gona. Bekeng e tlago, ke ka baka la’ng o sa leke e nngwe ya ditšhišinyo tše di tšweleditšwego ka pampiring ye ya ka gare?