Lokišetša Thero Ya Gago Ka Noši Ya Dimakasine
1Re leboga dimakasine tša Morokami le Phafoga! bakeng sa dihlogo tša tšona tše di lego nakong le tše di nago le tsebišo, tšeo di akaretšago selo se sengwe le se sengwe go tloga go ditaba tša lefase go ya go “madiba a diphiri tša Modimo.” (1 Ba-Kor. 2:10) Ka October re tla ba re sepediša dipeeletšo tša dimakasine tše ka bobedi. Ka moka ga rena re gopola dilo tše dintši tše difsa le tše di agago tšeo re di badilego dimakasineng tše, tšeo Jehofa a di dirišago go utolla therešo ka mo go tšwelago pele. (Die. 4:18) Re rata go ba mafolofolo go di phatlalatšeng gohle ka mo go kgonegago.
2 Hlahlobang Tšhemo ya Lena: Batho bao ba dulago tšhemong ya lena ke ba mohuta mang? Ge e ba ba phela bophelo bja leema-ema, le ka swanelwa ke go lokišetša thero e kopana le e lebanyago taba. Ge e ba le e-na le tšhemo yeo go yona bophelo e lego bja boiketlo, le ka kgona go bolela go gontši. Ge e ba beng ba dintlo ba bantši ba šoma mosegare, le ka atlega kudu ka go etela magae a bona thapama goba e sa le ka pela mantšiboa. Mo gongwe le ka ikopanya le ba bangwe mosegare ka go nea bohlatse setarateng goba ka go šoma lebenkele ka lebenkele. Bagoeledi ba bangwe ba ba le mafelelo a mabotse ka go batamela batho ka tsela e sa rulaganyetšwago mafelong a go emiša dikoloi le diphakeng tša motse.
3 Itlwaelanye le Dimakasine: Bala tokollo e nngwe le e nngwe kapejana ge o se na go e hwetša. Kgetha dihlogo tše o naganago gore e ka ba tše ipiletšago bathong ba tšhemo ya geno. Ke ditaba dife tše di ba kgomago? Lebelela ntlha e kgethegilego yeo o ka e tsopolago sehlogong seo o rerago go se bolelela. Nagana ka potšišo yeo o ka e rotošago go tsoša kgahlego. Kgetha lengwalo le le lego nakong leo o ka le balelago mong wa ntlo ge e ba o hwetša sebaka sa go dira bjalo. Nagana ka seo o ka se bolelago bakeng sa go thea motheo wa leeto la go boela.
4 Lokišetša Mantšu a Gago a go Bula: Kgetha ka šedi mantšu ao o rerago go a diriša go itsebiša le go thoma poledišano. Ba bangwe ba hweditše katlego ka tlhaloso ye: “Ke badile taba e kgahlišago makasineng wo, gomme ke rata go e abelana le ba bangwe.” Ba bantši ba thoma ka potšišo yeo e lebišago tlhokomelo tabeng e bolelelwago ye ba rerago go e diriša. Ka mohlala:
5 Ge o bolelela sehlogo se se lego mabapi le go ata ga bosenyi, mo gongwe o ka botšiša gore: ◼“Go tla nyakega’ng go dira gore re kgone go robala bošego re sa boife go utswetšwa goba go gobatšwa?” Hlalosa gore o na le tsebišo e itšego mabapi le pheko ya bothata bjo. Pheko kgaufsinyane e tla tloša mohuta o mongwe le o mongwe wa tlhakatlhakano ya tša leago. Šupa go se sengwe ka makasineng seo se neago kholofelo e bjalo. Ge o boela, o ka gogela tlhokomelo ya mong wa ntlo go kgaolo 1 ya puku ya Tsebo.
6 Ge o neela sehlogo se se bolelago ka bophelo bja lapa, mo gongwe o ka bolela se: ◼“Batswadi ba bantši kudu ba hwetša e le tlhohlo ya kgonthe go godiša lapa mehleng ye. Go ngwadilwe dipuku tše dintši mabapi le taba ye, eupša gaešita le ditsebi ga di dumelelane. Na go na le motho le ge e le ofe yo a ka neago tlhahlo e botegago?” Abelana le yena tlhaloso e itšego e tšwago makasineng yeo e bontšhago keletšo e bohlale e hwetšwago ka Beibeleng. Ge o dira leeto la go boela, ahla-ahla dikgopolo tša Mangwalo tšeo di lego mabapi le go godiša bana tše di akareditšwego ka pukung ya Tsebo, matlakala 145-8.
7 Ge o bolelela sehlogo se se lego mabapi le bothata bja tša leago, mo gongwe o ka re: ◼“Batho ba bantši ba ikwa ba le ka tlase ga kgateletšo ka baka la dinako tše di gatelelago tšeo re phelago go tšona. Na o nagana gore Modimo o be a rerile gore re phele ka tsela ye?” Šupa go sehlogo seo se bontšhago kamoo go ka lebeletšanwago ka gona le mathata a lehono goba seo se neago mabaka a go lebelela pele bokamosong bjo bo tlago go ba bo lokologile pelaelong. Ketelong ya gago e latelago, ahla-ahla seswantšho le mongwalo o hlalosago go matlakala 4-5 a puku ya Tsebo, gomme o tsene ka go lebanya thutong ya legae ya Beibele.
8 Itlwaelanye le Mong wa Ntlo: O tla kopana le batho bao ba nago le dikgahlego le ditlogo tše di fapanego. Lokišetša thero ya motheo yeo o ka kgonago go e feto-fetoša go mong wa ntlo yo mongwe le yo mongwe. Nagana ka dilo tše o ka di bolelago go monna, mosadi, motšofadi goba mofsa. Ga go na melao e tiilego mabapi le seo o swanetšego go se bolela. Bolela selo le ge e le sefe se o ka lokologago go se bolela le seo se tlago ba le mafelelo. Lega go le bjalo, e-ba mafolofolo, bolela ka go tšwa pelong gomme o be motheetši yo botse. Bao ba ‘hlaotšwego’ ba tla kwa potego ya gago gomme ba tla arabela ka go rata.—Dit. 13:48.
9 Thušanang: Ka go abelana dikgopolo le ba bangwe, re ithuta ditsela tše difsa tša go itlhalosa. Go itlwaetša dithero tša rena re le gotee go re nea boitemogelo le kholofelo. (Die. 27:17) Ge e ba o boeletša se o yago go se bolela, o tla lokologa kudu ge o le mojakong. Ke gabohlokwa gore batswadi ba tšee nako ba thuša bana ba bona go lokišetša, ba ba theetše ge ba itlwaetša thero ya bona gomme ba nee ditšhišinyo bakeng sa kaonefatšo. Ba bafsa ba ka holwa ke go šoma le bagoeledi bao ba nago le phihlelo kudu.
10 Go lokišetša thero ya gago ka noši ya dimakasine ga se gwa swanela go ba thata. E fo ba taba ya go hwetša selo se sengwe se itšego kgopolong se o ka se bolelago gomme o se hlalose ka mokgwa o ipiletšago. Ka go gata mogato wa pele le go nagana e sa le pele, o ka neela thero e botse yeo e tlago go hwetša karabelo e botse.
11 Go aba dimakasine ke e nngwe ya ditsela tše bohlokwa tša go phatlalatša molaetša wa Mmušo lefaseng ka bophara. Ge e ba o ka tlogela Morokami le Phafoga! diatleng tša batho ba dipelo tše botegago, dimakasine di ka ipolelela. Ka mehla gopola mohola wa tšona le kamoo molaetša wa tšona o ka phološago maphelo ka gona. Mokgwa wo wa ‘go dira ba bangwe gabotse le go abelana dilo le bona’ ke selo se se thabišago Jehofa kudu.—Ba-Heb. 13:16, PK.